23 ނޮވެމްބަރ 2025 - 18:27
ހަމާސް އާއި ހިޒްބުﷲ އަލުން ބާރު ގަދަވެ އެނބުރި އަންނަން ފުރުސަތު ނުދޭނެ ކަމަށާއި އެހެންވެ އެ ދެ ޖަމާއަތަށް ހަމަލާ ދިނުން ހުއްޓާނުލާނެ ކަމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ބުނެފި އެވެ.
މިދިޔަ ހަފްތާގައި އިޒްރޭލުން ވަނީ ލުބްނާންގެ އެކި ތަންތަނަށް ހަމަލާ ދިނުމުގެ އަމަލުތައް ވަރުގަދަކޮށްފަ އެވެ. މިއީ ހިޒްބުﷲ އިން ހަމަލާ ދިނުމަށް ބޭނުންކުރާ ތަންތަނާއި އެ ޖަމާއަތުގެ މަރުކަޒުތަކަށް ދިން ހަމަލާތަކެއް ކަމަށް އިޒްރޭލުން ވަނީ ބުނެފަ އެވެ.
ޣައްޒާގައި ހަމަލާ ބަދަލުކުރުން ހުއްޓާލުމަށް އެއްބަސްވެފައި އޮތް ނަމަވެސް އިޒްރޭލުން ހޮނިހިރު ދުވަހު ވެސް ޣައްޒާގެ އެކި ތަންތަނަށް ހަމަލާދީ 21 މީހަކު ޝަހީދުކޮށްލި ކަމަށް ޣައްޒާގެ ސިވިލް ޑިފެންސް އެޖެންސީން ވަނީ ބުނެފަ އެވެ.
ހަމާސް އާއި އިޒްރޭލުން ވެސް ގެންދަނީ އެއްބަސްވުމާ ހިލާފުވުމުގެ ޒިންމާ އެއްބަޔަކު އަނެއް ބައެއްގެ ބޮލުގައި އަޅުވަމުންނެވެ.
އިޒްރޭލުގެ ހަމަލާތަކާ ހެދި ފާޑުކިޔުން އަމާޒުވެފައި ވަނިކޮށް މިއަދު ބޭއްވި ކެބިނެޓް ބައްދަލުވުން ފަށަމުން ނަތަންޔާހޫ ބުނީ "ޓެރަރިޒަމާ ދެކޮޅަށް އެކި ތަންތަނުގައި ހަމަލާތައް ކުރިއަށް ގެންދާނެ" ކަމަށެވެ.
"މި ހަފްތާ ބަންދުގައި އިޒްރޭލުގެ އަސްކަރިއްޔާއިން ވަނީ ލުބްނާނަށް ހަމަލާ ދީފައި. ހިޒްބުﷲ އަކީ އިޒްރޭލަށް ނުރައްކަލަކަށްވާ ގޮތަށް އެނބުރި އައުން ހުއްޓުވަން ހަމަލާތައް ކުރިއަށް ގެންދާނަން.
"ޣައްޒާގައި ވެސް އަހަރެމެން މި ކުރަނީ އެ މަސައްކަތް. ހަމަލާ ބަދަލުކުރުން ހުއްޓާލަން އެއްބަސްވި ފަހުން ވެސް ހަމާސް އިން އެއްބަސްވުމާ ހިލާފުވުމެއް ނުހުއްޓޭ. އެހެންވެ އަހަރެމެން އެކަމަށް ރައްދު ދެމުން ގެންދަން،" ހަމަލާ ބަދަލުކުރުން ހުއްޓާލުމުގެ އެއްބަސްވުމާ ހިލާފްވަނީ ހަމާސް އިން ކަމަށް ތުހުމަތުކުރަމުން ނަތަންޔާހޫ ބުންޏެވެ.
ހޮނިހިރު ދުވަހަކީ އިޒްރޭލާއި ހަމާސްއިން ހަމަލާ ބަދަލުކުރުން ހުއްޓާލަން އެއްބަސްވި ފަހުން އެންމެ ނުރައްކާތެރި އެއް ދުވަހެވެ.
އިޒްރޭލުން ބުނަމުންދަނީ ޣައްޒާގައި ހަމަލާ ދެނީ ހަމާސް އިން އިޒްރޭލު ސިފައިންގެ ސަރަހައްދުތަކަށް ވަދެ ސިފައިންނަށް ހަމަލާދޭތީ ކަމަށެވެ. އެކަމަކު ހަމާސް އިން ގެންދަނީ ހަމަލާ ނުދޭ ކަމަށް ބުނަމުންނެވެ.