24 ނޮވެމްބަރ 2025 - 20:10
ބަލި ކުއްޖަކު ހިމެނޭހެން ފަސް ކުދިން ބަލަމުން އަންނަ އެކަނިވެރި މަޔަކަށް ޒަކާތުން ހައްގު ނުވާ ކަމަށް ނިންމީ އެކައުންޓުގައި ފައިސާ ދައުރުވާތީ ކަމަށް އިސްލާމިކް މިނިސްޓްރީން ބުނި ކަމަށް ތުހުމަތުކޮށް އަންހެނަކު ދެއްކި ވާހައަކަށް އިސްލާމިކް މިނިސްޓަރު ޑރ.މުހައްމަދު ޝަހީމް ރައްދު ދެެއްވައި، އެ މީހާގެ ބޭންކުގެ ތަފުސީލު މިއަދު ސޯޝަލް މީޑިއާގައި އާންމު ކުރައްވައިފި އެވެ.
ޒަކާތު ފަންޑުން އެހީނުވި ކަމުގެ ޝަކުވާ އައިޝާ ނަމަކަށް ކިޔާ އަންހެނަކު އުފުލީ ވިލިމާލޭ ރައްޔިތުންނާ އެކު ރައީސް ޑރ. މުހައްމަދު މުއިއްޒު ރޭ ބޭއްވެވި ބައްދަލުވުމުގަ އެވެ. އެ ބައްދަލުވުމުގައި. މިނިސްޓަރު ޝަހީމް ވެސް ބައިވެރިވެޑައިގެންނެވި އެވެ.
އެ ބައްދަލުވުމުގައި ހިޔާލުފާޅުކުރަން ދިން ފުރުސަތުގައި އައިޝާ ބުނީ ވަރަށް ހާލުގައި ފަސް ދަރިން ބަލަމުން އަންނަ އިރު އޭނާ އަށް ވަޒީފާއެއް ލިބުނުތާ އަދިވީ ހަމަސް ދުވަސް ކަމަށެވެ. އެ އާއިލާގެ ނިކަމެތި ހާލަތު ހުރި ގޮތް ކަމަށް ބުނާ ގިނަ ތަފްސީލުތަކެއް އޭނާ ހާމަކުރި އެވެ.
އޭނާގެ ވާހަކަތައް ހިމެނޭ ވީޑިއޯއާ އެކު ފޭސްބުކް ގައި ކުރެއްވި ޕޯސްޓެއްގައި ޝަހީމް މިއދު ވިދާޅުވީ އެހީއަކަށް އެދުމުން އޭނާއަށް ޒަކާތު ހައުސް އިން މިދިޔަ ސެޕްޓެމްބަރު މަހު 15،500ރ. ދިން ކަމަށެވެ. އޭނާ ފަގީރުންގެ ލިސްޓަށް ނާރަނީ އެކަނިވެރި މައިންގެ އިނާޔަތް ލިބޭ މީހަަކަށް ވެފައި، ވަޒީފާ އިން ލިބޭ މުސާރައާ އެކު މަހަކު 22،000.ރ ގެ އާމްދަނީ އެއް ލިބޭތީ ކަމަށް ވެސް އެ ޕޯސްޓްގައި މިނިސްޓަރު ވިދާޅުވި އެވެ.
"އަދި އޭނާގެ އަތުގައި 75،000 ރުފިޔާ އެބަހުރި ކަމަށް، މި މީހާގެ ވާހަކައާ ގުޅިގެން ބެލި ބެލުމުން، މޯލްޑިވްސް ޒަކާތު ހައުސް އިން ދެއްވި މައުލޫމާތުގެ ކުޑަ މިންވަރެއް މި ދެންނެވީ،" އެ ޕޯސްޓްގައި ޝަހީމް ލިއުއްވާފައި ވެ އެވެ.
ނަމަވެސް އެ މީހާގެ އަމިއްލަ ބޭންކު އެކައުންޓުގައި ހުރި ފައިސާގެ އަދަދު ހޯއްދެވި ގޮތެއް މިނިސްޓަރު ވިދާޅެއް ނުވެ އެވެ.