22 ނޮވެމްބަރ 2025 - 23:01
ދިރާގު ދިވެހި ޕްރިމިއާ ލީގުގައި މިރޭ އިބްރާހިމް ވަހީދު ހަސަން (އިއްބެ ވަހީދު) ކާމިޔާބު ކޮށްދިން ލަނޑުން އޮޑި ސްޕޯޓްސް ކްލަބުން 1-0 އިން ނިއު ރޭޑިއަންޓް ސްޕޯޓްސް ކްލަބް ބަލިކޮށް ލީގު ތާވަލްގެ ދެވަނައަށް ޖެހިލައިފި އެވެ.
މިއީ ނިއު އަލުން މި ސީޒަންގައި އެއްވަނަ ޑިވިޝަންގައި ވާދަކުރަމުން އަންނަ އިރު، އެ ޓީމު ބަލިވި ފުރަތަމަ މެޗެވެ. މިއާ އެކު ލީގުގައި މިހާތަނަށް ބަލި ނުވެ އޮތް ހަމައެކަނި ޓީމަކީ ޗެމްޕިއަން މާޒިޔާ އެވެ. ނިއު އާއި އޮޑި ވެސް ވަނީ އެއް މެޗުން ބަލިވެފަ އެވެ. އޮޑި ބަލިވީ މި ނިމުނު އިންޓަނޭޝަނަލް ބްރޭކުގެ ކުރިން އެންމެ ފަހުން އެޓީމު ކުޅުނު މެޗުގައި މާޒިޔާ އަތުން މެޗުގެ އެންމެ ފަހު ވަގުތުކޮޅުތެރޭގަ އެވެ.
ލީގު ތާވަލްގެ އެއްވަނައިގައި އޮތީ މިހާތަނަށް ކުޅުނު އަށް މެޗުން ވެސް މޮޅުވެގެން، 24 ޕޮއިންޓް ހޯދާފައިވާ މާޒިޔާ އެވެ. އޮޑި ދެވަނައަށް ޖެހިލީ 19 ޕޮއިންޓް ހޯދައިގެންނެވެ. އަދި 17 ޕޮއިންޓް ލިބިފައިވާ ނިއު ވަނީ ތިންވަނައަށް ވެއްޓިފަ އެވެ.
މިއީ ތާރީހުގައި ވެސް މި ދެ ޓީމުގެ ރަސްމީ ފުރަތަމަ ކުރިމަތިލުމެވެ. އެންމެ ފަހުން އޮތް ދެވަނަ ޑިވިޝަންގައި ދެ ޓީމު ވާދަކުރި ނަމަވެސް ނިއު ސެމީން ކެޓުމުން ދެ ޓީމު ވާދަކުރަން ޖެހިފައެއް ނުވެ އެވެ.
މިރޭގެ މެޗުގައި ނިއުގެ ގޯލު ބެލެހެއްޓީ، އެ ޓީމުން އަލަށް ގެނައި ގޯލްކީޕަރު، ސްރީލަންކާ ގައުމީ ޓީމުގެ ކަވީޝް ފެނާންޑޯ އެވެ. މި މެޗުގެ ކުރިން ނިއު އިން އޭނާ ގެނައީ އެ ޓީމުގެ އެއް ނަމްބަރު ކީޕަރު ސާގިބް ހަނީފަށް އަނިޔާ ވުމާ ގުޅިގެންނެވެ.
މެޗުގައި އެންމެ ފުރަތަމަ ހަމަލާ އުފެއްދީ ނިއު އިންނެވެ. ނަމަވެސް ހަސަން ރާއިފް އަހުމަދު (ހަންނަ) ފުރަތަމަ ހާފުގައި ފޮނުވާލި ހަމަލާ އޮޑީގެ ކީޕަރު މުހައްމަދު ޝަފީއު ވަނީ ދިފާއު ކޮށްފަ އެވެ. އަދި ހާފު ނިމެނިކޮށް އޮޑީގެ މުޒްދާން ހަސަން ފޮނުވާލި ހަމަލާއެއް ނިއުގެ ކީޕަރު ކަވީޝް ވަނީ ދިފާއު ކޮށްފަ އެވެ.
މި ހާފުގައި އޮޑީގެ ހަންގޭރީ މިޑްފީލްޑަރު ބާނަބަސް ތޮތު އަށް ވަނީ އަނިޔާވެގެން ބަދަލުކޮށްފަ އެވެ. އޭނާގެ ބަދަލުގައި ކުޅެން އެރީ މުހައްމަދު ރީހާން އެވެ.
އިއްބެ ލަނޑު ޖެހީ 66 ވަނަ މިނިޓުގައި، މެޗުގެ މޮޅު ކުޅުންތެރިއަކަށް ހޮވުނު އަހުޒަމް ރަޝީދު ނަގައިދިން ހުރަހެއް ބޮލުން ޖަހައެވެ. މިއީ އޭނާ ލީގުގައި ޖަހައިިން ހަތަރުވަނަ ލަނޑެވެ. ކެޕްޓަން މުހައްމަދު ރަޝީދު (ހޮކޭ) މި މެޗުގައި ނުކުޅޭތީ އެ ޓީމުގެ ކެޕްޓަންގެ ޒިންމާ އަދާކުރީ ވެސް އިއްބެ އެވެ.
ލަނޑަށް ފަހު އޮޑިން ވަނީ ކުރިއަށް ވުރެ ބޮޑަށް ނިއުގެ ގޯލަށް ނުރައްކާ ކޮށްފަ އެވެ. އެގޮތުން މުޒްދާން އާއި ކަރޯލިސް ލައުކްޒެމިސް ފޮނުވާލި ނުރައްކާތެރި ހަމަލާ ވެސް ކީޕަރު ކަވީޝް ދިފާއު ކުރި އެވެ.
މެޗު ނިމެން ތިން މިނިޓަށް ވެފައި ވަނިކޮށް ނިއު އަށް ނަތީޖާ އެއްވަރު ކުރަންލިބުނު ފުރުސަތުގައި ހަންނަ އަށް ރަނގަލަށް ބޯޅަ ފޮނުވާ ނުލެވި އުޅެނިކޮށް އޭނާއަށް ހުރަސް އެޅީ އަހުމަދު އައިހަމް (އައިހު) އެވެ.