23 ނޮވެމްބަރ 2025 - 13:56
އަސާސީ މުސާރައަށް ގެނައި ބަދަލުތަކުން ސިވިލް ސާވެންޓުންނަށް 15-150 ޕަސެންޓުގެ ކުރިއެރުމެއް ލިބިފައިވާ ކަމަށް، ނޭޝަނަލް ޕޭ ކޮމިޝަނުން ބުނެފި އެވެ.
އެ ކޮމިޝަންގެ އިސް އޮފިޝަލަކު މިދިޔަ ބުރާސްފަތި ދުވަހު "މިހާރު" އަށް ވިދާޅުވީ ސިއްހީ އަދި ތައުލީމީ ދާއިރާ ފިޔަވައި އެހެން އިދާރާތަކުގެ މުސާރައަށް ބޮޑު ކުރިއެރުމެއް ގެނެސްފައިވާ ކަމަށެވެ. އަދި އަލަށް އެކުލަވާލި އޮނިގަނޑުގައި 400 އަށްވުރެ ގިނަ މެޓްރިކްސް ހިމަނާފައިވާ ކަމަށް އޭނާ ވިދާޅުވި އެވެ.
ސިވިލް ސާވިސްގައި އެންމެ ގިނަ މުވައްޒަފުން ތިބީ އެންމެ ދަށް ރޭންކު، ޖީއެސް-3 ގަ އެވެ. ނަމަވެސް، އޮނިގަނޑުތައް މީގެ ކުރިން ހަދާފައިވަނީ އެ މުވައްޒަފުންނަށް ކުރިއަށް ދެވޭ ގޮތަކަށް ނޫނެވެ.
"އެކިއެކި ފަންނުތަކަށް އެހެރީ ވަކިވަކި އޮނިގަނޑުތަކެއް ހެދިފައި. ހުންނާނެ ކޮންމެ ދާއިރާއަކުން ވެސް ކެރިއަ ޕާތު ކުރިއަށް ދެވޭނެ. ކުރީގައި މި އޮންނަ ގޮތަކީ، ސަރުކާރު އިދާރާތަކުގައި މި އޮންނަނީ މައްޗަށް ދާން ބޭނުންވަންޏާ ޑިރެކްޓަރަށް ނޫނީ މެނޭޖީރިއަލް މަގާމަކަށް މި ބަދަލުވާން ޖެހެނީ. ދެން ނުޖެހޭނެ. ޕްރޮފެޝަނަލް ބައިގައި ހުރެގެން ވެސް ކުރިއަށް ދެވޭނެ މަގު އޮންނާނެ،" އޮފިޝަލް ވިދާޅުވި އެވެ.
"ހަގީގަތުގައި އައި ވަރަށް ބޮޑު ބަދަލެއް. ބައެއް ފަންނުތަކުގައި އެ ފުރުސަތެއް ނެތް. އެކަމަކު، މިހާރު މި ގެނައި ބަދަލުތަކުގައި ހުރިހާ ފަންނުތަކުގައި ވެސް ހުންނާނެ ވަކިވަކި ދާއިރާތަކުން ސްޕެޝަލައިޒްވެގެން ކޮންމެހެން މެނޭޖަރު ކެޓަގަރީއަށް ނުގޮސް ހަމަ ޕްރޮފެޝަނަލީ މައްޗަށް ދެވޭ ގޮތަށް. ނިޒާމަށް އައި ވަރަށް ބޮޑު ބަދަލެއް މިއީ."
ސިވިލް ސާވެންޓުންގެ މުސާރައަށް މި މަހުން ފެށިގެން ބަދަލުތައް ގެނައި އިރު، މަސައްކަތަށް ނުކުންނަ ދުވަސްތަކަށް ހާޒިރީ އެލަވަންސެއް ވަނީ ކަނޑައަޅައިފަ އެވެ. ނަމަވެސް، އެލަވަންސް ކަނޑައަޅާފައިވަނީ މަހުގެ 15 އިން 15 އަށް ކަމަށް ވާތީ، މި މަހު ލިބޭނީ އެލަވަންސްގެ އެއް ބަ އެވެ.
ބޮޑު މުސާރަ ލިބެން ފަށާނީ އަންނަ މަހުން ފެށިގެންނެވެ.
އޮފިޝަލް ވިދާޅުވީ މުސާރައަށް އެންމެ ބޮޑު ބަދަލެއް އައި އެއް އިދާރާއަކީ އޭވިއޭޝަން ސެކިއުރިޓީ ކޮމާންޑު ކަމަށެވެ. އޭގެ އިތުރުން، އެންމެ މަދުން މުސާރަ ލިބޭ އިދާރާތަކުގެ މުވައްޒަފުންނަށް ބޮޑު ކުރިއެރުމެއް ލިބިފައިވާކަން ފާހަގަކުރެއްވި އެވެ.