23 ނޮވެމްބަރ 2025 - 11:45
ރަސްމީގަޑީގެ މަސައްކަތްތައް ނުރަސްމީގަޑީގައި ކުރެވޭ ގޮތަށް ދައުލަތުގެ ޕޭ ފްރޭމްވޯކަށް މިދިޔަ މަހު އިސްލާހު ގެނެސްފައިވާތީ، ބޭނުންވާ އޮފީސްތަކަށް މިހާރު އެ އުސޫލަށް އަމަލު ކުރެވޭނެ ކަމަށް ނޭޝަނަލް ޕޭ ކޮމިޝަނުން ބުނެފި އެވެ.
އެ ކޮމިޝަންގެ އިސް އޮފިޝަލަކު މިދިޔަ ބުރާސްފަތި ދުވަހު "މިހާރު" އަށް ވިދާޅުވީ "ފްލެކްސިބްލް ވޯކިން ޓައިމް" ހަމަޖެއްސީ ބައެއް އޮފީސްތަކުގެ މަސައްކަތްތައް ރޭވިފައިވާ ގޮތުން ބައެއް މުވައްޒަފުންނަށް ރަސްމީގަޑީގައި މާ ގިނަ މަސައްކަތްތަކެއް ކުރެވޭނެ ގޮތް ހަމަޖެހިފައި ނޯންނާތީ ކަމަށެވެ.
"މިސާލަކަށް މެއިންޓަނެންސްގެ މަސައްކަތް ކުރާ މުވައްޒަފުން. އެ މީހުންނަށް ގިނަ މަސައްކަތްތައް ކުރެވޭނީ އޮފީހުން މުވައްޒަފުން ނުކުތުމަށް ފަހު. މެއިންޓަނެންސް މަސައްކަތް ކުރާ މީހުން ހެނދުނު 8 އިން މެންދުރު 2 ޖަހަންދެން އޮފީހުގައި އިނދެފައި އޭގެ ފަހުން އޯވަޓައިމް ނަގަންޖެހޭ ހާލަތްތަކެއް މި އަންނަނީ. އެއީ އެންމެ އެފިޝަންޓް ގޮތަކަށް ނުވެދާނެ،" އޮފިޝަލް ވިދާޅުވި އެވެ.
މެއިންޓަނެންސް މުވައްޒަފުންގެ އިތުރުން އެކި ކަހަލަ އިންސްޕެކްޝަންތަކާއި ސާވޭތައް ކުރާ މުވައްޒަފުންނާއި އައިޓީ ދާއިރާގައި ސޮފްޓްވެއާ ޑިވެލޮޕަރުންގެ ގޮތުގައި ހަރަކާތްތެރިވާ މުވައްޒަފުންނަށް ވެސް "ފްލެކްސިބްލް ވޯކިން ޓައިމް" އަށް އަމަލު ކުރެވޭނެ ގޮތަށް މިހާރު އޮފީސްތަކަށް ފަހިކޮށްދީފައިވާނެ ކަމަށް ޕޭ ކޮމިޝަނުން ބުންޏެވެ.
"އެހެންވެ އަޅުގަނޑުމެން މިހާރު ހުއްދަ ދީފައި އޮންނާނެ މި ގޮތަށް ފްލެކްސިބްލްކޮށް މަސައްކަތު ގަޑި ކަނޑައަޅަން. ކޮންމެހެން އޮފީހަށް ހާޒިރުވާން ނުޖެހޭ މީހުން ތިބޭނެ. ބޭނުންވަނީ ތަފާތު ގޮތްގޮތަށް ކަންކަން ރާވައިގެން ވެސް ނަތީޖާ ހާސިލް ކުރަން،" ޕޭ ކޮމިޝަންގެ އޮފިޝަލް ވިދާޅުވި އެވެ.
"ރަސްމީގަޑި އަށް އައިސްފައި ސައިންއައުޓް ވީމާ އަދި އެއީ ނަތީޖާ ނެރުމެއް ނޫން. ރައްޔިތުންނަށް ރަނގަޅު ހިދުމަތެއް ދިނުމަށްޓަކައި ވޯކިން އެންވަޔަރުމެންޓުގެ ކަލްޗާ އެބަޖެހޭ ބަދަލުވާން."
ދައުލަތުގެ ޕޭ ފްރޭމްވޯކަށް 2022 ގައި އަމަލުކުރަން ފެށި ފަހުން، ދައުލަތުގެ ވަޒީފާގައި މަސައްކަތްކުރާ އެންމެ ގިނަ ބަޔަކަށް މުސާރައިގެ ކުރިއެރުން މި މަހުން ފެށިގެން ލިބޭނެ ކަމަަށް ފިނޭންސް މިނިސްޓްރީން ވަނީ ބުނެފަ އެވެ. ސަރުކާރުން ބުނެފައިވާ ގޮތުން އަސާސީ މުސާރަ ވެސް 7،400 އަށް ވުރެ އެއްވެސް މުވައްޒަފަކަށް މި މަހުން ފެށިގެން ދަށް ނުވާނެ އެވެ. މިހާތަނަށް އަސާސީ މުސާރައިގެ ގޮތުގައި ބައެއް މުވައްޒަފުންނަށް 3،100ރ. ވެސް ލިބިފައިވާ ކަމަށް ޕޭ ކޮމިޝަނުން ބުނެފައި ވެ އެވެ
ދައުލަތުގެ ޕޭ ފްރޭމްވޯކަށް 2022 ގައި އަމަލުކުރަން ފަށައި އެންމެ ފުރަތަމަ މުސާރައިގެ ކުރިއެރުން ދިނީ ތައުލީމީ ދާއިރާ އާއި ސިއްހީ ދާއިރާ އަދި ޔުނިވާސިޓީގެ މުވައްޒަފުންނަށެވެ. އާ ފްރޭމްވޯކާ އެކު، މުސާރައިގެ ކުރިއެރުން ގެނެސް އެ ދާއިރާތަކުގައި އޯވަޓައިމްގެ އުސޫލު ވެސް ބަދަލުކޮށްފައިވާއިރު ނަތީޖާ ރަނގަޅު ކަމަށް ޕޭ ކޮމިޝަނުން ވަނީ ބުނެފަ އެވެ.