24 ނޮވެމްބަރ 2025 - 09:45
އިންޑިއާގެ ބެންގޫލުގައި ބޭންކަކުން ވެހިކަލެއްގައި ފައިސާ ހިފައިގެން ދަނިކޮށް މަރުކަޒީ ބޭންކުގެ އޮފިޝަލުން ކަމަށް ހެދިގެން ތިބި ބަޔަކު ގޮސް ވެހިކަލް ހުއްޓުވައި އޭގައި ހުރި 70 މިލިއަން ރުޕީސް (800،000 ޑޮލަރު) ފޭރުނުތާ ތިން ދުވަސް ފަހުން މީހުން ހައްޔަރުކޮށް ފައިސާގެ ބޮޑު ބައެއް ހޯދައިފި އެވެ.
ދިވެހި 12 މިލިއަނަށް ވުރެ ރުފިޔާގެ އަގުހުރި ފައިސާ ފޭރުނު މައްސަލައިގައި ހަތް މީހަކު ހައްޔަރުކޮށް 57.6 މިލިއަން ރުޕީސް މިހާރު ހޯދާފައިވާ ކަމަށް ބެންގަލޫރު ފުލުހުން ހޮނިހިރު ދުވަހު ވަނީ ބުނެފަ އެވެ.
ބެންގަލޫރު ޕޮލިހުންގެ ކޮމިޝަނަރު ސީމަންތު ކުމާރު ސިންގް އާ ހަވާލާދީ ބީބީސީން ބުނީ ހަތް ވަނަ މީހާ ހައްޔަރުކުރީ ފަހުން ކަމަށާއި އެ މީހާގެ އަތުގައި ހުރި ފައިސާގެ އަދަދު ދެނެގަތުމުގެ މަސައްކަތް މިހާރު ކުރަމުން އަންނަ ކަމަށެވެ. އޭނާ ވިދާޅުވީ އިތުރު ދޭއް ނުވަތަ ތިން މީހަކު އަދިވެސް މިކަމުގައި ބައިވެރިވާ ކަމަށް ބެލެވޭ ކަމަށާއި އެ މީހުން ހޯދުމުގެ މަސައްކަތް ވެސް ކުރަމުން އަންނަ ކަމަށެވެ.
ހައްޔަރު ކުރި މީހުންގެ ތެރޭގައި ފައިސާ އުފުލުމުގެ ހިދުމަތް ދިން ޓްރާންސްޕޯޓު ކުންފުނި ސީއެމްއެސްގެ މުވައްޒަފަކާއި އެ ކުންފުނީގެ ކުރީގެ މުވައްޒަފެއްގެ އިތުރުން ފުލުހުންގެ ކޮންސްޓަބަލް އެއް ވެސް ހިމެނެ އެވެ.
މި ފައިސާ ފޭރުނީ ބެންގަލޫރުގެ ލާލްބާގް ސަރަހައްދުގައި ދުވާލު ވަގުތުގަ އެވެ.
ފޭރުނު މީހުން އުޅުނީ ރިޒާވް ބޭންކް އޮފް އިންޑިއާގެ އޮފިސަރުން ކަމަށް ހެދިގެންނެވެ. ފައިސާ ހުރި ވޭން ހުއްޓުވުމަށް ފަހު އެ މީހުން ބުނަމުން ދިޔައީ އެހާ ގިނަ އަދަދެއްގެ ފައިސާ ގެންދާއިރު އެކަމާ ގުޅޭ ލިޔެކިޔުންތައް ފުރިހަމަތޯ ބަލަންޖެހޭނެ ކަމަށެވެ.
ފުލުހުން ބުނި ގޮތުގައި ފައިސާ އުފުލި ވޭނުގައި ފައިސާ ބަލަހައްޓަން ތިބި ދެ މީހުން، ފޭރުނު މީހުންގެ ވެހިކަލަށް އެރުވުމަށް ފަހު ގޭންގުގެ އެއް މެމްބަރަކު ފައިސާ ވޭން ކޮންޓްރޯލް ކުރި އެވެ. މިކަން ކުރި މީހުން ބޭނުންކުރި ވެހިކަލްގެ ނަންބަރު ޕްލޭޓް ބަދަލުކޮށްކޮށްފައިވާ ކަމަށާއި ދަތުރުކޮށްފައިވަނީ ސީސީޓީވީ ކެމެރާތައް މަދު މަގުތައް ބަލައިގެން ކަމަށް ވެސް ފުލުހުން ބުންޏެވެ.
މި ގޭންގު އަތުލައިގަތުމަށް ކަރްނާޓަކާގެ އިތުރުން އަވަށްޓެރި ސްޓޭޓްތައް ކަމަށްވާ ކެރެލާ، ޓެމިލް ނާޑޫ، ތެލެންގާނާ، އަންދްރަ ޕްރަދޭޝް އަދި ގޯއާގައި 200 އަށް ވުރެ ގިނަ ފުލުހުން ހަރަކާތްތެރިވެ އެވެ.
ޕޮލިސް ކޮމިޝަނަރު ވިދާޅުވީ މި ފޭރުމުގައި ސީއެމްއެސްގެ ދައުރާއި ފައިސާ އުފުލުމުގެ ގައިޑްލައިންތަކާ ހިލާފުވުން ފަދަ ކަންކަން ހުރެދާނެ ކަމަށް ބަލައި އެ ހުރިހާ ދިމާލަކަށް ތަހުގީގު ފުޅާކޮށްފައިވާ ކަމަށެވެ. އޭނާ ވިދާޅުވީ ފައިސާ އުފުލި ވޭން އަބަދު އެއް މަގަކުން، އެއް ވަގުތުތަކެއްގައި ދަތުރުކުރުމަކީ ކޮށްގެންވާނެ ކަމެއް ނޫން ކަމަށެވެ.