23 ނޮވެމްބަރ 2025 - 14:30

މޯލްޑިވިއަނުން އިންޑިއާގެ ކޮޗިން އާއި ޓްރިވެންޑްރަމަށް ހަފްތާއަކު ފަސް ފްލައިޓް ބާއްވަން ނިންމައިފި އެވެ.
ގައުމީ އެއާލައިން ކަމަށްވާ މޯލްޑިވިއަނުން ބުނީ ދިވެހިން އެންމެ ގިނައިން ދަތުރުކުރާ އިންޑިއާގެ ދެ މަންޒިލް ކަމަށްވާ ކޮޗިން އާއި ޓްރިވެންޑްރަމަށް ކުރާ ދަތުރުތައް އިތުރު ކުރުމުގެ ގޮތުން އަންނަ މަހުގެ 19 ވަނަ ދުވަހުން ފެށިގެން އެ ދެ ސިޓީއަށް ހަފްތާއަކު ފަސް ފްލައިޓް ބާއްވާނެ ކަމަށެވެ.
އެހެންވެ، އާދިއްތަ ދުވަހާއި އަންގާރަ ދުވަސް ފިޔަވައި އެހެން ހުރިހާ ދުވަހަކު ދަތުރުތައް ބާއްވާނެ އެވެ.
އެ އެއާލައިނުން މިވަގުތު ކޮޗިން އާއި ޓްރިވެންޑަރަމަށް ހަފުތާއަކު ކުރަނީ ހަތަރު ދަތުރެވެ.
ކޮޗިން އާއި ޓްރިވެންޑްރަމަށް ކުރާ ދަތުރުތައް އިތުރުކުރަން ނިންމިއިރު، ސްރީލަންކާގެ ކޮލަމްބޯއަށް ދަތުރު ކުރުމަށް އަގުހެޔޮ ފެއާއެއް ވެސް މޯލްޑިވިއަން އިން ވަނީ އިއުލާންކޮށްފަ އެވެ. އެ ފެއާގެ ދަށުން 99 ޑޮލަރަށް ޓިކެޓް ލިބޭ ފެއާގެ ދަތުރުތައް އޮންނާނީ އަންނަ މަހުގެ ހަތް ވަނަ ދުވަހާއި ނުވަ ވަނަ ދުވަހު އެވެ.