24 ނޮވެމްބަރ 2025 - 06:08
މިޔަންމާ އާއި ތައިލެންޑް ގުޅޭ ބޯޑަރު ސަރަހައްދުގައި ސެންޓަރުތައް ހަދައިގެން ފުޅާ ދާއިރާއެއްގައި ކުށްކުރަމުން ދިޔަ ސްކޭމަރުންގެ ގާތްގަނޑަކަށް 1،600 މީހުން ހައްޔަރުކޮށްފައިވާ ކަމަށް މިޔަންމާގެ އަސްކަރީ ސަރުކާރުން ބުނެފި އެވެ.
މީޑިއާއަށް ވަރަށް ބޮޑަށް އާންމުކޮށްގެން ފަސް ދުވަހަށް ކުރިއަށް ގެންދިޔަ އޮޕަރޭޝަނުގައި އަތުލައިގަތް އެންމެންނަކީ ވެސް މިޔަންމާ ސަރުކާރުން ބުނި ގޮތުގައި އެހެން ގައުމުތަކުގެ މީހުންނެވެ.
ހަނގުރާމައިގެ ސަބަބުން ހަމަޖެހުން ގެއްލިފައިވާ މިޔަންމާގެ ބޯޑަރު ސަރަހައްދުގައި ސްކޭމް ފެކްޓްރީތައް ވަނީ އިންތިހާއަށް ގިނަވެފަ އެވެ. ލޯތްބާއި އެތައް ބިލިއަން ޑޮލަރުގެ ވިޔަފާރީގެ ފުރުސަތުތަކުގެ ދަޅަ ދައްކައިގެން އިންޓަނެޓްގައި މީހުން މަޅީގައި ޖައްސާ އެތައް ހާސް ސްކޭމަރުންނެއް އެ ތަންތަނުގައި ހަރަކާތްތެރި ވެ އެވެ.
މިޔަންމާ ސަރުކާރުން ސްކޭމް ގޭންގްތަކަށް އެއްބާރުލުންދޭ ކަމަށް ތުހުމަތުކުރެވޭތާ އެތައް ދުވަހެއް ވެފައި ވަނިކޮށް، އެ ގޭންގުތަކާ ދެކޮޅަށް ފިޔަވަޅު އަޅަން ފެށީ މާހިރުން ދެކެވަަޑައިގަންނަވާ ގޮތުގައި ޗައިނާއިން އެކަމަށް ބާރުއެޅުމުންނެވެ. މިޔަންމާގެ އަސްކަރީ ސަރުކާރަށް އެންމެ ބޮޑަށް މަދަދުކުރާ ގައުމަކީ ޗައިނާ އެވެ.
މަަޝްރަހު ދިރާސާކުރާ ބައެއް ފަރާތްތަކުން ދެކޭ ގޮތުގައި ސްކޭމަރުންނާ ދެކޮޅަށް މިދިޔަ މަހުން ފެށިގެން ހިންގަމުން އަންނަ ރެއިޑްތަކަކީ ޗައިނާއަށް އޮޅުވައިލުމަށް އަޅުވާ "ސްމޯކް ސްކްރީން" އެކެވެ.
އެ ރެއިޑްތައް ކުރިއަށް ގެންދަނީ ސްކޭމް މެދުވެރިކޮށް މިޔަންމާ ސަރުކާރަށް ލިބޭ ފައިސާ މާބޮޑަށް މަދުނުވާނެ ގޮތަކަށް ކަމަށް ވެސް މޮނިޓަރުން ދެކެ އެވެ.
މިޔަންމާ ސަރުކާރުގެ "ދަ ގްލޯބަލް ނިއު ލައިޓް އޮފް މިޔަންމާ" ނިއުސް އެޖެންސީން ބުނީ މި މަހުގެ 18 އިން 22 އަށް ހިންގި އޮޕަރޭޝަންތަކުގައި 1،590 މީހަކު ހައްޔަރުކޮށްފައިވާ ކަމަށެވެ. އެ އޮޕަރޭޝަން ހިންގީ ސްކޭމް ހިންގާ ސަރަހައްދެއްގެ ގޮތުގައި މަޝްހޫރު "ޝްވީ ކޮކޯ" ނަމަކަށްކިޔާ ސަރަހައްދުންނެވެ.
އެމީހުން ހައްޔަރުކުރުމުގެ އިތުރުން ސްކޭމަރުން ބޭނުންކުރާ އަދަދެއްގެ 2،893 ކޮމްޕިއުޓަރާއި 21،750 ފޯނާއި 101 ސްޓާލިންކް ސެޓެލައިޓް ރިސީވަރާއި 21 ރައުޓަރު ވެސް މިޔަންމާ ސިފައިން އަތުލައިގަތެވެ.
އޮންލައިންކޮށް މަކަރާ ހީލަތްހެދުމުގެ ތުހުމަތުކުރެވޭ 223 މީހުން އެ އޮޕަރޭޝަންގެ ތެރެއިން ހައްޔަރުކޮށްފާވާ ކަމަށް މިޔަންމާ ސަރުރުގެ ނިއުސް އެޖެންސީން ބުންޏެވެ. -- އޭއެފްޕީ