24 ނޮވެމްބަރ 2025 - 01:17
އެމްޑީޕީގެ ޗެއާޕާސަންގެ މަގާމުން ރޭ އިސްތިއުފާ ދެއްވި ފައްޔާޒު އިސްމާއިލްގެ މަސައްކަތްތަކަށް ކުރީގެ ރައީސް މުހައްމަދު ނަޝީދު ތައުރީފު ކުރައްވައިފި އެވެ.
މޭ 2022 ގައި އެ ޕާޓީގެ ޗެއާޕާސަންގެ މަގާމަށް އިންތިހާބުކުރި ފައްޔާޒުގެ އިސްތިއުފާ އިއުލާން ކުރެއްވީ ރޭ ބޭއްވި ގައުމީ މަޖިލިހުގެ ބައްދަލުވުމުގަ އެވެ.
ފައްޔާޒުގެ ކުއްލި އިސްތިއުފާއާ ގުޅިގެން ނަޝީދު އެކްސްގައި ވިދާޅުވީ، އެމްޑީޕީ އުފެދުނީއްސުރެ ފައްޔާޒު ވަނީ ފަހަތަށް ޖެހިވަޑައިނުގެން އެ ޕާޓީ އަށް ގިނަ ހިދުމަތްތަކެއް ކޮށްދެއްވާފައި ކަމަށެވެ.
"ޖަލަށް ވަޑައިގަންނަވަން ޖެހުނު ވަގުތު ޖެހިލުމެއް ނެތި ޖަލަށް ވެސް ވަޑައިގެންނެވި،" އެމްޑީޕީއާ އެކު ފައްޔާޒަށް އިތުރު ކާމިޔާބީ އަށް އެދިވަޑައިގަންނަވަމުން ނަޝީދު ވިދާޅުވި އެވެ.
ކުރީގެ ރައީސް އިބްރާހިމް މުހައްމަދު ސޯލިހާއި ނަޝީދާ ދެބޭފުޅުންގެ މެދުގައި އުފެދުނު ސިޔާސީ ނުތަނަވަސްކަމުގެ ތެރޭގައި އެމްޑީޕީ ދޫކުރައްވައި ނަޝީދު އާ ޕާޓީއެއް އުފެއްދެވި އެވެ. އެކަމަކު، އެ ކޯޅުމުގައި އެމްޑީޕީ އަށް ވެސް ލިބުނު ބޮޑެތި "ގެއްލުންތަކަށް" ފަހު ނަޝީދު ވަނީ މި އަހަރުގެ ޖޫން މަހު އަލުން އެ ޕާޓީއާ ގުޅިވަޑައިގެންފަ އެވެ.
ނަޝީދާއި އެ މަނިކުފާނުގެ އަރިސް ބޭފުޅުން އަލުން އެމްޑީޕީ އަށް ގެންނެވުމުގައި އިސް ދައުރެއް އަދާކުރެއްވީ ފައްޔާޒެވެ.
އެކަމަކު، ނަޝީދު އެނބުރި އެމްޑީޕީއާ ގުޅިވަޑައިގަތުމާ އެކު، ވެސް އެ ޕާޓީގެ ބައެއް އިސްވެރިންނާއި އާންމު މެމްބަރުންނާ ދެމެދު އޮތް ގުޅުން ރަނގަޅުވި ތަން ނުފެންނަ ކަން ފައްޔާޒު ރޭ އިސްތިއުފާ ދެއްވުމުގެ ކުރިން ދެއްކެވި ވާހަކައިގައި ވެސް ނުސީދާކޮށް ވިދާޅުވި އެވެ.
އެމްޑީޕީގެ ގައުމީ މަޖިލިހުގެ ރޭގެ ބައްދަލުވުމުގައި އިސްތިއުފާ އިއުލާން ކުރެއްވުމުގެ ކުރިން ފައްޔާޒު ދެއްކެވި ވާހަކައިގައި ވިދާޅުވީ، މަގާމުގައި ހޭދަކުރެއްވި މުއްދަތުގައި އެންމެ ބޮޑަށް ބެއްލެވީ އެ ޕާޓީގެ އެއްބައިވަންތަކަން ގާއިމްކޮށް "އެއްވެގެން" މަސައްކަތް ކުރެވޭތޯ ކަމަށާއި މާޒީގައި ހިތަށްވީ ތަދުގެ ބަދަލު ހޯދަން އުޅެގެން އެމްޑީޕީ އަށް ކުރިއެރުން ލިބޭ ތަން ފެނިވަޑައިނުގަންނަވާ ކަމަށެވެ.
ފައްޔާޒު ވިދާޅުވި ގޮތުގައި، ކުރިއަށް ހުރި އިންތިހާބުތައް ވެސް އެމްޑީޕީ އަށް ކާމިޔާބު ކުރެވޭނީ އެ ބައިބައިވުންތައް ނައްތާލައިގެން "އެއްވެގެން" ނެވެ.
"އަޅުގަނޑުމެންނަށް ހިތަށްވީ ތަދުގެ ބަދަލު ހޯދަން އުޅެގެންނެއް އަޅުގަނޑުމެންނަކަށެއް ކުރިއެރުމެއް ލިބޭ ތަނެއް އަޅުގަނޑަކަށް ނުފެނޭ. އަޅުގަނޑު ގަބޫލުކުރާ ގޮތުގައި ސިޔާސީ ލީޑަރުންނަކީ އެ ކަހަލަ އިހުސާސްތަކުގެ މައްޗަށް އެރެން ޖެހޭނެ ބައެއް. އެ އިހުސާސްތަކުގެ މައްޗަށް އަރައި ގައުމާއި ރައްޔިތުންނަށް ފައިދާވާނެ ނިންމުންތަކެއް ނިންމަން ޖެހޭނެ ބައެއް. އެ ލީޑަރުންނަކީ ތިޔަބޭފުޅުން،" ގައުމީ މަޖިލިހުގެ ރޭގެ ބައްދަލުވުމަށް ހާޒިރުވި ފަސްދޮޅަހަކަށް މެމްބަރުންނަށް އިޝާރާތް ކުރައްވަމުން ފައްޔާޒު ވިދާޅުވި އެވެ.
މީޑިއާ ނުވައްދައި ރޭ ބޭއްވި އެމްޑީޕީގެ ގައުމީ މަޖިލިހުގެ ބައްދަލުވުމުގައި ޗެއާޕާސަންގެ މަގާމުގެ އިސްތިއުފާ އިއުލާން ކުރެއްވުމުގެ ކުރިން ފައްޔާޒު ވަނީ ކުރީގެ ރައީސް އިބްރާހިމް މުހައްމަދު ސޯލިހާއި ނަޝީދާ ދެބޭފުޅުންގެ މެދުގައި އުފެދުނު ކޯޅުން ހައްލު ކުރައްވަން ކުރެއްވި މަސައްކަތްތައް ހާމަކޮށްދެއްވައިފަ އެވެ.