29 ނޮވެމްބަރ 2025 - 15:31
ބްރެޒިލްގެ ތަރި ނޭމާ އަށް ކުރިމަތިވެފައިވާ މިނިސްކަސް އިންޖަރީއާ ގުޅިގެން ޑޮކްޓަރުންގެ ލަފައާ ދެކޮޅަށް ސަންޓޯސް މިއަދު ކުޅުނު މެޗުގައި ފުލްކޮށް ކުޅެ، އޭނާ ޓީމު މޮޅު ކޮށްދީފި އެވެ.
ލީގުގެ ރެލިގޭޝަން ޒޯނުގައި އޮތް ސަންޓޯސް، ލީގުގެ ފުލުގައި މިހާރު ރެލިގޭޓް ވެފައި އޮތް ސްޕޯޓްއާ ދެކޮޅަށް ކުޅެ މިއަދު މޮޅުވީ 3-0 އިންނެވެ.
މި މެޗުގައި ސަންޓޯސް ފުރަތަމަ ލީޑު ނެގީ ކެޕްޓަން ނޭމާގެ ގޯލަކުންނެވެ. އަދި ދެވަނަ ގޯލަކީ އިދިކޮޅު ކުޅުންތެރިއެއް އަތުން ބައިކޮޅަށް ވަން ގޯލެކެވެ. ދެވަނަ ހާފުގައި ސަންޓޯސްގެ ތިންވަނަ ލަނޑު ޖެހީ ނޭމާ ނަގައިދިން ކޯނަރަކުންނެވެ.
އޭގެ ފަހުން ރެފްރީ ވަނީ ސަންޓޯސް އަށް ޕެނަލްޓީއެއް ވެސް ދޭން ނިންމައިފަ އެވެ. ނަމަވެސް ނޭމާ ޕެނަލްޓީ ޖަހަން ގޮސް ހުއްޓައި ވީއޭއާރު ބެލުމަށް ފަހު ރެފްރީގެ ނިންމުން ބަދަލުކުރި އެވެ.
މި ނަތީޖާއާ އެކު، ސަންޓޯސް ވަނީ ދެ ޕޮއިންޓްގެ ތަފާތަކުން ރެލިގޭޝަން ޒޯނުން މައްޗަށް ޖެހިލައިފަ އެވެ. އެ ޓީމު މިހާތު އޮތީ 41 ޕޮއިންޓާ އެކު 15 ވަނައިގަ އެވެ. ސޯޅަ ވަނައިގައި އޮތް އިންޓަނެސިއޮނާލަށް ވެސް ވަނީ ހަމަ މި އަދަދަށް ޕޮއިންޓް ލިބިފަ އެވެ. ޖުމުލަ 20 ޓީމު ވާދަކުރާ ލީގުގެ ފުލަށް ދާ ހަތަރު ޓީމު ރެލިގޭޓް ވާނެ އެވެ.
"އަހަރެމެންނަށް މިއީ އުނދަގޫ ދަނޑިވަޅެއް، ރެލިގޭޝަނުން ސަލާމަތްވާން މި ކުޅެނީ. މިއީ އަހަރެމެން ބޭނުންވި ގޮތެއް ނޫން. އެކަމަކު ދެން އޮތީ އަހަރެމެން ކުރާ ހިތްވަރެއް. ގޯލްގެ ތަފާތަކީ ވެސް މިވަގުތު އަހަރެމެންގެ ނަތީޖާއަށް އަސަރު ކުރާނެ އެއްޗެއް، އެހެންވެ މި މެޗުން ހޯދުނު ނަތީޖާ ވެސް އަހަރެމެންނަށް ވަރަށް މުހިއްމު،" މެޗަށް ފަހު މީޑީއާއާ ވާހަކަ ދައްކަމުން ނޭމާ ބުންޏެވެ.
ސަންޓޯސް އަށް ބާކީ އޮތީ ލީގުގައި ދެ މެޗެވެ. އެއީ ތާވަލްގެ ފަހަތުން ދެވަނައިގައި އޮތް ޖުވެންޓޫޑް އާއި ތިންވަނައިގައި އޮތް ކްރޫޒޭރޯއާ ދެކޮޅަށް އަންނަ މަހުގެ ފުރަތަމަ ފަހްތާ ކުޅޭ ދެ މެޗެވެ.
އަނިޔާގެ ސަބަބުން މިދިޔަ ހަފުތާގައި ސަންޓޯސް އާއި އިންޓަނެސިއޮނާލް ބައްދަލުކޮށް 1-1 އިން އެއްވަރުވި މެޗުގައި ނޭމާ މަޑުކުރަން ޖެހުނީ ބެންޗުގަ އެވެ. ބާކީ ތިން މެޗުގައި ވެސް ނޭމާ އަށް ނުކުޅެވޭނެ ކަމަށް ޑޮކްޓަރުން ލަފާ ދީފައިވާ ކަމަށް މީޑިއާތަކުން ރިޕޯޓް ކުރި އެވެ. ނަމަވެސް އޭނާ މި މެޗުގައި ކުޅުނީ ޑޮކްޓަރުންނާ ދެކޮޅު ހަދާފައި ނޫން ކަމަށް ނޭމާ ބުނެ އެވެ.
"ހަގީގަތުގައި ކަންކަން ދަނީ އެންމެ ރަނގަޅަކަށް ނޫން،" އުމުރުން 33 އަހަރުގެ ނޭމާ ބުންޏެވެ.
"އަހަރެން މި މެޗުގައި ކުޅެން ނުވަތަ ނުކުޅެން ނިންމުމަކީ ކްލަބްގެ އެތެރޭގެ ކަމެއް. އަހަރެން އަހަރެންގެ ކެރިއަރު ނުރައްކަލުގެ ތެރެއަކަށް ނުލާނަން އަދި މެޗު ކުޅުނީ ޑޮކްޓަރުންނާ ދެކޮޅަކަށް ވެސް ނޫން. އަހަރެން މި މަސައްކަތް ކުރެވޭތޯ ބަލަނީ އަހަރެންނާއި ސަންޓޯސް އަށް ވެސް އެންމެ ރަނގަޅުވާނޭ ގޮތަށް."
ކުރިން ބާސެލޯނާ އާއި ޕީއެސްޖީ އަށް ވެސް ކުޅުނު ނޭމާ އަށް މި އަހަރު އަނިޔާތަކާ ގުޅިގެން ސަންޓޯސްއާ އެކު، މިހާތަނަށް ކުޅެން އޮތް ލީގުގެ 36 މެޗުގެ ތެރެއިން ކުޅެވުނީ 18 މެޗުގަ އެވެ.