24 ނޮވެމްބަރ 2025 - 06:08
ޔަމަނުގެ 17 މީހަކު އިޒްރޭލާއި އެމެރިކާ އާއި އިނގިރޭސިވިލާތް އަދި ސައުދީއަަރަބިއްޔާއަށް ޖާސޫސްކޮށްދިންކަމުގެ ކުށް ސާބިތުވާ ކަމަށް ޔަމަނުގެ ހޫތީންގެ ކޯޓަކުން ކަނޑައަޅައި، އެ މީހުންނަށް މަރުގެ ހުކުމް އިއްވައިފި އެވެ.
ހޫތީންގެ އައްސަބާ ނޫސްއެޖެންސީން ބުނީ 17 މީހަކަށް މަރުގެ އަދަބުދޭން ސަންއާގައި ހުންނަ އެ ކޯޓަކުން ހުކުމް އިއްވީ އިޒްރޭލާއި އެމެރިކާ އަދި ސައުދީއަރަބިއްޔާގެ ޖާސޫސީ އިދާރާތައް ގުޅިގެން ހިންގާ ޖާސޫސީ ނެޓްވޯކެއްގައި ބައިވެރިވާ ހާއިނުންގެ ސެލްތަކެއް އެ މީހުން ހިންގިކަން ސާބިތުވުމުން ކަމަށެވެ.
އަައްސަބާ ނޫސްއެެޖެންސީން ބުނި ގޮތުގައި ކޯޓުން ހުކުމްކުރީ އެ މީހުންގެ ގަޔަށް ބަޑިޖަަހައި މެރުމަށެވެ.
ހުކުމް އިއްވި މީހުންގެ ތެރެއިން ބައެއް މީހުންގެ ވަކީލެއްގެ ގޮތުގައި މަސައްކަތްކުރައްވާ އަބްދުލް ބާސިތު ގާޒީ ސޯޝަލްމީޑިއާގައި ކުރެއްވި ޕޯސްޓެއްގައި ވިދާޅުވީ އެ މީހުންނަށް އިއްވި ހުކުމް އިސްތިއުނާފުކުރުމުގެ ފުރުސަތު އެބަ އޮތް ކަމަށެވެ.
އެ މީހުންނާ ދެކޮޅަށް އުފުލި ދައުވާތަކުގެ ތެރޭގައި ޔަމަނާ ދުޝްމަން ކަން އޮތް ބޭރު ގައުމުތަކަކާ 2024 ވަނަ އަހަރުން ފެށިގެން ގުޅިގެން މަސައްކަތް ކުރުމުގެ ކުށުގެ ދައުވާ އާއި އެގައުމުތަކުގެ އޮފިސަރުން މެދުވެރިކޮށް އެ ގައުމުތަކަށް ޖާސޫސްކޮށްދިނުމުގެ ކުށުގެ ދައުވާ ހިމެނެ އެވެ. ދައުވާގައިވާ ގޮތޮން އެ މީހުން ޖާސޫސްކޮށްދިނީ އިޒްރޭލުގެ ޖާސޫސީ އިދާރާ މޮސާޑާއި އެމެރިކާ ސައުދީ އަދި އިނގިރޭސިވިލާތުގެ ޖާސޫސީ އިދާރާތަކަށެވެ.
ހޫތީންގެ ވެރިކަމާ ދެކޮޅަށް މީހުން ރެކްރޫޓްކުރުމާއި އަސްކަރީ އަދި މަދަނީ އަމާޒުތަކަށް ދިން ހަމަލާތަކުގައި އެތައް ބަޔަކު މެރުމާިއ އިންފްރާސްޓްރަކްޗާ ހަލާކުކުރުމަށް އެމީހުން އެހީތެރިވި ކަމަށް ވެސް އެމީހުންނަށް ކުރި ދައުވާގައި ބުންޏެވެ.
އެ މައްސަލާގައި ޝާމިލުވިކަން ސާބިތުވި އަންހެނަކާއި ފިރިހެނަކު 10 އަހަރަށް ޖަލަށްލާން ވެސް ހުކުމްކުރި އެވެ. އަދި އެހެން މީހަކު ކުށްވެރިނުވާ ކަމަށް ވެސް ކަނޑައެޅި އެވެ.
އިޒްރޭލުން ފަލަސްތީނުގެ ޣައްޒާއަށް މެދުނުކެނޑި ހަމަލާދީ 67،000 އަށް ވުރެ ގިނަ މީހުން ޝަހީދުކުރި ގަތުލުއާލުއްމުތައް ހިންގަމުން ދިޔަ އިރު ހޫތީން ދިޔައީ އިޒްރޭލަށް އެކި ގޮތް ގޮތުން ހަމަލާދެމުންނެވެ. އެ ހަމަލާތަކުގެ ދިފާއުގައި ކަމަށް ބުނެ އިޒްރޭލުން ޔަމަނަށް އެތައް ފަހަރަކު ބޮން އެޅި އެވެ.
އިޒްރޭލަށާއި އެމެރިކާއަށް ޖާސޫސްކޮށްދޭ ކަމުގެ ތުހުމަތަށް ހޫތީން އެތައް ބަޔަކު ހައްޔަރުކުރީ އެ ދުވަސްވަރު އެވެ. މަރުގެ ހުކުމް އިއްވި 17 މީހުންނަކީ އޭރު ހައްޔަރުކުރި މީހުންގެ ތެރޭގައި ހިމެނޭ ބައެކެވެ.