24 ނޮވެމްބަރ 2025 - 10:35
ދިވެހި ޕްރިމިއާ ލީގުގެ ތާވަލުގެ ފުލުގައި އޮތް ދެ ޓީމު ގްރީން ސްޓްރީސް އާއި ޓީސީ ކުޅުނު މެޗު 2-2 ން އެއްވަރުވެގެން ނިމިއްޖެ އެވެ.
ގައުމީ ފުޓްބޯޅަ ދަނޑުގައި ރޭ ކުޅުނު މެޗުގައި ދެ ފަހަރަށް ގްރީން ސްޓްރީޓްސްއިން ލީޑް ނެގި އެވެ. އެކަމަކު ކޮންމެ ފަހަރަކު ވެސް ޓީސީން ނަތީޖާ ހަމަހަމަ ކުރި އެވެ.
ޕޮއިންޓޤގެ ގޮތުން ވެސް ޓީސީ އާއި ގްރީން ހަމަހަމަ އެވެ. ދެ ޓީމަށް ވެސް ފަސް ޕޮއިންޓެވެ. އެ ދެ ޓީމަށް ވުރެ ފަހަތުގައި މިހާރު އޮތީ ހަތަރު ޕޮއިންޓާ އެކު އޮތް ޔުނައިޓެޑް ވިކްޓަރީ އެވެ.
ރޭގެ މެޗަށް ޓީސީގެ ކޯޗު އަހްސަން ރަޝީދު ސަސްޕެންޑް ކޮށްފައި ހުރުމުން، ޓީމުގެ ބެންޗުން ލީޑް ކުރީ އެސިސްޓެންޓް ކޯޗު މަރްޔަމް މިރުފަތެވެ.
ގްރީން އަށް ފުރަތަމަ ލަނޑު މެޗުގެ ނުވަ މިނެޓްގައި ޖެހީ މުހައްމަދު ސާގިބް އެވެ. ޓީސީގެ ފަހަތުން އެ ޓީމުގެ ޑިފެންޑަރު މުހައްމަދު ޔަޒްދާން ހުސައިން އަށް ހެދުނު ގޯހުގައި އޭނާގެ އަތުން ބޯޅަ ހޯދައިގެން ގޮސް އޭރިއާ ތެރެއަށް ވަދެ ސާބިގް އެ ބޯޅަ ފޮނުވާލީ ގޯލްގެ ތެރެއަށެވެ.
ޓީސިގެ ކީޕަރު މިސްރުގެ މުހައްމަދު ހަސަން ދިނުމުން، ޔަޒްދާން ބޯޅަ ކޮންޓްރޯލް ވެސް ކުރި އެވެ. އެކަމަކު އޭނާ އަތުން ސާބިގް ބޯޅަ ހޯދި އެވެ.
ޓީސީން ނަތީޖާ ހަމަހަމަ ކުރީ ވެސް ގްރީންގެ ޑިފެންސަށް ހެދުނު މިސްޓޭކުގަ އެވެ. ގްރީންގެ އޭރިއާގެ ބޭނުން ބޯޅަ ހިފައިގެން ކުރިއަށް ދާން އެ ޓީމުގެ ޑިފެންޑަރު މަސައްކަތް ކުރި އެވެ. ޓީސީގެ ގާނާގެ ފޯވާޑް ޕްރިންސް ބޯޑޫ ބޯޅަ ހޯދައިގެން އޭރިއާ ތެރެއަށް ވަދެ ގޯލްގެ ތެރެއަށް ބޯޅަ ފޮނުވާލި އެވެ.
ފުރަތަމަ ހާފު ނިމުމުގެ ކުރިން ރިލްވާން ވަހީދު (ކަކާ ރިލޭ) ގްރީން އަށް އަލުން ލީޑް ނަގައި ދިނެވެ.
ސެންޓަސާކަލް ތެރެއިން ގްރީންގެ ހާފުގެ ތެރެއިން އެ ޓީމުގެ ޑިފެންޑަރު އިބްރާހިމް ހަސީބު ބާރުބާރަށް ފޮނުވާލީ ސީދާ ޓީސީގެ އޭރިއާގެ ތެރެއަށެވެ. އެ ބޯޅަ ދިފާއުކުރަން ޓީސީގެ ކީޕަރު މުހައްމަދު ހަސަން މަސައްކަތް ކުރި އެވެ.
އޭނާ އަތުން ދިފާއު ކުރަން އުޅުނު ބޯޅަ ރީބައުންސްވގެން ގޮސް ވެއްޓުނީ އޭރިއާގެ ތެރެއަށެވެ. ރިލޭ ބޯޅަ ފޮނުވާލީ ހުހަށް އޮތް ގޯލްގެ ތެރެއަށެވެ.
ދެވަނަ ހާފަށް ނުކުމެ ހަ ވަނަ މިނެޓްގައި ޓީސީން ނަތީޖާ ހަމަހަމަ ކުރި ލަނޑު ޖެހީ މުހައްމަދު ދާނިޝް އެވެ.