ޓްރޭޑްކުރުމުގެ ނަމުގައި އަނެއްކާވެސް ޕޮންޒީ ސްކީމެއް؟
ޓްރޭޑްކުރުމުގެ ނަމުގައި އަނެއްކާވެސް ޕޮންޒީ ސްކީމެއް؟

ސޯޝަލް މީޑިއާގައި ފާޅުކަން ބޮޑުގޮތެއްގައި ހިންގާ އެ ޕޭޖުން ބުނަނީ 22،000ރ. އިންވެސްޓްކޮށްގެން އެންމެ މަދުވެގެން ވެސް ފައިދާއަށް 90،000ރ. ލިބޭނެ ކަމަށެވެ.

މިއީ އެހާ ޔަގީންކޮށް ވާ ކަމެއް ހެއްޔެވެ؟ މިއީ ފޮރެކްސް ޓްރޭޑިންގައި އެއްވެސް މީހަކަށް މިހާ ކަށަވަރުކޮށް ބުނަން އެނގޭ ކަމެއް ހެއްޔެވެ؟

މިކަން މިހާ ފުޅާ ދާއިރާއެއްގައި އިޝްތިހާރު ކުރާ އިރު މިކަމުގައި ހުރި ހަމަނުޖެހޭ ކަންކަމަށް ބަލައިލަން ޖެހެ އެވެ.

މާލީ ދާއިރާގެ ތަޖުރިބާކާރަކު ވިދާޅުވީ، މިކަން ވެސް ވައްތަރީ "ބޮޑު ސްކޭމް" އަކާ ކަމަށެވެ. މީގެ ކުރިން ޖެމްކިއުގެ ނަމުގައި ވެސް ހަތް ޕަސެންޓް ފައިދާއާ އެކު މިފަދަ ސްކީމެއް ހިންގި އިރު އޭއެފް އޮޕްޝަންގެ ނަމުގައި ހިންގާ އެ ޕޭޖުން ވަނީ ފަސް ޕަސެންޓުގެ ފައިދާ ދޭނެ ކަމަށް ބުނެފަ އެވެ. އޭނާ ބުނީ، މަދު ބަޔަކަށް މިފަދަ ސްކީމުތަކުން ފައިދާ ދެވިދާނެ ކަމަށާއި ގިނަ ބަޔަކަށް އެފަދަ ގެރެންޓީ ދީގެން ސްކީމުތައް ހިންގުމަކީ ވާނެ ކަމެއް ނޫން ކަމަށެވެ. ޓެލެގްރާމް ޗެނަލްތައް މެދުވެރިކޮށް މިފަދަ ސްކީމުތައް ހިންގާ އިރު ޓެލެގްރާމަކީ ރެގިއުލޭޓް ނުކުރެވޭ ޕްލެޓްފޯމެއްކަން ވެސް އޭނާ ފާހަގަކުރެއްވި އެވެ.

ކްރިޕްޓޯ ކަރެންސީ މެދުވެރިކޮށް ހިންގާ ޓްރޭޑިން އަކީ "ޗާންސް" އެއް ނެގުން ފަދަ ކަމެކެވެ. އެއިން ދުވާލަކު އެހާ ބޮޑު ޕްރޮފިޓް ހޯދެނީ ވަރަށް މަދު ބަޔަކަށެވެ. މިކަމުގައި ކާމިޔާބު މީހަކަސް ވާން ވަރަށް ދުވަހުގެ ތަޖުރިބާ ބޭނުންވެ އެވެ. އެއީ ބުނެލާހާ ފަސޭހައިންވާ ކަންކަމަކެއް ނޫނެވެ. ޓްރޭޑިން އަކީ ވަކި ސިގްނަލްތަކަކަށް ބަލައިގެން، ވަކި ޕެޓާންތަނެއް ފޮލޯކޮށްގެން އިންވެސްޓްކުރުން ކަމަށްވާ އިރު ބައެއް ފަހަރު އެންމެ ހީނުކުރާ ގޮތަށް ކަންތައް މެދުވެރިވެ އިންވެސްޓް ކުރި ހުރިހާ ފައިސާ ގެއްލޭ ހިއްސާބަށް ވެސް ދެ އެވެ. މިއީ ޗާންސެއް ނެގުން ފަދަ ކަމަކަށް ވަނީ އެހެންވެ އެވެ.

މިހާރު ޕްރޮމޯޓްކުރާ އެއް ސްކީމުގައިވާ ގޮތުން އެއްވެސް ވަރެއްގެ ޕްރޮފިޓެއް ނުލިބިއްޖެ ނަމަ 14 ދުވަހުގެ ތެރޭގައި އިންވެސްޓްކުރި އަދަދު އެއްކޮށް ޖަމާކޮށްދޭނެ ކަމަށް ވެސް ބުނެފައިވެ އެވެ. އަދި މަހުގެ މިވެނި ދުވަހެއްގައި މިވެނި އެކައުންޓަކަށް ފައިދާ ޖަމާކުރަމުން ދާނެ ކަމަށް ވެސް ބުނެފައިވެ އެވެ. އޭއެފް އޮޕްޝަން އިން ހިންގާ އެހެން ސްކީމުތަކުގައި އިޝްތިހާރުތަކުގެ އެންމެ ތިރީގައި ކުޑަ ފޮންޓެއްގައި ވަރުގަދަ "ޑިސްކްލެއިމާ" އެއް ހިމަނާފައިވެ އެވެ. އޭގައިވާ ގޮތުން އިންވެސްޓް ކުރާ ފައިސާ ގެއްލިއްޖެ ނަމަ އެ ފައިސާ އަނބުރާ ނުލިބޭނެ އެވެ.

ޓްރޭޑިންގައި އުޅޭ މީހަކު ބުނީ، މިފަދަ ސްކީމުތަކުގައި އިންވެސްޓް ކުރަންވާނީ ޓްރޭޑިންގެ ކަންކަން އެނގޭ މީހުން ކަމަށެވެ. މިއީ އެހާ ބޮޑު ފައިދާއެއް ގެރެންޓީ ކޮށްގެން ހިންގާ މުއާމަލާތަކަށްވާ އިރު ފޮރެކްސް ޓްރޭޑިން އަކީ ވަރަށް ބޮޑު ރިސްކަކާ އެކު ހިންގާ މުއާމަލާތްތަކަކަށްވާތީ އެވެ.

ޓްވިޓާގައި އަލަށް އާންމުކޮށްފައިވާ އޭއެފް އޮޕްޝަން ސްކީމު، ކުރީގެ މަޖިލީސް މެންބަރު އަލްހާން ފަހުމީގެ އަމިއްލަ އެކައުންޓުން ވެސް އިޝްތިހާރުކުރަމުންދެ އެވެ. މީގެ ކުރިން ވެސް އަލްހާންގެ ކުންފުނި ކިންގްސް ކެޕިޓަލްސް ހޯލްޑިންގްސް ކުންފުނިން ގާނޫނާ ހިލާފަށް އިންވެސްޓްމަންޓް ސްކީމެއް ތައާރަފްކޮށް، ގިނަ ބައެއްގެ އަތުން ފައިސާ އަތުލި މައްސަލާގައި އެތައް ބަޔަކު އޭނާގެ މައްސަލަ ފުލުހުންނަށާއި ކޯޓަށް ވެސް ހުށަހެޅި އެވެ. އެކަމަކު ފުލުހުން ހިންގި ޖިނާއީ ތަހުގީގަށް ފަހު ޕްރޮސިކިއުޓާ ޖެނެރަލްގެ އޮފީހުން އުފުލި ބޮޑެތި ދައުވާތައް މިހާރު ވަނީ އަނބުރާ ގެންގޮސްފަ އެވެ.

ޕީޖީ އޮފީހުން ބުނީ ދައުވާތައް އަނބުރާ ގެނައީ މައްސަލައިގައި ހިމެނޭ މީހުންނަށް ގެއްލުންވި ފައިސާ އަނބުރާ ދިނުމުން ކަމަށެވެ. ޕޮލިހަށް މައްސަލަ ހުށަނާޅާ އެތައް ބަޔަކު އަދިވެސް ފައިސާ ނުލިބި ތިބި ކަމަށް އެބަ ބުނެ އެވެ.