23 ނޮވެމްބަރ 2025 - 20:42
އިބްރާހިމް މަހްދީ ހުސައިން (ފޭދޫ އިއްބެ) ގެ ބައިސްކަލް ކިކް ގޯލާ އެކު ވެލެންސިއާ ބަލިކޮށް އީގަލްސްއިން ހަތަރުވަނަ އަށް ޖެހިލައިފި އެވެ.
ދިރާގު ދިވެހި ޕްރިމިއާ ލީގުގައި މިއަދު ހަވީރު ވެލެންސިއާގެ މައްޗަށް އީގަލްސްއިން ކުރި ހޯދީ 3-0 ންނެވެ.
އެ ޓީމުގެ ތިން ލަނޑު ވެސް ޖެހީ ދެވަނަ ހާފުގަ އެވެ. ފުރަތަމަ ލަނޑު 55 ވަނަ މިނެޓްގައި އިއްބެ ޖެހީ ބައިސްކަލް ކިކް ގޯލަކުންނެވެ.
އީގަލްސްގެ މިޑްފީލްޑަރު އުޒުބެކިސްތާންގެ އަބްދުލްމާލިކް ޓޮޝްޕުލަޓޯވް އޭރިއާގެ ބޭރުގައި ހުރެފައި އޭރިއާ ތެރެއަށް ފޮނުވާލި ބޯޅަ އިއްބެ ގޯލަށް ފުރަގަސް ދީގެން އިނދެ އެނބުރިގެންފައި ބައިސްކަލްކިކުން ބޯޅަ ގޯލްގެ ތެރެއަށް ވައްދާލި އެވެ.
ދެވަނަ ލަނޑު 64 ވަނަ މިނެޓްގައި ޖެހީ އަހްމަދު ރިޒްވާން (ރިޒޭ) އެވެ. އިއްބެ ދިން ބޯޅަ ހިފައިގެން ރިޒޭ އޭރިއާ ތެރެއަށް ވަނުމުން، ވެލެންސިއާ ޒުވާން ޑިފެންޑަރުން އޭނާ އަށް ހުރަސް އަޅަން ޓެކުލް ވެސް ކުރި އެވެ. އެކަމަކު ރިޒޭ ވަނީ ޓެކުލްގެ މަޅިން ނެއްޓި ގޯލްގެ ތެރެއަށް ބޯޅަ ވައްދާލައިފަ އެވެ.
ތިންވަނަ ލަނޑު ޖެހީ ބަދަލު ކުޅުންތެރިޔެއްގެ ގޮތުގައި ކުޅެން ނުކުތް ޒުވާން ކުޅުންތެރިން ލައިތު އައްބާހެވެ.
އެ ލަނޑު ޖެހުމުގައި ކެޕްޓަން ރިޒޭގެ ހިއްސާ ވެސް ބޮޑެވެ. މެޗުގެ 79 ވަނަ މިނެޓްގައި ރިޒޭ ފޮނުވާލި ހަމަލާ ވެލެންސިއާގެ ކީޕަރު ވިއޮރޭލް ބޮޔާން ދިފާއު ކުރުމުން ރީބައުންސްވި ބޯޅަ ބޭރުވުމުގެ ކުރިން ރިޒޭ ހޯދި އެވެ.
ބޯޅަ ހޯދައި އޭނާ ދިނީ އޭރިއާގެ ބޭރުގައި ހުރި މިޑްފީލްޑަރު ޖަޕާނުގެ ކަޓްޝޫމީ ކިމިޝީމާ އަށެވެ. އޭނާ އެ ބޯޅަ ޖައްސާލީ ލައިތު އަށެވެ. ބޯޅަ ކޮންޓްރޯލު ކުރުމަށް ފަހު ލައިތު ވައްދާލީ ގޯލްގެ މަތީ ކަނަށެވެ.
މެޗުން މޮޅުވެ އީގަލްސް މިހާރު ވަނީ 12 ޕޮއިންޓް ހޯދައި ގަދަ ހަތަރެއްގެ ތެރެއަށް ވަދެފަ އެވެ. އެ ޓީމާ އެންމެ ކައިރީގައި އޮތީ ވިކްޓަރީ އަށް ލިބިފައި އޮތީ ނުވަ ޕޮއިންޓެވެ.