24 ނޮވެމްބަރ 2025 - 06:07
އެމެރިކާ ސަރުކާރުގެ ހަރަދުތައް ކުޑަކުރުމުގެ މަސައްކަތް ކުރުމަށް މަހުޖަނު އީލޮން މަސްކާ ހަވާލުކޮށްގެން ރައީސް ޑޮނަލްޑް ޓްރަމްޕު ހިންގެވި ޑިޕާޓްމަންޓް އޮފް ގަވަމެންޓް އެފިޝަންސީ (ޑޯޖް) މުއްދަތުގެ މާ ކުރިން އުވާލައިފި އެވެ.
އެމެރިކާ ސަރުކާރުގެ ސައިޒު ކުޑަކޮށް، ބޭކާރު ހަރަދުތައް ކުޑަކުރުމުގެ ނަމުގައި ޓްރަމްޕާއި މަސްކު ވަރަށް ބޮޑު ސަމާލުކަމެއް ދީގެން ފެއްޓެވި އޮފީހުގެ މަސައްކަތުން ހަރަދުތަކެއް ކުޑަވިޔަސް މާނަހުރި ގޮތެއްގައި ބޮޑު ހަރަދެއް ކުޑަ ނުވާ ކަމަށް، ފާޑުކިޔާ ފަރާތްތަކުން ބުނެ އެވެ.
"މިހާރު އެ އޮފީހެއް ނެތް،" މިހާރު ޑޯޖްގެ މަސައްކަތަކީ ކޮބައިތޯ ސުވާލުކުރުމުން، އޮފީސް އޮފް ޕާސަނަލް މެނޭޖްމަންޓްގެ ޑިރެކްޓަރު ސްކޮޓް ކޫޕޯ ރޮއިޓާސް އަށް ވިދާޅުވި އެވެ.
އެއީ މިހާރު "ސެންޓްރަލައިޒްޑް އެންޓީޓީއެއް" ނޫން ކަމަށް ކޫޕޯ ވިދާޅުވި އެވެ.
ޑޯޖްގެ މުއްދަތު ހަމަވާ ގޮތަށް ކަނޑައަޅާފައި އޮތީ ޖުލައި 2026 އަށެވެ. އެހެންވެ އެ އޮފީސް ބަންދުކޮށްފައި މި ވަނީ މުއްދަތު ހަމަވުމުގެ އަށް މަސް ދުވަސް ކުރިންނެވެ.
ޑޯޖް ހިންގުމާ ހަވާލުކުރި މަސްކް އެތައް ބަޔަކު ވަޒީފާއިން ވަކިކޮށް ގިނަ އިދާރާތަކެއް އުވާލައި އަދި އެ ތަންތަން ކުޑަކުރުމުގެ ގޮތުން އެތައް ފިޔަވަޅެއް އެޅި އެވެ. އޭނާ "ސަރުކާރުގެ ހާއްސަ މުވައްޒަފެއްގެ" ގޮތުގައި އޭނާ ގިންތިކޮށް، 130 ދުވަހަށް ކަނޑައެޅި މެންޑޭޓް ހަމަވުމާ އެކު މަސްކް ވަނީ މިދިޔަ މެއި މަހު އިސްތިއުފާދީ ސަރުކާރުން ވަކިވެފަ އެވެ.
ޓްރަމްޕްގެ ދެވަނަ ދައުރުގެ ކުރީކޮޅު، ފެޑެރަލް އޭޖެންސީތައް މަދުކޮށް، ބަޖެޓް ކުޑަކޮށް އަދި ޓްރަމްޕު އިސްކަންދޭ ކަންތައްތަކާ އެއްގޮތްވާ ގޮތަށް މަސައްކަތް ކުރުމަށް އެ އެޖެންސީން ވަނީ ވަރުގަދަ ފިޔަވަޅުތަކެއް އަޅައިފަ އެވެ. ރޮއިޓާސް އިން ރިވިއު ކޮށްފައިވާ ލިޔެކިޔުންތަކުން އެނގޭ ގޮތުގައި ފެޑެރަލް ސަރުކާރުގެ ހިއުމަން ރިސޯސަސް އޮފީސް ކަމަށްވާ އޯޕީއެމް އިން ވަނީ ޑޯޖްގެ ގިނަ މަސައްކަތްތަކެއް ކޮށްފަ އެވެ.
ޑޯޖްގެ މުވައްޒަފުން ވެސް ސަރުކާރުގެ އެކި އިދާރާތަކުގެ މަސައްކަތަށް ވަނީ ހާއްސަކޮށްފަ އެވެ. އެ ތަނުގެ އިސް ދެ މުވައްޒަފަކު، ޓްރަމްޕުގެ އެގްޒެކެޓިވް އޯޑަރެއްގެ ދަށުން އުފެއްދި ނެޝަނަލް ޑިޒައިން ސްޓޫޑިއޯގައި ވެސް މިހާރު މަސައްކަތްކުރެ އެވެ. މިއީ އެއާބީއެންބީގެ ކޯ ފައުންޑަރު ޖޯ ގެބިއާއާ ހަވާލުކޮށްފައިވާ ތަނެކެވެ.