29 ނޮވެމްބަރ 2025 - 06:23
ތޫފާން ދީތުވާގެ ސަބަބުން ސްރީ ލަންކާއަށް ގަދަޔަށް ވިއްސާރަކުރަމުން ދާއިރު ގައުމުގެ އެކި ހިސާބުތަކުގައި ބޮޑުވެފައިވާ ފެންގަނޑުތައް އަދިވެސް އިތުރަށް ބޮޑުވަމުން ދާއިރު އެކި ހާދިސާތަކުގައި މަރުވި މީހުންގެ އަދަދު 69 އަށް އަރައިފި އެވެ.
ސިފައިން ނުކުމެ މީހުން ސަލާމަތްކުރުމުގެ މަސައްކަތް ފުޅާކޮށްފައި ވާއިރު 34 މީހަކު ގެއްލިގެން ވެސް ވަނީ ރިޕޯޓްކޮށްފަ އެވެ.
ސިފައިން ގެންދަނީ ހެލިކޮޕްޓަރާއި ކުދި ބޯޓުތަކާއި ގޮސް، ގަސްގަހުގެ ކުރިއަށް އަރައި ތިބި މީހުންނާއި ފުރާޅުތަކުގެ މަތިން އަދި ދުރު އަވަށްތަކުން މީހުން ސަލާމަތްކުރަމުންނެވެ.
ޑިޒާސްޓާ މެނޭޖްމަންޓް ސެންޓަރު (ޑީއެމްސީ) އިން ބުނީ މަރުވި މީހުންގެ އަދަދު މައްޗަށް ދިޔައީ ތޫފާނުގެ އަސަރު އެންމެ ބޮޑަށް ކުރަމުންދާ ހިސާބުތަކުން މަރުވެފައިވާ އިތުރު ބައެއްގެ ހަށިތައް ފެނުމުން ކަމަށެވެ. މީގެ ތެރެއިން ގިނަ މީހުން މަރުވެފައިވަނީ ބިންގަނޑު ކަނޑައިގެން ގޮސް، ދިރިތިއްބާ ވަޅުލެވިގެން ކަމަށް ޑީއެމްސީން ބުންޏެވެ.
ޑީއެމްސީން ބުނި ގޮތުގައި ގައުމުގެ ހުރިހާ ހިސާބަކަށް ވެސް ބޯކޮށް ވާރޭ ވެހެމުންދާ ކަމަށާއި ބައެއް ހިސާބުތަކަށް މިދިޔަ 24 ގަޑިއިރު ތެރޭ 360 މިލިމީޓަރުގެ ވާރޭ ވެހިފައިވާ ކަމަށެވެ.
ވެރިރަށް ކޮލަމްބޯ ކައިރީގައި އޮންނަ، އިންޑިއާ ކަނޑާ ގުޅިފައިވާ ކެލާނީ ރިވަ ވެސް އިއްޔެ ފުރިގެން ބަންޑުންވާން ފަށާފައި ވާއިރު ކޮލަމްބޯގައި ވެސް ދުވަހަކު ވެސް ފެން ބޮޑުނުވާ ވަރަށް ބޮޑުވެދާނެ ކަމުގެ އިންޒާރު ވަނީ ދީފަ އެވެ.
ފެންބޮޑުވުމާއި ކިސަޑު ފޭބުމުގެ ސަބަބުން 3،000 އަށް ވުރެ ގިނަ ގެޔަށް ގެއްލުންވެ، 18،000 އަށް ވުރެ ގިނަ މީހުން ވަނީ ވަގުތީ ހިޔާތަކަށް ބަދަލުކޮށްފަ އެވެ.
ޑީއެމްސީން ބުނީ އިންޑިއާގެ ދެކުނުގެ ސްޓޭޓެއް ކަމަށްވާ ޓެމިލް ނާޑޫއާ ދިމާއަށް ތޫފާނު ދަތުރުކުރަމުން ދާއިރު މާދަމާގެ ނިޔަލަށް ލަންކާއަށް ވިއްސާރަކުރާނެ ކަމަށާއި އެހެންވެ ނުރައްކާ އަދިވެސް ވަރަށް ބޮޑު ކަމަށެވެ. -- އޭއެފްޕީ