23 ނޮވެމްބަރ 2025 - 15:04
ހުޅުމާލޭ ފަރުމަތިން "ނެރެއް" ހަދަން އުޅުނީ ހުއްދަ ނުނަގައި ކަމަށާއި އެކަމާ ގުޅިގެން ފަރަށް ލިބުނު ގެއްލުން ބަލައި ފިޔަވަޅު އަޅާނެ ކަމަށް އެންވަޔަރަމެންޓަލް ރެގިއުލޭޓަރީ އޮތޯރިޓީ (އީއާރުއޭ) ގެ ޗީފް އެގްޒެކްޓިވް ހައްސާން މުހައްމަދު މިއަދު ވިދާޅުވެއްޖެ އެވެ.
ހުޅުމާލޭ 1 ގެ އިރުމަތީ ފަރާތުގައި އެންމެ ރީއްޗަށް ބީޗް އޮންނަ އަދި ގެސްޓް ހައުސްތައް ގިނަ ސަރަހައްދުގެ ފަރަށް ގެއްލުންދީ ނެރެއް ގޮތަށް ކަނޑައި މަގެއް ހެދީ މިދިޔަ ބުދަ ދުވަހުގެ އިރުއޮއްސުނު ވަގުތު ވަރަށް ބޮޑަށް ދިޔަވަރު ހިކިފައި އޮއްވަ އެވެ.
އެ މައްސަލާގައި ހައްސާން، "މިހާރު" އަށް ވިދާޅުވީ އެކަމާ ގުޅިގެން މިހާތަނަށް ވާހަކަ ދައްކާފައިވަނީ އެޗްޑީސީއާ ކަމަށާއި އެކަން ކުރި ފަރާތްތަކުގެ މައުލޫމާތު، އެ ކުންފުނިން އެ އިދާރާއަށް އަންގާފައިވާ ކަމަށެވެ.
"އެމީހުން ނެރެއް ކަހަލަ އެއްޗެއް ހަދަން އުޅުނީ. އެކަމަކު އެ ކަންކަމަކީ ހުއްދަ ހޯދައިގެން ކުރެވޭ ކަންކަމަށް ވާއިރު މި ފަރާތްތަކުން އެފަދަ ހުއްދައެއް ނެތް ހޯދާފައެއް،"
އީއާރުއޭ އިން ބުނީ މި މައްސަލައިގައި ހިމެނޭ މީހުންނާ ސުވާލުކޮށް، ޖަވާބުދާރީވުމަށް ފުރުސަތު ދޭނެ ކަމަށާއި ތަހުގީގަށް ފަހު ފިޔަވަޅު އަޅާނެ ކަމަށެވެ.
ތިމާވެށީގެ ގަވާއިދު އޮންނަ ގޮތުން މި ފަދަ އަމަލުތައް ހިންގާ ފަރާތްތައް ބޮޑެތި އަދަދުތަކުން ޖޫރިމަނާ ކުރެވެ އެވެ.
ހައްސާން ވިދާޅުވި ގޮތުގައި އެ އިދާރާ އިން ސައިޓަށް ގޮސް، އެތަނަށް ލިބުނު ގެއްލުން ވެސް ދިރާސާ ކުރާނެ އެވެ.
"ސައިޓަށް ގޮސްގެން އެތަނަށް ލިބުނީ ކިހާ ވަރެއްގެ ގެއްލުމެއްތޯ އަޅުގަނޑުމެންގެ ކޮމްޕްލަޔަންސް އިން ބަލާނެ. ޑެމޭޖް އެސެސްކުރުމަށް ފަހު ފިޔަވަޅު އަޅާނީ،" ހައްސާން ވިދާޅުވި އެވެ.
ފަރުމަތިން ވަކި ހިސާބަކުން ގާތައް ނަގައި އަދި ފަރުމަތިން ގާތައް ތަޅަން ހައެއްކަ މީހުން އުޅުނީ ދަގަނޑު ފަދަ އާލާތްތަކާ އެކު އެވެ.
ހުޅުމާލޭގައި އުޅޭ މީހުން ބުނާ ގޮތުގައި މިގޮތަށް ފަރުމަތިން އަދި ފަޅު ތެރެއިން ގާ ނަަގައި ވޯޓަ ސްޕޯޓްސްގައި ގެންގުޅޭ އުޅަނދުތަކަށް ޖާގަ ހެދުމަކީ ހުޅުމާލޭގައި އާންމުކޮށް ކުރާކަމެކެވެ.
ފަރަށް ގެއްލުންދީ ފަރުމަތިން ކަނޑިންމައެއް ގޮތަށް ޖާގައެއް ހަދަން އުޅުނު މި މައްސަލަ ފެންމަތިވެފައި ވާއިރު އެޗްޑީސީން މީގެ ދުވަސްކޮޅެއް ކުރިން ވަނީ ހުޅުމާލެ 1 އާއި 2 ގުޅުވައިދޭ ހުޅުމާލެ ޗެނަލް ޕާކުގެ މޫދަށް ކަނޑު އުޅަނދުތަކަށް ނުވަދެވޭ ގޮތް ހަދައިފަ އެވެ. މޫދަށް އެރެން އެތަން ބޭނުންކުރަމުން ދިޔައިރު ވެސް އެ ހަނި ޖާގައިގެ ތެރޭގައި ވެސް ޖެޓްސްކީ ފަދަ އެއްޗެހި ބާރު ސްޕީޑު ނުރައްކާތެރިކޮށް ދުއްވަ އެވެ.