29 ނޮވެމްބަރ 2025 - 20:14
އެމްޑީޕީގެ ޗެއާޕާސަންގެ އިންތިހާބުގައި ވާދަކުރައްވަން ގަލޮޅު ދެކުނު ދާއިރާގެ މެމްބަރު މީކާއީލް އަހުމަދު ނަސީމް ނިންމަވައި، މިރޭ އެކަން އިއުލާން ކުރައްވައިފި އެވެ.
އެންމެ ބޮޑު އިދިކޮޅު އެމްޑީޕީގެ ޗެއާޕާސަންގެ މަގާމު ހުސްވީ މިދިޔަ ހަތަރު އަހަރެއްހާ ދުވަހު އެ މަގާމު ފުރުއްވި ފައްޔާޒު އިސްމާއިލް މި މަހުގެ 23 ވަނަ ދުވަހު އިސްތިއުފާ ދެއްވުމުންނެވެ.
ޗެއާޕާސަންގެ އިންތިހާބު ބާއްވާނެ ތާރީހު އަދި ކަނޑަނާޅައި އޮތް ނަމަވެސް މީކާއީލް މިރޭ ވިދާޅުވީ، އެމްޑީޕީގެ ލީޑަޝިޕުން އާ ޖީލަކަށް ހޯދުމުގެ މި މުހިންމު މަސައްކަތުގައި އެ ޕާޓީގެ އާންމު މެމްބަރުންގެ އެއްބާރުލުމަށާއި ތާއީދަށް އެދިވަޑައިގަންނަވާ ކަމަށެވެ.
އެމްޑީޕީގެ ޗެއާޕާސަންގެ މަގާމު އިންތިހާބު ބޭއްވެންދެން އެ މަގާމުގެ މަސްއޫލިއްޔަތު ވަގުތީ ގޮތުން އަދާކުރައްވާނެ ބޭފުޅަކު ކަނޑައެޅުމާ ގުޅޭ ގޮތުން އެ ޕާޓީގެ ގައުމީ މަޖިލިހުގެ ރޭގެ ބައްދަލުވުމުގައި މަޝްވަރާކުރި ނަމަވެސް އެ ބައްދަލުވުން ވަކި ހިސާބަކުން ހުއްޓާލީ އަރައިރުން ބޮޑުވެ، ނިޒާމު ގެއްލުމުންނެވެ.
ޗެއާޕާސަންގެ މަސްއޫލިއްޔަތު ވަގުތީ ގޮތުން ހަވާލު ކުރުމަށް ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދުގެ ނަން ރޭގެ ބައްދަލުވުމަށް ހުށަހަޅައި ވޯޓަށް ވެސް އެހި އެވެ. ޖުމުލަ 95 މެމްބަރުން ހާޒިރުވި ބައްދަލުވުމުގައި ވަހީދަށް 47 ވޯޓު ލިބިވަޑައިގަތެވެ. ޗެއާޕާސަންގެ މަގާމަށް ބޭފުޅަކު ކަނޑައަޅަން 48 ވޯޓު ބޭނުންވާއިރު، ވަހީދުގެ ވޯޓާ ހިސާބުން ޒުވާބު ހޫނުވެ، ނިޒާމު ގެއްލުނީ އެވެ.
ވަހީދުގެ އިތުރުން ވަގުތީ ޗެއާޕާސަންގެ ވޯޓު ލިސްޓުގައި އައްޑޫ ހިތަދޫ އުތުރު ދާއިރާގެ ކުރީގެ މެމްބަރު މުހައްމަދު އަސްލަމާއި ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ (ގަޕޯ) ގެ ނަން ވެސް ގައުމީ މަޖިލިހުގެ މެމްބަރުން ގެންގުޅުއްވި އެވެ. އެކަމަކު، ބޮޑަށް ހިޔާލު ތަފާތުވީ އަސްލަމަކީ ގައުމީ މަޖިލިހުގެ މެމްބަރަކަށް ނުވާއިރު، އޭނާ އަށް ޗެއާޕާސަންގެ މަގާމު ފުރުއްވިދާނެތޯ އެވެ.
ވަގުތީ ޗެއާޕާސަނަކަށް ވަހީދުގެ ނަން އައީ ކުރީގެ ރައީސް މުހައްމަދު ނަޝީދުގެ ފަރާތްޕުޅުންނެވެ. އަސްލަމާއި ގަޕޯގެ ނަމަށް ވޯޓަށް އަހަން މަސައްކަތްކުރީ ކުރީގެ ރައީސް އިބްރާހިމް މުހައްމަދު ސޯލިހުގެ ފެކްޝަނުންނެވެ.