29 ނޮވެމްބަރ 2025 - 19:36
ޓީސީގެ ކޯޗުކަމާ އިއްޔެ ހަވާލުވި ތަޖުރިބާކާރު ކޮޗު މުހައްމަދު އާތިފްގެ ބެލުމުގެދަށުން އެ ޓީމުން ކުޅުނު ފުރަތަމަ މެޗުގައި މިއަދު އޭނާގެ ކުރީގެ ޓީމު އޮޑި ސްޕޯޓްސް އަތުން ބަލިވެއްޖެ އެވެ.
ދިރާގު ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗު އޮޑިން ކާމިޔާބު ކުރީ 3-0 ންނެވެ.
އެންމެ ފަހުގެ ދެވަނަ ޑިވިޝަން މުބާރާތް އޮޑި އަށް ކާމިޔާބުކޮށްދީ، އެއްވަނަ ޑިވިޝަނަށް އެ ޓީމު ޕްރޮމޯޓްކޮށް ދިނީ އާތީ އެވެ.
މި އަހަރު ކުރީކޮޅު ވިކްޓަރީގެ ކޯޗުކަމާ ހަވާލުވި އާތީ އެ މަގާމު ފަހުން ދޫކޮށްލީ އެ ކްލަބްގެ ހަރަކާތްތައް ވެސް އެވަގުތަށް ހިނދިގެން ދިއުމުންނެވެ. އޭގެ ފަހުން އާތީ ފެނުނީ ގައުމީ އަންހެން ޓީމުކަމުގެ ކޯޗުކަމުގެ މަގާމުންނެވެ.
ޓީސީ އަށް 2019 ގައި ވެސް ކޯޗުކޮށްދިން އާތީ ދެވަނަ ފަހަރަށް އެ ޓީމާ ހަވާލުވުމުގެ ކުރިން މި ސީޒަނުގައި އެ ޓީމު މިހާތަނަށް ލީޑް ކުރީ އަހްސަން ރަޝީދު އެވެ. އާތީ، ކޯޗުކަމާ ހަވާލުވުމުން އަހްސަން އަދާކުރާނީ އެސިސްޓެންޓް ކޯޗުގެ ދައުރެވެ. މި އަހަރު އެފްއޭއެމުން ބޭއްވި ނުރަސްމީ މުބާރާތުގައި ވެސް ޓީސީ އަށް ކޯޗުކޮށް ދިނީ އަހްސަނެވެ.
މިއަދު މެޗުގައި އޮޑީގެ ފުރަތަމަ ލަނޑު ޖެހީ ލިތުއޭނިއަގެ ފޯވާޑް ކަރޯލިސް ލައުކްޒަމީސް އެވެ. ޑިފެންޑަރު އަހްމަދު އައިހަމް (އަހޫ) ޓީސީގެ އޭރިއާގެ ތެރެއަށް ނަގައިދިން ބޯޅައިން ތަނަވަސްވި ފުރުސަތުގައި ކަރޯލިސް އެ ބޯޅަ ގޯލްގެ ތެރެއަށް ފޮނުވާލީ ވެއްޓިގެންފަ އެވެ.
ވިއްސާރައިގެ ސަބަބުން ދަނޑުގެ ވިނަގަނޑު އޮތީ އެންމެ ރަނގަޅު ހާލަތުގަ އެއް ނޫނެވެ. އެހެންވެ ދެ ޓީމަށް ވެސް އޭގެ އުނދަގޫ އިހްސާސް ކުރަން ޖެހުނެވެ.
އޮޑީގެ ދެވަނަ ލަނޑު 37 ވަނަ މިނެޓްގައި ޖެހީ މުޒުދާން ހަސަން އެވެ. އިބްރާހިމް ވަހީދު ހަސަން ޓީސިގެ އޭރިއާގެ ބޭރުގައި ހުރެފައި އޭރިއާ ތެރެއަށް ބޯޅަ ޕާސް ކުރީ އޮޑީގެ އަބްދުﷲ ލޫތު އިބްރާހިމާއި މުޒުދާންގެ ތެރެއިން ކޮންމެ ވެސް އެއްކުޅުންތެރިޔަކަށް ބޯޅަ ދިނުމަށެވެ.
މުޒްދާން އަށް ބޯޅަ ލިބެން ލޫތު ބޯޅައިގައި ފައިން ވެސް ޖައްސާނުލައި ދޫކޮށްލި އެވެ. މުޒްދާން އެ ގޯލްގެ ތެރެއަށް ފޮނުވާލި އެވެ.
އޯޑީގެ ތިންވަނަ ލަނޑު އަހްޒަމް ރަޝީދު ޖެހީ މުޒުދާން ނަގައިދިން ބޯޅައިންނެވެ. އޭރިއާގެ އަރިމަތިން މުޒުދާން އެ ބޯޅަ ޓީސީގެ އޭރިއާގެ ތެރެއަށް ނަގައިދިން އިރު އަހްޒަމް ހުރީ މުޅިން ހުސްކޮށެވެ. ޓީސިގެ ކީޕަރު އިސްމާއީލް އަލީ ބޯޅަ އަށް ކުރިމަތިލި ނަމަވެސް އަހްޒަން ވަނީ އޭނާ އަށް ފުރުސަތު ނުދީ ބޯޅަ ގޯލްގެ ތެރެއަށް ވައްދާލައިފަ އެވެ.
މެޗުން މޮޅުވެ އޮޑި ވަނީ ދެވަނަ މަގާމާ އެކު ލީގުގެ ފުރަތަމަ ބުރު ނިންމާލައިފަ އެވެ.