30 ނޮވެމްބަރ 2025 - 18:57
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ މައްޗަށް އުފުލާފައިވާ ކޮރަޕްޝަންގެ ދައުވާތަކާ ގުޅިގެން އޭނާ މިއަދު ރަސްމީކޮށް މާފަށް އެދެފި އެވެ.
މީގެ ކުރިން އެމެރިކާގެ ރައީސް ޑޮނަލްޑް ޓްރަމްޕު ވެސް ވަނީ އިޒްރޭލުގެ ރައީސް އައިޒަކް ހަރްޒޮގަށް ސިޓީއެއް ފޮނުއްވައި، ނަތަންޔާހޫއަށް މައާފު ދިނުމަށް އެދިވަޑައިގެންފި އެވެ.
"އުފުލާފައިވާ މި ދައުވާއަށް މިހާރު ހަ އަހަރު ވެއްޖެ. އަދިވެސް އެތައް އަހަރަކަށް މި ދައުވާ ދެމިގެން ދާނެ ކަމަށް ބެލެވޭ،" ނަތަންޔާހޫ އާންމުކުރި ވީޑިއޯ ބަޔާނެއްގައި ބުންޏެވެ.
އޭނާ ބުނީ ކުށެއް ނެތްކަން ސާބިތުވާންދޭން މައްސަލަ ކުރިއަށް ގެންދަން ބޭނުންވާ ކަމަށާއި އެކަމަކު އިޒްރޭލަށް ކުރިމަތިވެފައިވާ މައްސަލަތަކާއި ހުރި ގޮންޖެހުންތަކުގެ ކުރިމަތީގައި އެގޮތަށް ކަންތައް ކުރެވެން ނެތް ކަމަށެވެ.
"މި މައްސަލަ ކުރިއަށްދާއިރު އިޒްރޭލުގެ އެތެރެއިން ދަނީ ރޫޅި ބައިބައިވަމުން. އަދި މި ހިލާފުތަކާއި ދެކޮޅުވެރިކަން ދަނީ ބޮޑުވަމުން،" ނަތަންޔާހޫ ބުންޏެވެ.
ނަތަންޔާހޫގެ މައްޗަށް ކޮށްފައިވަނީ ސިޔާސީ ދައުވާތަކެއް ކަމަށް އޭނާގެ ސަޕޯޓަރުން ބުނާއިރު އިދިކޮޅު ފަރާތްތަކުން އެގޮތަކަށް ނުދެކެ އެވެ. އަދި މި ދެބައި މީހުންގެ މެދުގައި މައްސަލަ ވަރަށް ބޮޑަށް ހޫނުވެ ސިޔާސީ ބޮޑު ކޯޅުމެއްގެ ތެރޭގައި އިޒްރޭލު އޮންނަތާ އެތައް އަހަރެއް ވެއްޖެ އެވެ.
ނަތަންޔާހޫ ބުނީ މިހާރު އޭނާ ހަފްތާއަކު ތިން ފަހަރު ކޯޓަށް ދާންޖެހޭ ކަމަށާއި އެއީ ކުރެވޭ ވަރުގެ ކަމެއް ނޫން ކަމަށެވެ. އަދި މި އަޑުއެހުންތައް ނިމުމަކަށް ގެނެސް މައްސަލަ ނިންމާލައިފި ނަމަ އިޒްރޭލުގެ ބައިބައިވުން ކުޑަވާނެ ކަމަށް ވެސް ބުންޏެވެ.
ނަތަންޔާހޫ އާއި އޭނާގެ އަންހެނުން ސާރާގެ މައްޗަށް ތުހުމަތުކޮށްފައިވާ ގޮތުގައި، ސިޔާސީ މަންފާއަކަށް ބިލިއަނަރުންގެ އަތުން 260،000 ޑޮލަރުގެ އަގުހުރި ލަގްޒަރީ ސާމާނު ހޯދާފައިވެ އެވެ. މީގެ އިތުރުން އިޒްރޭލުގެ މީޑިއާއިން ޕޮޒިޓިވް ކަވަރޭޖް ހޯދުމަށް މީޑިއާތަކުގެ ވެރިންނާ މަޝްވަރާކުރި ކަމުގެ ތުހުމަތު ވެސް ނަތަންޔާހޫގެ މައްޗަށް ކޮށްފައިވެ އެވެ.