23 ނޮވެމްބަރ 2025 - 15:08
މެދުރާއްޖެތެރޭގެ ރަށެއްގައި ކުއްޖަކަށް ގަދަކަމުން ސިނގިރޭޓް ބޯންދީ ބިރު ދެއްކި މައްސަލަ އިދާރާތަކާ ގުޅިގެން ބަލަމުން އަންނަ ކަމަށް ފުލުހުން ބުނެފި އެވެ.
ފުލުހުން ބުނީ ދައުލަތުގެ ބެލުމުގެ ދަށުގައި އަތޮޅުތެރޭގެ ރަށެއްގައި ތިބޭ ކުދިންތަކެއް އެ ރަށުގެ ކުއްޖަކަށް ގަދަކަމުން ސިނގިރޭޓް ދިން މައްސަލަ އިއްޔެ ހަވީރު 6:35 ހާއިރު ރިޕޯޓްކޮށްފައިވާ ކަމަށެވެ.
އެ މައްސަލަ ކަމާ ގުޅޭ އިދާރާތަކާ ގުޅިގެން ބަލަމުން އަންނަ ކަމަށް ފުލުހުން ބުންޏެވެެ.
ސޯޝަލް މީީޑިއާގައި އެ ކުއްޖާގެ ބައްޕަ ބުނީ ސޯޝަލް އެންޑް ފެމިލީ މިނިސްޓްރީގެ ބެލުމުގެ ދަށުން ބަލަހައްޓާ 17 އަހަރުގެ ދެ ކުއްޖަކު ވަނީ އޭނާގެ 10 އަހަރުގެ ފިރިހެން ދަރިފުޅު، މަޣުރިބު ނަމާދަށް ދިޔަ މަގުމަތީގައި ފަޅު ގެއަކަށް ގެންގޮސް ބިރު ދައްކާފައި ކަމަށެވެ.
އޭނާ ބުނި ގޮތުގައި އެ މީހުން ވަނީ ކުއްޖާއަށް ގަދަކަމުން ސިނގިރޭޓު ބޯންދީ ކުއްޖާގެ ގައިގައި ސިނގިރޭޓު ބަޓު ޖައްސާފައިވެ އެވެ. އެކަން މައިންބަފައިންގެ ގާތުގައި ބުނެފި ނަމަ، އެމީހުން މަރާލާނެ ކަމުގެ އިންޒާރު ވެސް އެ ކުއްޖާއަށް ދީފައިވާ ކަމަށް ބުންޏެވެ.
އެ ހާދިސާއަށް ފަހު އެ ކުއްޖާ ހުރީ ބިރުން ކަމަށާއި ވާހަކަ ވެސް ނުދެއްކޭ ކަމަށް ބުނެ ބައްޕަ ވަނީ ނުރުހުން ފާޅުކޮށްފަ އެވެ. އަދި އެ މައްސަލަ ބަލައި އަވަހަށް ފިޔަަވަޅު އެޅުމަށް އިދާރާތަކަށް ގޮވާލި އެވެ.