23 ނޮވެމްބަރ 2025 - 19:46
ހައި ކޯޓުގެ ފަނޑިޔާރުގެ މަގާމުން މިއަދު އިސްތިއުފާ ދެއްވި މުހައްމަދު ފައިސަލަށް ތުހުމަތުވާ މަނީ ލޯންޑްރިން އަދި ކޮރަޕްޝަންގެ މައްސަލައެއް އެންޓި ކޮރަޕްޝަން ކޮމިޝަން (އޭސީސީ) އިން ބަލަން ފަށައިފި އެވެ.
މަނީ ލޯންޑްރިން އަދި ކޮރަޕްޝަންގެ ތުހުމަތުގައި ފައިސަލްގެ މައްސަލައެއް އޭސީސީން ބަލަން ފެށީ ފުލުހުންގެ ފަރާތުން އެ ކޮމިޝަނަށް މައްސަލަ ހުށަހެޅުމުން ކަމަށް އެނގިފައިވެ އެވެ. އަދި ފައިސަލްއާ ގުޅޭ މައްސަލައެއް ފުލުހުން ވެސް ތަހުގީގު ކުރަމުންދާ ކަމަށް މައުލޫމާތު ލިބިފައިވެ އެވެ.
އޭސީސީގެ މީޑިއާ އޮފިޝަލް "މިހާރު" އަށް ވިދާޅުވި ގޮތުގައި ހައި ކޯޓުގެ ފަނޑިޔާރަކަށް ތުހުމަތުވާ މަނީ ލޯންޑްރިން އަދި ކޮރަޕްޝަންގެ މައްސަލައެއް އެ ކޮމިޝަންގައި ރަޖިސްޓްރީ ކޮށްފައިވާ ކަމަށެވެ. އަދި އެ މައްސަލައާ ގުޅޭގޮތުން ބަލަންޖެހޭ ކަންކަން ބަލަމުންދާ ކަމަށް އޮފިޝަލް ވިދާޅުވި އެވެ.
ނަމަވެސް އެ މައްސަލާގެ އެއްވެސް ތަފްސީލެއް އެ ކޮމިޝަނުން ހާމައެއް ނުކުރެ އެވެ.
ފަނޑިޔާރުކަމުގެ މަގާމުން ފައިސަލް މިއަދު އިސްތިއުފާ ދެއްވިއިރު، އޭނާއާ ގުޅޭ މައްސަލަތަކެއް ޖުޑީޝަލް ސާވިސް ކޮމިޝަން (ޖޭއެސްސީ) އިން ވެސް ދަނީ ބަލަމުންނެވެ. އަދި އޭނާގެ އިތުރުން ހައި ކޯޓުގެ އިތުރު ފަނޑިޔާރުންތަކެއްގެ މައްސަލަތަކެއް ވެސް ޖޭއެސްސީން ދަނީ ބަލަމުންނެވެ.
ފަނޑިޔާރު ކަމުން ފައިސަލް އިސްތިއުފާ ދެއްވިއިރު، ހައި ކޯޓުގެ އިސް ފަނޑިޔާރު ކަމަށް އޭނާ އައްޔަން ކުރަން މިދިޔަ އޭޕްރީލް މަހު ޖޭއެސްސީން ފާސްކުރި އެވެ. ނަމަވެސް، އެ ނިންމުމަށް އެެތައް މަހެއްވީއިރު ވެސް ރަސްމީކޮށް އޭނާއާ މަގާމު ހަވާލެއް ނުކުރެ އެވެ.
އެކަމަކު، ހައި ކޯޓު ހިންގުމާ ހަވާލުވެ ހުންނެވުމަށްފަހު އެ މަގާމުން ވެސް މިދިޔަ ހަފުތާގެ ތެރޭގައި އޭނާ ވަނީ އިސްތިއުފާ ދެއްވައިފަ އެވެ. އަދި އޭނާގެ އިސްތިއުފާއާ އެކު ހައި ކޯޓު ހިންގުން ވަގުތީ ހަވާލުކުރީ އެ ކޯޓަށް އެންމެ ފަހުން އައްޔަންކުރި ފަނޑިޔާރު އަބްދުﷲ ޖަމީލް މޫސާއާ އެވެ.
ހައި ކޯޓުގެ ފަނޑިޔާރު ކަމަށް ފައިސަލް އައްޔަން ކުރެއްވީ ޖުލައި، 2018 ގަ އެވެ. އޭގެކުރިން އޭނާ ހުންނެވީ ރައީސް އަބްދުﷲ ޔާމީންގެ ވެރިކަމުގައި ޖޭއެސްސީގައި އިންނަވާ ރައީސްގެ މެމްބަރު ކަމުގެ މަގާމުގަ އެވެ. އަދި ޖޭއެސްސީގެ ނައިބު ރައީސްކަން ވެސް އޭނާ ކުރެއްވި އެވެ.