23 ނޮވެމްބަރ 2025 - 06:25
ލިވަޕޫލް (ނޮވެމްބަރު 22) - އިނގިރޭސި ޕްރިމިއާ ލީގުގައި ރޭ ނޮޓްނަމް ފޮރެސްޓުން ލިވަޕޫލްގެ ދަނޑުގައި އެ ޓީމާ ދެކޮޅަށް ކުޅެ 3-0 އިން މޮޅުވެއްޖެ އެވެ.
އެންފީލްޑުގައި ރޭގެ މެޗުގެ 33 ވަނަ މިނިޓުގައި ފޮރެސްޓަށް ލީޑު ނަގައިދިނީ ޑިފެންޑަރު މުރީލޯ އެވެ. އަދި ދެވަނަ ހާފު ފެށުނުތަނާ އެ ޓީމުގެ ދެވަނަ ލަނޑު ޖަހައިދިނީ ނިކޯލޯ ސަވޯނާ އެވެ. ތިންވަނަ ލަނޑު 78 ވަނަ މިނިޓުގައި ޖަހައިދިނީ މޯގަން ގިބްސް-ވައިޓް އެވެ.
މިއީ، މި ސީޒަނަށް ކުޅުންތެރިން ގަންނަން 450 މިލިއަނެއްހާ ޕައުންޑް ހަރަދުކުރި އާނޭ ސްލޮޓްގެ ލިވަޕޫލް އެންމެ ފަހުން ލީގުގައި ކުޅުނު ހަތް މެޗުގެ ތެރެއިން ބަލިވި ހަވަނަ މެޗެވެ. އަދި އަމިއްލަ ދަނޑުގައި އެ ޓީމު ލީގުގައި ބަލިވި ދެވަނަ މެޗެވެ.
މި ނަތީޖާއާ އެކު، އެންމެ ފަހުގެ ލީގު ޗެމްޕިއަން ލިވަޕޫލް ވަނީ ތާވަލްގެ 11 ވަނަ އަށް ވެއްޓިފަ އެވެ. މިހާތަނަށް ކުޅުނު 12 މެޗުން އެ ޓީމަށް ލިބިފައި ވަނީ 18 ޕޮއިންޓެވެ.
މިދިޔަ ސީޒަންގެ ލީގުގެ ހަތްވަނައިގައި ނިންމައިގެން މި ސީޒަންގައި ޔޫރޮޕާ ލީގު ކުޅޭ ފޮރެސްޓް މިވަނީ ލީގުގައި ތިންވަނަ މޮޅު ހޯދައި، ރެލިގޭޝަން ޒޯނުން މި ވަގުތަށް ނުކުމެފަ އެވެ. އެ ޓީމުން މި ސީޒަންގައއި މިހާތަނަށް ދެ ކޯޗުން ބަދަލު ކޮށްފައި ވާއިރު، މިދިޔަ މަހުގެ 21 އިން ފެށިގެން އެ ޓީމަށް ކޯޗު ކޮށްދެމުން އަންނަނީ ކުރިން އެވަޓަން އަށް ކޯޗު ކޮށްދިން ޝޯން ޑައިސް އެވެ.
އަނިޔާގެ ސަބަބުން ލީގުގައި މި ވަގުތު އެންމެ ފޯމުގައި ހުރި އެންޓޮއިން ސެމެންޔޯ ނުލައި ބޯންމަތުން ވަނީ ރޭ ފަހަތުން އަރައި 2-2 އިން ވެސްޓް ހޭމް ޔުނައިޓެޑާ އެއްވަރު ކޮށްފަ އެވެ. އަދި ބްރައިޓަން ވަނީ ފަހަތުން އަރައި 2-1 އިން ބްރެންޓްފޯޑް ބަލިކޮށްފަ އެވެ. ކްރިސްޓަލް ޕެލަސް އިން 2-0 އިން ވުލްވްސް ބަލި ކުރި އިރު ފުލަމް ވަނީ 1-0 އިން ސަންޑަލެންޑް ބަލިކޮށްފަ އެވެ.
އިއްޔެ ހަވީރު ކުޅުނު ހަފްތާގެ ފުރަތަމަ މެޗުގައި ޗެލްސީ ވަނީ ޕެޑްރޯ ނެޓޯ އާއި އެންޒޯ ފެނާންޑޭޒްގެ ގޯލުތަކުން 2-0 އިން ބާންލީ އަތުން މޮޅުވެފަ އެވެ.