30 ނޮވެމްބަރ 2025 - 18:25
ތޫފާން ދީތުވާގެ ސަބަބުން ސްރީ ލަންކާއަށް ކުރި ގަދަ ވިއްސާރައިގެ ސަބަބުން ކުރިމަތިވި އެކި ހާދިސާތަކުގައި އެ ގައުމުގެ މަރުވި މީހުންގެ އަދަދު މަދުވެގެން 212 އަށް އަރާ ކަމަށް ޑިޒާސްޓާ މެނޭޖްމަންޓް ސެންޓަރު (ޑީއެމްސީ) މިއަދު ބުނެފި އެވެ.
އޮފިޝަލުން ވިދާޅުވީ ތޫފާނުގެ އަސަރު އެންމެ ބޮޑަށް ކުރި ސަރަހައްދަށް ވެފައިވާ ގެއްލުންތައް ރަނގަޅަށް އަދި އެނގެން ފެށީ ފެން ބޮޑުވުމާއި ކިސަޑު ފޭބުމުގެ ސަބަބުން ބަންދުވެފައިވާ މަގުތަކުން ދަތުރުކުރެވޭ ވަރު ވުމުން ކަމަށެވެ.
ހަފްތާއެއް ވަންދެން ލަންކާއަށް ކުރި ވިއްސާރާގައި މަދުވެގެން 212 މީހުން މަރުވިކަން މިހާތަނަށް ކަށަވަރުވެފައި ވާއިރު 218 މީހަކު އަދިވެސް ވަނީ ނުފެނި އެވެ.
ލަންކާއާ ދުރަށް ތޫފާނު ދިއުމާ އެކު އުޑުމަތި ކުޑަކޮށް އަލިވެފައި ވިޔަސް ބޯކޮށް ވެހުނު ވާރޭން އުސް ހިސާބުތަކުން ފައިބަމުންދާ ފެނުން ކެލާނީ ރިވަ ފުރި ބަންޑުންވަމުން ދާތީ ކޮލަމްބޯގެ އުތުރުގެ ބައެއް ހިސާބުތަކުގައި މިއަދު ވަނީ ފެން ބޮޑުވެފަ އެވެ. އެހެންވެ ބައެއް ހިސާބުތަކުން މީހުން ހުސްކުރަން ވެސް ޖެހުނެވެ.
އެހީތެރިކަން ފޯރުކޮށްދިނުމަށް އިންޑިއާއިން ސްރީ ލަންކާއަށް ހެލިކޮޕްޓަރު ފޮނުވައި މީހުން ސަލާމަތްކުރުމުގެ މަސައްކަތް ކުރިއަށް ގެންދާއިރު މިއަދު 24 މީހަކު ސަލާމަތްކޮށްފައިވެ އެވެ. ޕާކިސްތާނުގެ ވައިގެ ސިފައިން ވެސް ލަންކާއަށް ގޮސް އެހީތެރިވާން ފަށާނެ ކަމަށް ބުނެފައި ވާއިރު ޖަޕާނުން ވެސް ލަންކާއަށް މި ވަގުތަށް ބޭނުންވާ މުހިންމު ކަންކަން ދެނެގަތުމަށް ޓީމެއް ފޮނުވަން ވަނީ ނިންމައިފަ އެވެ.
ލަންކާއަށް ފަހުގެ ތާރީހެއްގައި ކުރިމަތިވި ގުދުރަތީ އެންމެ ބޮޑު ކާރިސާގައި 25،000 އަށް ވުރެ ގިނަ ގެދޮރު ހަލާކުވެ، 147،000 އަށް ވުރެ ގިނަ މީހުން ވަނީ ވަގުތީ ހިޔާތަކަށް ދާން މަޖުބޫރުވެފަ އެވެ. ޑީއެމްސީން ބުނީ ބައި މިލިއަން މީހުންނަށް އެކި އެހީތެރިކަން ބޭނުންވެފައިވާ ކަމަށެވެ.
ލަންކާއަށް އެރި މި ތޫފާނަކީ 2017 ވަނަ އަހަރު އެ ގައުމުގައި ފެންބޮޑުވެ ބިންގަނޑު ކަނޑައިގެން ދިޔުމުގެ ސަބަބުން 200 އަށް ވުރެ ގިނަ މީހުން މަރުވެ، އެތައް ހާސް ބަޔަކު ގެދޮރު ގެއްލުނު ފަހުން ކުރިމަތިވި އެންމެ ނުރައްކާތެރި ގުދުރަތީ ކާރިސާ އެވެ. އަދި ޖޫން 2003 ގައި ވަނީ ހަމަ މިފަދަ ހާދިސާތަކެއްގައި 254 މީހަކު މަރުވެފަ އެވެ.