24 ނޮވެމްބަރ 2025 - 19:03
ކުރީގެ ރައީސް އިބްރާހީމް މުހައްމަދު ސޯލިހާއި ކުރީގެ ރައީސް މުހައްމަދު ނަޝީދު ވެސް 2028 ވަނަ އަހަރުގެ ރިޔާސީ އިންތިހާބުގައި ވާދަކުރަން ރަނގަޅުނޫން ކަމަށް ވިދާޅުވެ، ނަޝީދު ފެއްޓެވި "ޑައިލޮގް" އާ އެކު އެމްޑީޕީގެ ލީޑަޝިޕްގައި ނުތަނަވަސްކަން އުފެދިއްޖެ އެވެ.
އެމްޑީޕީގެ ގައުމީ މަޖިލީހުގެ މިހާރުގެ މެންބަރުންނާއި ކުރީގެ މެންބަރުން ތިއްބަވާ ވަޓްސްއެޕް ގްރޫޕަކަށް ނަޝީދު ފޮނުއްވި މެސެޖެއްގައި ވިދާޅުވީ 2028 ގެ ރިޔާސީ އިންތިހާބުގައި އެ ދެ ބޭފުޅުން ވާދަކުރެއްވުމުގެ ބަދަލުގައި އެހެން ބޭފުޅަކަށް ފުރުސަތު ދިނުން ރަނގަޅު ކަމަށެވެ. އެއާ އެކު އެ މަނިކުފާނު ވިދާޅުވީ 2023 ގެ ރިޔާސީ އިންތިހާބުގައި ނަޝީދު ވާދަނުކުރައްވާ، ސޯލިހަށް ފުރުސަތުދެއްވަން ދެ ފަހަރަށް ހުށަހެޅުއްވި ކަމަށާއި އެހެން ނަމަވެސް ސޯލިހާއި އަރިސްބޭފުޅުންނަށް އެ ގޮތް ކަމުނުދިޔައީ ކަމަށެވެ.
"އެގޮތް ކަމު ނުގޮސް އަޅުގަނޑުމެންނާ ނުލާ އިންތިހާބު ކާމިޔާބުވާނެ ކަމަށް މާ ބޮޑަށް ދެކެވި މުޅި ކަން ހަރާބުވީ،" ނަޝީދު ވިދާޅުވި އެވެ.
ނަޝީދު އެހެން ވިދާޅުވީ އެމްޑީޕީގެ ޗެއާޕާސަންކަމުން މިއަދު އިސްތިއުފާދެއްވި ފައްޔާޒް އިސްމާއީލް ދެއްކެވި ވާހަކައަކާ ހަވާލާ ދެއްވަ އެވެ.
ނަޝީދު އެހެން ވިދާޅުވުމުން ސޯލިހު އެ ދެބޭފުޅުންނަށް ވެސް ރައްދު ދެއްވައި ވިދާޅުވީ 2023 ވަނަ އަހަރުގެ ރިޔާސީ އިންތިހާބާ ބެހޭ ގޮތުން "ދެކެވުނު ވާހަކަތައް ކަމަށް ބުނެ މިތާ މި ދެކެވެނީ އޭގެ އެއްބައި" ކަމަށެވެ.
"އޭގެ ހުރިހާ ތަފްސީލުތަކެއް ނުދައްކައި އަޅުގަނޑު މި މަޑުކުރަނީ މަސްލަހަތަށްޓަކައި،" ސޯލިހުގެ މެސެޖްގައި ވިދާޅުވި އެވެ.
ހަމަ އެ މެސެޖްގައި އެ މަނިކުފާނު ވިދާޅުވީ މިއީ އެންމެން އެކުގައި ޕާޓީއައިގެން ކުރިއަށްދާންވީ ވަގުތު ކަމަށެވެ.
ސޯލިހުގެ އެ ވާހަކަފުޅަށް އެ ގްރޫޕްގައި ފައްޔާޒު ރައްދު ދެއްވި އެވެ. ފައްޔާޒް ވިދާޅުވީ 2023 ވަނަ އަހަރުގެ ރިޔާސީ އިންތިހާބުގެ ކަންތަކުގައި ނަޝީދާއި ސޯލިހު އާ ދެމެދު އޭނާ މެދުވެރިވެގެން ދެކެވުނު ވާހަކަތަކާ މެދު ސޯލިހު ވިދާޅުވާ ވާހަކައެއް ނަމަ އެެއީ "ކަނޑައެެޅިގެން އިތުރުުފުޅެއް" ކަމަށެވެ.
"ކޮންމެވެސް ވަރަކަށް ސިޔާސީ ކަންކަމުގައި ވެސް، އޮނާ އަމަންގް ތީވްސް އޭ ބުނާ ގޮތަށް ކަންކަން ގެންގުޅުއްވުން ރަނގަޅު،" ފައްޔާޒްގެ މެސެޖްގައި ވިދާޅުވެފައި އޮތެވެ.
"އޮނާ އަމަންގް ތީވްސް" އަކީ އާންމުކޮށް އެހެން މީހުންނަށް ކެހިވެރިވާ ކުށްވެރިންގެ މެދުގައިވެސް އެ މީހުންގެ މެދުގައި ވަކި ހަމަތަކަކާއި އިތުބާރާއި ތެދުވެރިކަމުގެ އުސޫލުތަކަކަށް ތަބާވާކަމަށް އިނގިރޭސިބަހުގައި ބުނެ އުޅޭ މިސާލު ބަހެކެވެ.