23 ނޮވެމްބަރ 2025 - 12:55
ޖައްވަށް ވިހަ ގޭސް ބޭރުކުރުމާ ގުޅޭ ބޮޑު ބަހުސަކަށް ފަހު، އެ ނައްތާލުމަށް އަޅާނެ ސީދާ އެއްވެސް ފިޔަވަޅެއް ނުހިމެނޭ އެއްބަސްވުމަކާ އެކު، ދުނިޔޭގެ ތިމާވެށީގެ އެންމެ ބޮޑު ކޮންފަރެންސް "ކޮޕް"ގެ މި އަހަރު ސަމިޓު މިއަދު ނިންމާލައިފި އެވެ.
އދ. ގެ "ކޮޕް30" ސަމިޓު ފެށީ މި މަހު 10 ގައި ބްރެޒިލްގެ ރިމޯޓް ސިޓީއެއް ކަމަށްވާ ބެލެމްގަ އެވެ. ޕެރިސް އެގްރީމެންޓަށް 10 އަހަރު ފުރުމުގެ މުނާސަބަތުގައި މިފަހަރުގެ ސަމިޓު އިޝްތިހާރުކުރީ "އިމްޕްލިމެންޓޭޝަން ކޮޕް"ގެ ގޮތުގަ އެވެ.
ބޭރުގެ ނޫސްތަކުގައި ބުނީ ދުނިޔޭގެ މޫސުމަށް އަންނަ ބަދަލުތަކުގައި އެންމެ ބޮޑު ދައުރެއް އަދާކުރާ އެއްޗަކީ ޖައްވަށް ދޫކުރާ ވިހަ ގޭސްތައް ކަމަށް ވިޔަސް، މި އަހަރުގެ ސަމިޓް ނިންމާލުމަށް ހެދި އެއްބަސްވުމުގައި އެކަމަށް ސީދާ އިޝާރާތް ކޮށްފައި ނުވާ ކަމަށެވެ.
ޖައްވަށް ވިހަ ގޭސް ބޭރުކުރުން މަދުކުރުމަށް ގިނަ ގައުމުތަކަކުން ތާއީދުކުރި ނަމަވެސް، އެކަން ކުރާނެ ސާފު މަގުޗާޓެއް މިފަހަރުގެ އެއްބަސްވުމުގައި ހިމެނޭ ގޮތެއް ނުވި ކަމަށް ރިޕޯޓްތައް ބުންޏެވެ.
• މޫސުމީ ފައިނޭންސް: ތަރައްގީވަމުން އަންނަ ގައުމުތަކަށް މޫސުމީ ފައިނޭންސް އިތުރުކުރުމަށް ވީ ވައުދަކީ ކުރިއެރުން ލިބުނު
• އެޑަޕްޓޭޝަން ފަންޑް ތިންގުނަ އިތުރުކުރުން: ނާޒުކު ގައުމުތަކަށް އެހީވުމަށް 2035 ވަނަ އަހަރަށް އެޑަޕްޓޭޝަން ފިޔަވަޅުތަކަށް ދޭ ފައިސާ ތިންގުނަ ކުރުމަށް މުއްސަނދި ގައުމުތަކުން އެއްބަސްވި.
• 1.3 ޓްރިލިއަން ޑޮލަރުގެ މަގުޗާޓެއް: ބާކޫ-ޓޫ-ބެލެމް ރޯޑްމެޕް މެދުވެރިކޮށް 2035 ވަނަ އަހަރަށް އަހަރަކު 1.3 ޓްރިލިއަން ޑޮލަރުގެ މޫސުމީ ފައިނޭންސް ހޯދުމަށް ކުރާ މަސައްކަތަށް ތާއީދުކުރި.
• ޖަސްޓް ޓްރާންސިޝަން މެކޭނިޒަމް: ފެހި އިގުތިސާދަކަށް އިންސާފުވެރި އަދި ހަމަހަމަ ބަދަލެއް ގެނައުމަށް ޖަސްޓް ޓްރާންސިޝަން މެކޭނިޒަމް (ޖޭޓީއެމް) އެއް ފާސްކުރި. އެއީ މަދަނީ ޖަމިއްޔާތަކުން ބޮޑު ކާމިޔާބެއްގެ ގޮތުގައި ފާހަގަކުރި ކަމެއް.
• ޖަންގަލިތައް ރައްކާތެރިކުރުން: ބްރެޒިލްގެ އަމިއްލަ "ޓްރޮޕިކަލް ފޮރެސްޓްސް ފޯއެވާ ފެސިލިޓީ" ލޯންޗުކުރި. އެކި ގައުމުތަކުން ބިލިއަން ޑޮލަރު ދޭން ވައުދުވެފައިވާ އެ ފަންޑުން ޖަންގަލިތައް ހިމާޔަތްކުރުމަށް ފަންޑުކުރާނެ.
• ފުރަތަމަ ފަހަރަށް ސިއްހަތާއި ޖިންސީ ތަފާތުކުރުންތަކާ ގުޅޭ އެކްޝަން ޕްލޭނެއް ހެދުން.
• ވިހަ ގޭހުގެ މައްސަލާގައި ކުރިއެރުމެއް ނުލިބުން: ތެޔޮ އުފައްދާ ގައުމުތަކުން ވަރަށް ބޮޑަށް ލޮބީކުރުމުގެ ނަތީޖާއެއްގެ ގޮތުން "ފޮސިލް ފިއުލް" ބޭނުންކުރުން ހުއްޓާލުމުގެ މަގުޗާޓެއްގެ ވާހަކަ އެންމެ ފަހުން ހެދި އެއްބަސްވުމުން އުނިކުރި.
• ލިޔުންތައް ބަލިކަށިވުން: ގިނަ ބަޔަކު މާޔޫސްވި އެއް ކަމަކީ ދުނިޔޭގެ ހޫނުމިން 1.5 ޑިގްރީ ސެލްސިއަސްއަށް ވުރެ މައްޗަށް ދިޔަ ނުދިނުމަށް ކުރާ މަސައްކަތަށް މިފަހަރުގެ ސަމިޓުގައި ހެދި އެއްބަސްވުމުގައި މާ ބޮޑު ސަމާލުކަމެއް ދީފައި ނެތުމުން.
• ގަސްކެނޑުން ހުއްޓުވުމުގެ މަގުޗާޓު ފެއިލްވުން: ގަސްކެނޑުން ހުއްޓުވުމުގެ މަގުޗާޓެއްގެ މަޝްވަރާ މިފަހަރުގެ ކޮޕްގައި ކުރިއަށް ދަނިކޮށް ވަނީ ހުއްޓުވައިފައި.
• އެމެރިކާގެ މަންދޫބުން ނެތުން: މިފަހަރުގެ ސަމިޓަށް އެމެރިކާގެ ވަފުދެއް ނުދިއުންވީ މޫސުމީ ބަދަލުތައް ކުޑަކުރުމަށް ކުރާ މަސައްކަތް ބައެއް ގައުމުތަކުން ދެކޮޅު ހެދުމަށް ލިބުނު ހިތްވަރަކަށް.
އަންނަ އަހަރުގެ ކޮޕް ސަމިޓު ބާއްވަން އޮސްޓްރޭލިއާ އާއި ތުރުކީން ބިޑް ކުރި ނަމަވެސް، ފަހު ވަގުތު އޮސްޓްރޭލިއާ އިން ވަނީ އެ ބިޑް އަނބުރާ ގެންގޮސްފަ އެވެ. އެހެންވެ، އެ ސަމިޓު އަންނަ އަހަރު ބާއްވާނީ ތުރުކީގަ އެވެ.