އެމްޑީޕީގެ އެތެރޭގައި ހުރި ހިޔާލު ތަފާތުވުންތަކުގެ ސަބަބުން ސަރުކާރު ޖަވާބުދާރީ ނުކުރެވޭ: ފައްޔާޒް
އެމްޑީޕީގެ އެތެރޭގައި ހުރި ހިޔާލު ތަފާތުވުންތަކުގެ ސަބަބުން ސަރުކާރު ޖަވާބުދާރީ ނުކުރެވޭ: ފައްޔާޒް

އެމްޑީޕީގެ މެމްބަރުންގެ މެދުގައި ހުރި ހިޔާލު ތަފާތުވުންތަކުގެ ސަބަބުން ސަރުކާރު ޖަވާބުދާރީ ކުރުވުމަށް އިދިކޮޅު ޕާޓީއެއްގެ ޒިންމާ އެންމެ ފުރިހަމައަށް އަދާނުކުރެވޭ ކަމަށް އެ ޕާޓީގެ ޗެއާޕާސަންގެ މަގާމުން ރޭ އިސްތިއުފާ ދެއްވި ފައްޔާޒް އިސްމާއިލް ވިދާޅުވެއްޖެ އެވެ.

މީޑިއާ އަށް ބަންދު ކޮށްގެން ރޭ ބޭއްވި އެމްޑީޕީގެ ގައުމީ މަޖިލިހުގެ ބައްދަލުވުމަށް ފަހު، ފައްޔާޒް ހުށަހެޅުއްވި އިސްތިއުފާގެ ސިޓީގައި ވިދާޅުވީ 2028 ވަނަ އަހަރުގެ ރިޔާސީ އިންތިހާބުގައި އެ ޕާޓީގެ ފަރާތުން ވާދަކުރުމުގެ ޝައުގުވެރިކަން އޭނާ ފާޅުކުރައްވާފައިވާ ކަމަށާއި އޭނާއަކީ އެ ޕާޓީގެ ފަރާތުން އެ ޝައުގުވެރިކަން ރަސްމީކޮށް މިހާތަނަށް ފާޅުކުރެއްވި ހަމައެކަނި ބޭފުޅާ ކަމަށެވެ. އެ ޓިކެޓަށް ޝައުގުވެރިވާ އެހެން ބޭފުޅުން ވެސް ޕާޓީގައި ތިއްބެވުމުގެ ސަބަބުންނާ އެކު، ޕާޓީގެ މަސައްކަތްތައް ކުރިއަށް ގެންދިއުމުގައި ގިނަ ގޮންޖެހުންތައް ކުރިމަތިވާ ކަމަށް ފައްޔާޒް ވިދާޅުވި އެވެ.

ރިޔާސީ ޓިކެޓަށް ޝައުގުވެރިކަން ފާޅުކުރުންވީ އެ ޕާޓީން ކުރާ ކަންކަމާ މެދުގައި އާންމު މެމްބަރުން ސުވާލު އުފައްދަން މެދުވެރިވި ކަމަކަށް ކަމަށް ވެސް ފައްޔާޒް ވިދާޅުވި އެވެ.

ފައްޔާޒް ވިދާޅުވީ ރައީސް ޑރ. މުހައްމަދު މުއިއްޒުގެ ސަރުކާރާ ދެކޮޅަށް އިދިކޮޅު ޕާޓީއެއްގެ ގޮތުގައި މިދިޔަ ދެ އަހަރު ދުވަހުގެ ތެރޭގައި ގިނަ މަސައްކަތްތަކެއް އެމްޑީޕީން ކުރި ނަމަވެސް، އެތެރޭގެ ހިޔާލު ތަފާތުވުންތަކުގެ ސަބަބުން އެ ޕާޓީގެ މެމްބަރުންގެ މެދުގައި ވަރަށް ބޮޑު ނުތަނަވަސްކަމެއް އުފެދޭ މަންޒަރު ފެނިވަޑައިގަންނަވާ ކަމަށެވެ. އޭގެ ސަބަބުން ޕާޓީގެ މަސައްކަތްތަކަށް ހުރަސްއެޅޭ ކަމަށް އޭނާ ވިދާޅުވި އެވެ.

"ގައުމީ މަޖިލީހުގެ މެމްބަރުން، އަޅުގަނޑުގެ އަމިއްލަ މަސްލަހަތަށް ވުރެ ގައުމާއި ޕާޓީގެ މަސްލަހަތު އަބަދުވެސް އިސްކުރާނަމެވެ،" ފައްޔާޒްގެ ސިޓީގައި ވިދާޅުވި އެވެ.

ފައްޔާޒް ވިދާޅުވި ގޮތުގައި، ޗެއާޕާސަންގެ މަގާމުން އޭނާ އިސްތިއުފާ ދެއްވީ ޕާޓީގައި މިހާރު ވެސް އިސްކޮށް އުޅުއްވާ އެޑްވައިޒަރާއި ޕާޓީގެ ރައީސްގެ ފުރިހަމަ ބާރާ އެކު، ޕާޓީގެ ކަންކަން ނިންމައި، ކަންކަން ކުރިއަށް ގެންދިއުމަށް އޭނާއަކީ ހުރަހެއް ކަމަށް ދެކޭ ގޮތް ނިމުމަކަށް ގެނައުމަށް ގަސްދު ކުރައްވާތީ އެވެ.

އެމްޑީޕީން މިހާރު ތަހައްމަލުކުރަމުންދާ ދަތި ކަންކަމުގެ އަލީގައި، އެ ޕާޓީގެ އޮނިގަނޑަށް ގެންނަ ބަދަލުތަކުގެ ތެރޭގައި "ޕާޓީގެ ރޯޑްމެޕް"ގައި ފާހަގަކޮށްފައިވާ ގޮތަށް ޕާޓީގައި އެއް ލީޑަރު ހުންނަ ގޮތަށް އަސާސީ ގަވާއިދު ބަދަލުކުރުމަކީ މުހިންމު ކަމެއް ކަމަށް ފައްޔާޒް ވިދާޅުވި އެވެ.

"އެއް އުރައެއްގައި ތިން ކަނޑިއަކަށް ނޯވެވޭނެ އެވެ،" އޭނާ ވިދާޅުވި އެވެ.

ފައްޔާޒް ވިދާޅުވީ ޕާޓީގެ ލީޑަރަކީ ދައުލަތުގެ އެއްވެސް މަގާމަކަށް ވާދަނުކުރެވޭ މީހަކަށް ވުމާއި އޭނާގެ ހުރިހާ ވަގުތެއް ޕާޓީ ހިންގުމުގައި ހުންނަ މީހަކަށް ވާން ޖެހޭ ގޮތަށް އަސާސީ ގަވާއިދު ބަދަލުކުރަން ޖެހޭ ކަމަށެވެ. ކުރީގެ ރައީސް މުހައްމަދު ނަޝީދާއި ކުރީގެ ރައީސް އިބްރާހިމް މުހައްމަދު ސޯލިހު (އިބޫ() އާ ދެމެދު އުފެދުނު ހިޔާލު ތަފާތުވުންތަކުގައި ޕާޓީން ވަކިވި މެމްބަރުންނާ އެކު، އަނެއްކާވެސް އެކުގައި މަސައްކަތްކޮށް މި ގައުމު ވެއްޓިފައި އޮތް އަނދަވަޅު ސަލާމަތްކުރަން މަސައްކަތްކުރަން ޖެހޭ ކަމަށް ވެސް އޭނާ ވިދާޅުވި އެވެ.

"ހިތާމައަކީ، މިހާރު ވެސް ފެންނަމުން ދަނީ އަޅުގަނޑުމެންގެ ތެރޭގައި ގައުމާއި ޕާޓީގެ މަސްލަހަތުގެ މައްޗަށް ހިތުގައި ޖެހިފައިވާ ޖެހުމަށް ތަސައްލީއެއް ހޯދުމަށް ބުރަވާ މަންޒަރެވެ. ސިޔާސީ ލީޑަރުން ވާން ޖެހޭނީ މިފަދަ އިހުސާސްތަކުން އަރައިގަނެ ރައްޔިތުންގެ ހައްގުތައް ހޯދާނެ ބަޔަކަށެވެ. އަދި އާންމު މެމްބަރުންނަށް މި މަގު ދައްކައިދޭ ބަޔަކަށެވެ. އެ ލީޑަރުންނަކީ ތި ބޭފުޅުންނެވެ. ތި ބޭފުޅުންނާ އެކު، އެ މަސައްކަތް ކުރަން ތިއްބެވީ މި ޕާޓީގެ ހިތްވަރުގަދަ އާންމު މެމްބަރުންނެވެ،" ފައްޔާޒް ވިދާޅުވި އެވެ.

ފައްޔާޒް ވިދާޅުވީ އެމްޑީޕީގެ މެމްބަރުންނަކީ މުޅި ރާއްޖޭގެ ސިޔާސީ މަޝްރަހު ބަދަލުކޮށް ގައުމާއި ރައްޔިތުންނަށް ހެޔޮ ބަދަލުތަކެއް ގެނެސްދިން ބައެއް ކަމަށާއި އެކަން އަދިވެސް ނުވާންވީ އެއްވެސް ސަބަބެއް ނެތް ކަމަށެވެ.

އެމްޑީޕީގެ ޗެއާޕާސަންގެ މަގާމުން އިސްތިއުފާ ދެއްވަން ގަސްދު ކުރައްވާކަން ރޭގެ ގައުމީ މަޖިލިހުގެ ބައްދަލުވުމުގައި އިއުލާން ކުރައްވަމުން ވެސް ފައްޔާޒު ފާހަގަކުރެއްވީ، އެ ޕާޓީގެ އެތެރޭގެ ކޯޅުމާ ހެދި "އެއްނުވެވޭ" މައްސަލަ އެވެ.

އޭނާ ވިދާޅުވީ، މާޒީގައި ހިތަށްވީ ތަދުގެ ބަދަލު ހޯދަން އުޅެގެން އެމްޑީޕީ އަށް ކުރިއެރުން ލިބޭ ތަން ފެނިވަޑައިނުގަންނަވާ ކަމަށެވެ.

"އަޅުގަނޑުމެންނަށް ހިތަށްވީ ތަދުގެ ބަދަލު ހޯދަން އުޅެގެންނެއް އަޅުގަނޑުމެންނަކަށެއް ކުރިއެރުމެއް ލިބޭ ތަނެއް އަޅުގަނޑަކަށް ނުފެނޭ. އަޅުގަނޑު ގަބޫލުކުރާ ގޮތުގައި ސިޔާސީ ލީޑަރުންނަކީ އެ ކަހަލަ އިހުސާސްތަކުގެ މައްޗަށް އެރެން ޖެހޭނެ ބައެއް. އެ އިހުސާސްތަކުގެ މައްޗަށް އަރައި ގައުމާއި ރައްޔިތުންނަށް ފައިދާވާނެ ނިންމުންތަކެއް ނިންމަން ޖެހޭނެ ބައެއް. އެ ލީޑަރުންނަކީ ތިޔަބޭފުޅުން،" ގައުމީ މަޖިލިހުގެ ރޭގެ ބައްދަލުވުމަށް ހާޒިރުވި ފަސްދޮޅަހަކަށް މެމްބަރުންނަށް އިޝާރާތް ކުރައްވަމުން ފައްޔާޒު ވިދާޅުވި އެވެ.