24 ނޮވެމްބަރ 2025 - 10:50
ރާއްޖޭގެ ސިޔާސީ ޕާޓީތަކަށް، އެއްވެ އުޅުމުގެ މިިނިވަންކަން މުހިއްމު ވަނީ ވެރިކަމުގައި ނޯންނަ އިރު ކަމަށާއި އެކަމުގައި އިހުލާސްތެރި އެއް ބަޔަކު ވެސް ނެތް ކަމަށް ރައްޔިތުންގެ މަޖިލީހުގެ އޭދަފުށި ދާއިރާގެ ޕީއެންސީ މެންބަރު އަހުމަދު ސަލީމް (ރެޑްވޭވް ސަލީމް) މިއަދު ވިދާޅުވެއްޖެ އެވެ.
މުޒާހަރާ އާއި ހަޅުތާލުކުރުމުގެ ހައްގަށް، ސުލްހަވެރިކަމާ އެކު އެއްވެ އުޅުމުގެ ގާނޫނުން އަޅާފައިވާ ހުރަސްތައް އުވާލަން ގަލޮޅު އުތުރު ދާއިރާގެ އެމްޑީޕީގެ މެންބަރު މީކާއީލް އަހުމަދު ނަސީމް ހުށަހަޅުއްވާފައިވާ އިސްލާހަށް މަޖިލީހުގެ މިއަދުގެ ޖަލްސާގައި ކުރި ބަހުސްގައި ސަލީމް ވިދާޅުވީ، ކޮންމެ ބަޔަކަށް ވެސް ބާރު ލިބުމާ އެކު، ގާނޫނުއަސާސީ ވެސް "ފުރޮޅާލާ" ކަމަށާއި އެހެން އެތައް ބަދަލެއް ވެސް ގެންނަ ކަމަށެވެ. އިދިކޮޅުގައި ތިބޭ އިރު "މި ހުރިހާ އެއްޗެއް ވެސް" [އެއްވެ އުޅުމުގެ މިނިވަންކަން މިހާރަށް ވުރެ ބޮޑުކޮށް އޮތުން] ވެސް ޕާޓީތަކަށް ރަނގަޅު ކަމަށް އޭނާ ވިދާޅުވި އެވެ.
އެމްޑީޕީގެ ވެސް އިހުލާސްތެރިކަމެއް ހުރި ނަމަ ސުލްހަވެރިކަމާ އެކު އެއްވެ އުޅުމުގެ މިނިވަންކަމުގެ ގާނޫނު ފަދަ ހުރިހާ ކަމެއް އެ ޕާޓީ އަށް ވެރިކަމާއި ރައްޔިތުންގެ މަޖިލީހުގެ މެޖޯރިޓީ އޮތް ދުވަސްވަރު އިސްލާހު ކުރީސް ކަމަށް ސަލީމް ވިދާޅުވި އެވެ.
"އެހެންވީމާ އެއްގޮތަކަށް ވެސް މި ވާހަަ ދައްކަނީ އިހުލާސްތެރި ކަމެއް އޮވެގެނެއް ނޫން. ހަމަ ކޮން ބައެއް ވެސް އެ ބައެއްގެ އަމިއްލަ އެދުމުގެ މައްޗަށް މި ވާހަކަ ދައްކަނީ. އެހެންވީމާ އެ ވާހަކަ ނުދައްކަމާ ހިނގާ. ނުދައްކައި އެ ބަޔަކު ބޭނުން ގޮތަކަށް ކަން ކުރީމާ އެ ނިމުނީނު؟،" ސަލީމް ވިދާޅުވި އެވެ.
"މިއީ ނޫންތޯ މިކަން ކުރާ ގޮތަކީ؟ ކީއްކުރަންތޯ މި ވާހަކަ ދައްކަނީ؟ ކޮންމެ ބަޔަކަށް ވެސް ވެރިކަން ނުލިބޭހާ ހިނދެއްގައި މި ހުރިހާ ސަކަރާތެއް ޖަހަމުންދާނެ."
ކޮންމެ ބަޔަކު ވެސް ވެރިކަން ލިބޭ އިރަށް އަނެއް އަތަށް ޖަހާ ކަމަށް ވެސް ސަލީމް ވިދާޅުވި އެވެ. މިހާރު އިިދިކޮޅުގައި ތިބި މީހުން މާދަމާ ވެސް ވެރިކަަމަށް އަތުވެއްޖެ ނަމަ ހުރިހާ ކަމެއް އަނެއް ކޮޅަށް [އެއްވެ އުޅުމުގެ މިނިވަންކަން ހަނިވާ ގޮތަށް] ކަންތައްތައް ބަދަލުކުރާނެ ކަމަށް ސަލީމް ވިދާޅުވި އެވެ.
"އެހެންވީމާ މި ވާހަކަ އަަޅުގަނޑުމެން. ނުދައްކާ ހިނގާ އެ ބައެއްގެ ސަރުކާރު އައިމާ އެބަޔަކަށް ފެންނަ ގޮތަށް ރަނގަޅަށް ހިންގަމާ. ރަނގަޅަށް ހިންގާފައި އެ ރަނގަޅު ނޫނިއްޔާ ރައްޔިތުން ބަދަލުކުރާނެ،" ސަލީމް ވިދާޅުވި އެވެ.
ސުލްހަވެރިކަމާ އެކު އެއްވެ އުޅުމުގެ ގާނޫނުގެ ނަމުގައި ގާނޫނެއް ފާސްކުރީ ކުރީގެ ރައީސް އަބްދުﷲ ޔާމީނުގެ ވެރިކަމުގައި އޭރު ވެރިކަން ކުރި ޕީޕީއެމަށް މަޖިލީހުގެ މެޖޯރިޓީ އޮވެގެންނެވެ. އޭގެ ފަހުން، އެމްޑީޕީ އަށް ވެރިކަމާއި މަޖިލީހުގެ މެޖޯރިޓީ ލިބިފައި ވަނިކޮށް، އެ ގާނޫނު އުވާލަން ކާށިދޫ ދާއިރާގެ އޭރުގެ އަމިއްލަ މެންބަރު އަބްދުﷲ ޖާބިރު ހުށަހެޅުއްވި އެވެ. ނަމަވެސް 19 ވަަނަ މަޖިލީހުގެ ދައުރު ނިމެންދެން ވެސް އެ ހުށަހެޅުން އޮތީ މަޖިލީހުގެ ކޮމިޓީއެއްގައި ޕާކް ކޮށްފަ އެވެ.
މިއަދުގެ ޖަލްސާގައި ސަލީމްގެ ކުރިން ވާހަކަ ދައްކަވަމުން، ބިލު ހުށަހެޅުއްވި މެންބަރު މީކާއީލް ވެސް ވިދާޅުވީ އެއްވެ އުޅުމުގެ މިނިވަންކަން ފުޅާކޮށް ބާއްވަން ކޮންމެ ޕާޓީއަކުން ވެސް ބޭނުން ވަނީ ވެރިކަން ގެއްލުމުން ކަމަށެވެ. ނަަމަވެސް އެ ގާނޫނު އުވާލަން ހުށަހަޅުއްވަން ކެރިވަޑައިގަތީ އެ ގާނޫނު އުވާލަން ކުރިން ވެސް ހުށަހެޅި ކޮންމެ ފަހަރަކު އެކަމަށް ތާއީދުކޮށް ވޯޓުދީފައި ވާތީ ކަމަށް ވެސް އޭނާ ވިދާޅުވި އެވެ.