29 ނޮވެމްބަރ 2025 - 17:40
ތޫފާން ދީތުވާގެ ސަބަބުން ފެން ބޮޑުވުމާއި ބިންގަނޑު ކަނޑައިގެން ދިއުން ފަދަ އެކި ހާދިސާތަކުގައި ސްރީ ލަންކާއިން މަރުވި މީހުންގެ އަދަދު 132 އަށް އަރައި ހާލަތު އިތުރަށް ގޯސްވުމުން ކުއްލި ނުރައްކަލުގެ ހާލަތު އިއުލާނުކޮށްފި އެވެ.
ޑިޒާސްޓާ މެނޭޖްމަންޓް ސެންޓަރު (ޑީއެމްސީ) އިން ބުނީ މޫސުން ގޯސްވުމުގެ ސަބަބުން މިހާތަނަށް 15،000 އަށް ވުރެ ގިނަ ގެދޮރު ހަލާކުވެ، 78،000 އަށް ވުރެ ގިނަ މީހުން ވަގުތީ ހިޔާތަކަށް ދާން މަޖުބޫރުވެފައިވާ ކަމަށެވެ.
ލަންކާއަށް ވިއްސާރަކުރާތާ ހަފްތާއެއް ވެފައި ވަނިކޮށް އައި ތޫފާނާ އެކު ހާލަތު ވަރަށް ބޮޑަށް ގޯސްވުމުން ރައީސް އަނޫރާ ކުމާރަ ޑިސެނަޔަކަ ކުއްލި ނުރައްލުގެ ހާލަތު މިއަދު އިއުލާނުކުރެއްވުމާ އެކު މި ހާލަތުގައި ކަންކަން ނިންމެވުމަށް ރައީސަށް ބޮޑެތި ބާރުތަކެއް ލިބޭނެ އެވެ.
"މިހާތަނަށް 132 މީހަކު މަރުވެފައިވާ ކަމަށާއި 176 މީހުން ގެއްލިފައިވާކަން ވަނީ ކަށަވަރުވެފައި،" ޑީއެމްސީގެ ޑިރެކްޓަ ޖެނެރަލް ސަމްޕަތު ކޮޓުވެގޮޑާ ވިދާޅުވި އެވެ.
ސިފައިން ނުކުމެ ހެލިކޮޕްޓަރުތަކާއި ކުދި ބޯޓުތަކުގައި މީހުން ސަލާމަތްކުރުމުގެ މަސައްކަތް ކުރަމުން ދާއިރު ބަހެއްގައި ތާށިވެފައި ތިބި 69 ފަސިންޖަރަކު މިއަދު ސަލާމަތްކޮށްފައިވެ އެވެ. އަދި ޖަރުމަނު ޓޫރިސްޓަކު ވެސް ސަލާމަތްކޮށްފައިވެ އެވެ.
ލަންކާގެ މެދުތެރޭގައި އޮންނަ ބަޑުއްލާއަށް ދާން އޮންނަ މަގުތައް ވަނީ ފެން ބޮޑުވުމުގެ ސަބަބުން ދަތުރު ނުކުރެވޭ ވަރުވެފަ އެވެ. އެހެންވެ އެ ހިސާބުގައިވާ އެތައް ވިލެޖަކަށް އެހީ ފޯރުކޮށްދިނުމަށް ވަނީ ހުރަސްއެޅިފަ އެވެ.
ކަރަންޓު ކެނޑުމާއި ފޯނުގެ ހިދުމަތް މެދުކެނޑުމާއި ސާފު ބޯފެން ނުލިބުމުގެ މައްސަލަ މުޅި ގައުމުގެ ހުރިހާ ހިސާބެއްގައި ވެސް ވަނީ މިހާރު ކުރިމަތިވެފަ އެވެ. އާންމު ދަތުރުފަތުރަށް ހުރަސްއެޅިފައި ވާއިރު ފްލައިޓްތައް ވެސް ކެންސަލްކުރަންޖެހި ބޮޑެތި ދަތިތަކާ ވަނީ ކުރިމަތިވެފަ އެވެ. އަދި ލަންކާއިން މިހާރު ވަނީ ދަތި ހާލަތުން އަރައިގަތުމުގައި ބައިނަލްއަގުވާމީ އެހީއަށް އެދިފަ އެވެ.
ބޭ އޮފް ބެންގަލްގައި އުފެދުނު ތޫފާނުން ލަންކާއަށް ބޮޑެތި ގެއްލުންތަކެއް ވެފައި ވާއިރު މިއަދު ވަނީ ލަންކާ ހުރަސްކޮށް މިހާރު ވަނީ އިންޑިއާއަށް ނުރައްކާވަން ފަށައިފަ އެވެ. ތޫފާނުގެ ސަބަބުން އިންޑިއާގެ ޗެންނާއީ އެއާޕޯޓުން މިހާރު ވެސް ވަނީ 54 ފްލައިޓެއް ކެންސަލްކޮށްފަ އެވެ. އިންޑިއާގެ މޫސުމާ ބެހޭ އިދާރާއިން ވެސް ބުނީ ކުރިއަށް އޮތް 48 ގަޑިއިރު ތެރޭ ވަރަށް ބޯކޮށް ވާރޭ ވެހި ވައި ގަދަވާނެ ކަމަށެވެ.
ލަންކާއަށް އެރި މި ތޫފާނަކީ 2017 ވަނަ އަހަރު އެ ގައުމުގައި ފެންބޮޑުވެ ބިންގަނޑު ކަނޑައިގެން ދިޔުމުގެ ސަބަބުން 200 އަށް ވުރެ ގިނަ މީހުން މަރުވެ، އެތައް ހާސް ބަޔަކު ގެދޮރު ގެއްލުނު ފަހުން ކުރިމަތިވި އެންމެ ނުރައްކާތެރި ގުދުރަތީ ކާރިސާ އެވެ. -- އޭއެފްޕީ