30 ނޮވެމްބަރ 2025 - 18:09
ތޫފާން ދީތުވާގެ ސަބަބުން ސްރީ ލަންކާއަށް ކުރިމަތިވި ގެއްލުންތަކުން އަރައިގަތުމުގައި އެހީވުމުގެ ގޮތުން ބީއެމްއެލް އިން އެ ގައުމަށް 25،000 ޑޮލަރު (385،00ރ.) ހަދިޔާކޮށްފި އެވެ.
އެ އެހީ ދިނީ، ލަންކާއަށް އެހީވުމަށް، ޕީއެސްއެމް އިން އިސްނަގައިގެން ފެށި ޓެލެތޯގެ ތެރެއިންނެވެ. "ސިލޯނާއެކު ދިވެހީން" ގެ ނަމުގައި ކުރިއަށް ގެންދާ އެ ޓެލެތޯންގައި ބީއެމްއެލްގެ ފަރާތުން ފައިސާގެ އެހީ ހަވާލުކޮށްދެއްވީ ބީއެމްއެލްގެ ސީއީއޯ މުހައްމަދު ޝަރީފެވެ.
ޝަރީފު ވިދާޅުވީ، އަވަށްޓެރި ސްރީ ލަންކާ އަކީ ރާއްޖެއާ އެކު ވިޔަފާރީގެ ގިނަ ގުޅުންތަކެއް އޮންނަ ގައުމެއް ކަމަށާއި ބީއެމްއެލްއާ އެކު ވެސް ލަންކާގެ ވިޔަފާރިތައް މަސައްކަތްކުރާ ކަމަށެވެ. އަދި އެ ގައުމުގެ ވަރަށް ގިނަ އަދަދެއްގެ ރައްޔިތުންގެ ބޭންކް އެކައުންޓްތައް ވެސް ބީއެމްއެލް ހުޅުވާފައި އެބަހުރި ކަމެވެ. މިއީ އެ ގައުމަށް ކުރިމަތިވި ކާރިސާއަށް އެހީވުމުގެ ގޮތުން ދޭ ޑޮނޭޝަނެއް ކަމަށް އޭނާ ވިދާޅުވި އެވެ.
މީޑިއާތައް ގުޅިގެން ހިންގާ ޓެލެތޯންގައި މިހާތަނަށް 1.7 މިލިއަން ރުފިޔާ އެކި ފަރާތްތަކުން ވަނީ ހަދިޔާކޮށްފަ އެވެ. އަދި ޑޮލަރުން ވެސް 37،000 (570،000ރ.) ގެ އެހީ ލިބިފައިވެ އެވެ.
މި ޓެލެތޯނުގައި މާލެ އާއި ހުޅުމާލެ އަދި ވިލިމާލޭގެ އެކި ސަރަޙައްދުތަކުގައި ފަންޑު ފޮށިތައް ވަނީ ބަހައްޓައިފަ އެވެ.
ބީއެމްއެލްގެ އިތުރުން ޓެލެތޯނަށް ސަރުކާރުގެ އިދާރާތަކާއި ކުންފުނިތަކުން ވެސް އަންނަނީ ބޮޑެތި އެހީތަކެއް ދެމުންނެވެ.