24 ނޮވެމްބަރ 2025 - 09:24
ދައުލަތުގެ ޕޭ ފްރޭމްވޯކަށް ސަރުކާރުން މިދިޔަ މަހު ގެނައި ބަދަލާ އެކު، މި މަހުން ފެށިގެން މުސާރަ ކުޑަވެފައިވާ ކަމަށް ބުނެ، އެކަމުގެ ހިތްހަމަނުޖެހުން ފާޅުކުރުމުގެ ގޮތުން ޝަރުއީ ދާއިރާގައި މަސައްކަތްކުރާ މުވައްޒަފުން ކަޅު ހެދުމުގައި މިއަދު އޮފީހަށް ގޮސް، ހިމޭން އިހުތިޖާޖެއް ކޮށްފި އެވެ.
"މިހާރު" އަށް އެނގިފައިވާ ގޮތުގައި ހައިކޯޓާއި ޑްރަގު ކޯޓާއި ސިވިލް ކޯޓު އަދި ފެމިލީ ކޯޓާއި ޖުވެނައިލް ކޯޓުގެ އިތުރުން ބައެއް ރަށްރަށުގެ މެޖިސްޓްރޭޓް ކޯޓުތަކުގައި މަސައްކަތްކުރާ މުވައްޒަފުން ވެސް މިއަދު އޮފީހަށް ނުކުތީ ކަޅު ހެދުމުގަ އެވެ.
މި ހިމޭން އިހުތިޖާޖުގައި ބައިވެރިވި ބައެއް ރަށްތަކުގެ ތެރޭގައި ށ. މިލަންދޫ މެޖިސްޓްރޭޓު ކޯޓާއި ށ. ފުނަދޫ މެޖިސްޓްރޭޓް ކޯޓާއި ބ. ކިހާދޫ މެޖިސްޓްރޭޓް ކޯޓާއި ދ. ކުޑަހުވަދޫ މެޖިސްޓްރޭޓް ކޯޓުގެ މުވައްޒަފުން ވެސް ހިމެނެ އެވެ.
އެނގިފައިވާ ގޮތުގައި ޖުޑިޝަރީ ދާއިރާގައި މަސައްކަތްކުރާ މުވައްޒަފުން ދަނީ ރައީސް އޮފީހަށް މިއަދު ޕެޓިޝަނެއް ވެސް ހުށަހަޅަން ތައްޔާރުވަމުންނެވެ.
ދައުލަތުގެ ޕޭ ފްރޭމްވޯކަށް 2022 ގައި އަމަލުކުރަން ފެށި ފަހުން، ދައުލަތުގެ ވަޒީފާގައި މަސައްކަތްކުރާ އެންމެ ގިނަ ބަޔަކަށް މުސާރައިގެ ކުރިއެރުން މި މަހުން ފެށިގެން ލިބޭނެ ކަމަަށް ފިނޭންސް މިނިސްޓްރީން ބުނެފައިވެ އެވެ.
ޖުޑިޝަރީ ދާއިރާގެ މުވައްޒަފުންގެ މުސާރަ ކުޑަވެފައިވާ ކަަމަށް ބުނެ، ބައެއް ކޯޓުތަކުގެ މުވައްޒަފުން ހިމޭނެ އިހުތިޖާޖަކަށް މިއަދު ނުކުތް ނަމަވެސް ނޭޝަނަލް ޕޭ ކޮމިޝަނުން މިދިޔަ ބުރާސްފަތި ދުވަހު "މިހާރު" އަށް ބުނީ، އެ ދާއިރާގެ މުވައްޒަފުންގެ މުސާރަ ކުޑަނުވާނެ ކަމުގެ ޔަގީންކަން ދޭ ކަމަށެވެ. އެ ގޮތުން ބައެއް އެލަވަންސްތައް ވެސް ހަމަޖައްސާފައިވާ ކަމަށް އެ ކޮމިޝަންގެ އިސް އޮފިޝަލަކު ވިދާޅުވި އެވެ.
އޭގެ ތެރެއިން އެއް އެލަވަންސަކީ އޭނާ ވިދާޅުވި ގޮތުގައި "ޖުޑިޝަރީ ކޮންޓިނިއުޓީ އެލަވަންސް" އެވެ.
"އެ ދުވަހަކަށް ތާވަލް ކޮށްފައި ހުންނަ މައްސަލަތައް ނިމެން ޖެހޭނެ. އެ އަށް ފަހު ހުންނަ އިދާރީ ކަންކަން ވެސް ނިންމާފައި ނޫންތޯ ފަނޑިޔާރާއި ދެން ތިބޭ މުވައްޒަފުންނަށް ގެއަށް ދެވޭނީ. އެ ގޮތަށް ތިބެންޖެހޭ ހާއްސަ ފަރާތްތަކަށް އިތުރު އިނާޔަތްތައް ކަނޑައަޅާފައި ހުންނާނެ،" ޕޭ ކޮމިޝަންގެ އޮފިޝަލް ވިދާޅުވި އެވެ.
އޭނާ ވިދާޅުވި ގޮތުގައި، ޝަރުއީ ދާއިރާގެ މުވައްޒަފުންގެ މުސާރައިގެ ކުރިއެރުމަށް އަންނާނެ ބަދަލުތައް ވަރަށް ތަފުސީލްކޮށް ވަނީ ބަލައިފަ އެވެ. އެކަމަކު، ހާއްސަ ހާލަތްތަކާ ގުޅުވައިގެން ދޭ އެލަވަންސްތައް ނުލައި ހިސާބު ހެދުމުން ނުބައި މަންޒަރެއް ފެންނަނީ ކަމަށް އޮފިޝަލް ވިދާޅުވި އެވެ.
ޝަރުއީ ދާއިރާގައި މަސައްކަތްކުރާ ލީގަލް މުވައްޒަފުންގެ މުސާރަ ކުޑަކަމަށް ބުނެ ދައްކާ ވާހަކަތަކާ ގުޅިގެން ސުވާލު ކުރުމުން ޕޭ ކޮމިޝަންގެ އޮފިޝަލް ވިދާޅުވީ، އެއީ އަބަދުވެސް މުސާރައިގެ ގޮތުން "ޕްރިވިލެޖެއް" ލިބިފައިވާ ބައެއް ކަމަށެވެ. އެއާ އެކު، މި މަހުން ފެށިގެން މުސާރަ ބޮޑު ކުރިއިރު، ކޯޓުތަކުގެ އިދާރީ މުވައްޒަފުންނަށް މުސާރައިގެ ބޮޑު ކުރިއެރުމެއް ގެނެސްފައިވާތީ ތަފާތު ފެނިދާނެ ކަމަށް އެ ކޮމިޝަނުން ބުންޏެވެ.
"ބައެއް އިދާރީ މުވައްޒަފުން މިހާތަނަށް މަސައްކަތް ކުރަމުން އައީ ވަރަށް ދަށް މުސާރައެއްގައި. އަންޑާޕޭގައި އެ މުވަޒަފުން މަސައްކަތް ކުރީ. އެކަމަކު، މި ފަހަރު ވަރަށް ރަނގަޅު ކުރިއެރުމެއް މުސާރައިގެ ގޮތުގައި އެ މުވައްޒަފުންނަށް ގެނެސްފައި ވާނީ. އެ ވަރުގެ ބޮޑު ކުރިއެރުމެއް ލީގަލް ބޭފުޅުންގެ މުސާރަ އަށް މި ފަހަރު ނުގެނޭ. އެ ތަފާތު ފެނިދާނެ. އެކަމަކު، ލީގަލް ބޭފުޅުންނަށް ވެސް މުސާރައިގެ ކުރިއެރުން ދީފައި ވާނީ،" ޕޭ ކޮމިޝަންގެ އޮފިޝަލް ވިދާޅުވި އެވެ.
ސަރުކާރުން ބުނެފައިވާ ގޮތުން އަސާސީ މުސާރަ ވެސް 7،400 އަށް ވުރެ އެއްވެސް މުވައްޒަފަކަށް މި މަހުން ފެށިގެން ދަށް ނުވާނެ އެވެ. މިހާތަނަށް އަސާސީ މުސާރައިގެ ގޮތުގައި ބައެއް މުވައްޒަފުންނަށް 3،100ރ. ވެސް ލިބިފައިވާ ކަމަށް ޕޭ ކޮމިޝަނުން ބުނެފައި ވެ އެވެ.
އެކަމަކު އާ ފްރޭމްވޯކާ އެކު، މުސާރައިގެ ކުރިއެރުން ލިބިފައިވާ ކަމަށް ސަރުކާރުން ބުންޏަސް ބައެއް ދާއިރާތަކުގައި މަސައްކަތްކުރާ މުވައްޒަފުން ބުނަނީ އެމީހުންގެ މުސާރަ ކުޑަވިި ކަމަށެވެ. އެ މައްސަލާގައި ޕޭ ކޮމިޝަނުން ބުނެފައި ވަނީ އެއީ ލިމިޓެއް ނެތި ނަގަމުން އައި އިތުރު ގަޑީގެ ފައިސާ ދޭ ގޮތަށް ގެނައި ބަދަލާ އެކު އައި ތަފާތެއް ކަމަށެވެ.