29 ނޮވެމްބަރ 2025 - 12:37
ރާއްޖޭގައި ބިދޭސީން ގަވައިދާ ހިލާފަށް ހިންގާ ވިޔަފާރިތައް ރިޕޯޓް ކުރަން އިއުލާން ކުރުމުގެ 14 ގަޑިއިރު ތެރޭގައި 29 ތަނެއް ރިޕޯޓްކޮށްފައިވާ ކަމަށް އިކޮނޮމިކް މިނިސްޓްރީން ބުނެފި އެވެ.
ގަވައިދާ ހިލާފަށް ބިދޭސީން އެކި ވިޔަފާރިތައް ފުޅާ ގޮތެއްގައި ހިންގާ ކަމުގެ ޝަކުވާ މާލޭގެ އަވަށްތަކުގެ ރައްޔިތުންނާ އެކު ރައީސް ޑރ. މުހައްމަދު މުއިއްޒު ބާއްވަވަމުން ގެންދަވާ ބައްދަލުވުންތަކުގައި ދަނީ ލިބެމުންނެވެ. ރައްޔިތުންގެ އެ ޝަކުވާތަކަށް ހައްލެއް ހޯދައިދެއްވާނެ ކަމަށް ރައީސް ވިދާޅުވެފައިވެ އެވެ.
އިއްޔެ އިކޮނޮމިކް މިނިސްޓްރީން ވަނީ ގަވައިދާ ހިލާފަށް ބިދޭސީން ހިންގާ ވިޔަފާރިތައް ރިޕޯޓް ކުރަން އާންމުންނަށް ހުޅުވާލައިފަ އެވެ.
އެކަމަށް ހުޅުވާލިތާ 14 ގަޑިއިރު ތެރޭގައި، އިކޮނޮމިކް މިނިސްޓަރު މުހައްމަދު ސައީދު ވިދާޅުވި ގޮތުގައި ގަވާޢިދާ ހިލާފަށް ހިންގާ ކަމަށް ފާހަގަ ކުރެވޭކަމަށް ބުނެ 29 ވިޔަފާރިއެއްގެ ރިޕޯޓު އާއްމު އެކި ފަރާތްތަކުން ކޮށްފައިވާ ކަމަށެވެ.
ސައީދު ވިދާޅުވީ ރައީސް އުފައްދަވާފައިވާ ނޭޝަނަލް ޓާސްކް ފޯސްގެ އޮޕަރޭޝަންތައް މިއަދު މެންދުރުފަހު ފަށާނެ ކަމަށެވެ. އަދި ރިޕޯޓު ކުރެއްވި ވަރަކަށް އެފަދަ ތަންތަން ބަލައި ފާސްކޮށް، ގާނޫނުގައިވާ ގޮތުގެ މަތީން ފިޔަވަޅު އަޅަމުންދާނެ ކަމުގެ ޔަގީންކަން އަރުވާ ކަމަށް އޭނާ ވިދާޅުވި އެވެ.