23 ނޮވެމްބަރ 2025 - 06:21
(ބުދަ ދުވަހާ ގުޅޭ)
އެހެނަސް މެންދުރެއް ހާއިރު ފުލުހުންނަށް ތަފާތު ހެތްކެއް ފެނުނެވެ. އެއީ ކަނޑުމަތިން އޮޔާދަނިކޮށް ފުލުހުންނަށް ފެނުނު ރާއިފުގެ ފައިވާނާއި ސޯޓެވެ. ފުރަތަމަ ފެނުނީ ފައިވާނެވެ. ސޯޓު ފެނުނީ ދެތިން ގަޑިއިރު ފަހުންނެވެ. ހަތަރު ދުވަސް ވަންދެން ކަނޑާއި އެއްގަމުގައި ފުލުހުން އަތްފުޅާއަޅައިގެން ވެސް އެހެން ހެތްކެއް ނުފެނުނެވެ. ތަހުގީގު ފެށީ އާންމުންނެވެ.
ރާއިފުއަކީ ސިކުނޑި އުނި މީހެކެވެ. ފަޅުރަށުގައި އުޅެނިކޮށް ގެއްލުނީ އެހެންވެއެވެ. އޭގެ ފަހުން އޭނަގެ ބަލި ހައްތަހާ ބޮޑުވިއެވެ. އާއިލާ މީހުންނާއި ރައްޓެހިންނާއި އެކުގައި މަސައްކަތްކުރާ މީހުން އެ ކަމަށް ހެކިދެއެވެ. ޑުރަގުގެ ދަންތުރައިގައި ވެސް އޭނަ ހުރީ ހައްޔަރުވެފައެވެ. އެ ކަން ސިއްރު ކޮށްގެން އުޅެނިކޮށް އަންހެނުންނަށް ފަޅާ އެރީއެވެ. އެއް ގޮތަކީ އެއީއެވެ. އަނެއް ގޮތަކީ، މަސްތުގައި ހުރެ، ދެވޭނުދެވޭ ތަނެެއް ނޭނގި މޫދަށް ގެނބުނީއެވެ. އޭނަ ގެއްލުނީ ފިނޮޅެއްގައި ހުއްޓައެވެ. ހަނީމޫނަށް ރިސޯޓަކަށް ގޮސް، ހޭޖެހޭ މީހަކު ފިނޮޅެއްގައި ރޭކުރާނެ ހެއްޔެވެ؟ އޭނަޔާ އަވަލައިގެން އުޅުނު ޖިންނި އޭނަ ގެންދިޔައީ ކަމަށް ވެސް ވެދާނެއެވެ. ކޮންމެ ވެސް އެހެން ރަށަކުން އަދި ފެންނާނެއެވެ. އެއް ބަޔަކު ހެޔޮދުއާކުރި އިރު، އަނެއް ބަޔަކު ސަމާސާ ވެސް ކޮށްފައި ހުއްޓެވެ.
އެ ހުރިހައި އެއްޗެއް އަންޖަލްއަށް ފެނުނެވެ. އަންޖަލް ހިތަށް އެރިއެވެ. ރާއިފުއަކީ ރާއިފު ކަމާ މެދު އަންޖަލްގެ ހިތުގައި ވެސް ސުވާލު އުފެދުނެވެ. ފަހަކަށް އައިސް އޭނަގެ އުޅުން ތަފާތެވެ. އަންޖަލް އެ ސުވާލުކުރި ވެސްމެއެވެ. ރާއިފުއާ ރައްޓެހިވެގެން ކައިވެނި ކުރުމާ ދޭތެރޭގައި، އޭނަ ދަސްވާހައި ވަގުތެއް އަންޖަލްއަކަށް ނުލިބެއެވެ.
ފުލުހުންގެ ތަހުގީގަށް ބޭނުންވާ މައުލޫމާތު ހޯދޭނެ ދިމާއެއް ނެތިގެން، ފިނިހަކު ދުވެލީގައި ތަހުގީގު ކުރިޔަށް ދިޔަ ނަަމަވެސް، ރާއިފު ގެއްލުމުގެ ޚަބަރާ އެކުގައި، ދެ ހާދިސާ ގުޅުވައިލެވުނެވެ. ގެއްލިގެން އުޅެނީ ފުލުހުން ހޯދާ މީހެއްކަން އެނގުނެވެ. އެ ވާހަކަ އާންމުވުމާ އެކުގައި، ރާއިފުގެ މަރަށް ސަބަބެއް ލިބުނެވެ. ބޭޒާރުވެ، ފުލުހުންގެ އަތްދަށުވެދާނެހެން ހީވުމުން ރާއިފު އަމިއްލައަށް މަރުވީއެވެ.
ސަބަބެއް އަތުޖެހުމުން ދުނިޔެ ހަމަނޭވާލައި، މޯޅިއަކަށްދެމިލި ނަމަވެސް، ރާއިފުއަކީ އެހައި ނުބައި މީހެއް ކަމަކަށް އަންޖަލްއަކަށް ގަބޫލެއް ނުކުރެވުނެވެ. އަންޖަލްގެ ބައްޕަ އިނދެގެން އުޅުނު މީހާ އާއި ރާއިފުއާ ދެމެދު އޮންނާނީ ކޮން ހަސަދަވެރިކަމެއް ހެއްޔެވެ؟ މުހުސިނާ އާއި ނިޒާރު ވެސް ދެއްކީ ހަމަ އެ ވާހަކައެވެ.
"އޭނައަކީ ވެސް ހީކުރި ކަހަލަ މީހަކަށް ނުވިއޭ ދޯ؟" ނޫމާގެ މަރާ ގުޅޭ ގޮތުން ޓީވީން ދެއްކި ޚަބަރެއް ބަލަން ތިބެފައި ނިޒާރު ބުންޏެވެ. "އެއީ އަޅެ ކީއްވެގެން އޭނަ ކުރި ކަމެއްބާ؟"
"ދެނެއް ތި ސުވާލުގެ ޖަވާބެއް ނުލިބޭނެ،" ކަންބޮޑުވެފައި އިން މުހުސިނާ ބުންޏެވެ. "ރަނގަޅު ވާނީ ދެން ތި ވާހަކަ މި ގޭ ތެރޭގަ ނުދެއްކިއްޔާ! އަންޖޫ ނުލާހިކު ދެރަވެފަ އެ ހުންނަނީ."
ނިޒާރު ވިސްނައިލިއެވެ. ސަމްރަތާއި އަނިލް އާއި ރާއިފު ވެސް މަރުވީ ގޮތް ނޭނގޭ މަރަކުންނެވެ. ދެން އެ ގޮތަށް މަރުވާން ތިބީ ކޮންކޮން ބައެއްބާއެވެ؟ އެ ސުވާލު އިރުއިރުކޮޅާ ނިޒާރުގެ ހިތަށް ތީރެއް ހެން ހެރެއެވެ.
އިރުއިރުކޮޅާ އެ ވާހާކަ ނުދެއްކިއެއް ކަމަކު، ހިތުގައި އަޅާ ވޭން ދިޔައީ ބޮޑުވަމުން، ފުންވަމުންނެވެ.
ބަރުގާންގެ ހާލު އަދި މާ ބޮޑެވެ. އަމިއްލަ ވަޒަނަށް އައިސް، ބިމަށް ތިރިކުރަން ބޭނުން ނުވެފައި، ހޯރަ އަޅައަޅައި އޮތީއެވެ. އަތީލާއަށް އެ މަންޒަރު ފެނެއެވެ. ހިތާމައަކީ ބަރުގާންއަށް ދޭންވީ ހިތްވަރެއް އަތީލާއަށް ނޭނގޭ ކަމެވެ. އަތީލާއަށް ރަނގަޅީ އަންޖަލް ދޫކޮށްލާފައި ބަރުގާންގެ ރަށަށް ބަރުގާން އައުމެވެ. އެހެން ދިރިއުޅުމެއް ފެށުމެވެ. އެކަމަކު ބަރުގާންއަކަށް އެ ނަސޭހަތެއް ގަބޫލެއް ނުކުރެވޭނެއެވެ. އެ ވަރު އަތީލާއަށް ވިސްނެއެވެ. އެންމެ ފަހުން ބަރުގާން ވެސް ގެއްލޭނީއެވެ. އެ ދުވަހަކުން ބަތޫރުގެ އުނދަގޫ ދެ ގުނައަށް އިތުރު ވާނެއެވެ.
ކައި ނިމިގެން ފަހަރަކު މީހަކު ގޮނޑިން ތެދުވި އިރު ވެސް، އަންޖަލް އިނީއެވެ. އަންޖަލް ވާހަކަ ދައްކާތޯ، އަންޖަލްއަށް ވިސްނައިދެވޭތޯ އެކަކަށް ވެސް ކުރެވުނު ކަމެއް ނެތެވެ. އަންޖަލްއާ އެކުގައި ނޫނީ ތެދުވަން ބޭނުންނުވެގެން، އެތައް އިރަކު އިނދެފައި، ނިޒާރު ތެދުވިއެވެ. އެއްޗެއް ބުނަން އަންޖަލް ގާތަށް މުހުސިނާ ޖެހިލިއެވެ.
"އަހަރެން ބައިންދާފަ މާމަ ދޭބަލަ!" އަންޖަލް މަޑުމަޑުން ބުންޏެވެ. "އަހަރެން ތަށިތައް ނަގާނަމޭ!"
ނިޒާރުގެ އިޝާރާތަކާ އެކު، ހިތާ ދެކޮޅަށް މުހުސިނާ ވެސް ޖެހުނީ ދާށެވެ. އަންޖަލްގެ ލޮލަށް ސިފަވަނީ ރާއިފުއެވެ. އޭނަ ބުނެފައިވާ އެކި ވާހަކަތަކެވެ. ބައެއް ފަހަރު ރާއިފު ފެންނަ ހެން ވެސް ހީވެއެވެ. އެ ފަދަ ފަހަރެއްގައި، ބަލައިލެވުނު އިރު އަންޖަލްއަށް ފެނުނީ އަތީލާއެވެ.
"އަތީލާ!" އަންޖަލްއަށް ބުނެވުނެވެ. "ކޮން ތާކު ތި އުޅެނީ؟ ކިހާ ވަރަކަށް ގޮވައިފިން؟"
"އަޑު އިވެއޭ! ކީއް ކުރާނީ؟ ކުއްލިއަކަށް ހަވާލުވާން ޖެހުނު ޒިންމާގެ ބޮޑުކަމުން ނާދެވެނީ. ހިނގާބަލަ ބޭރަށް. މި ތާ އަހަރެން ނޭވާ ހާސްވޭ!"
އަތީލާގެ ބައްޕަ މަރައިލި ތަނުގައި ހުރުމަކީ، އަތީލާގެ ރޫހާނީ ހަށިގަނޑު ފިތޭ ކަމެކެވެ. ނޭވާ ކުރުވާ ކަމެކެވެ. އަންޖަލް ބޭރަށް ނުކުތެވެ. އެކަކަށް ވެސް ނޭނގިއެވެ. އެކަނިމާއެކަނި ނުކުމެގެން، ހިނގަމުން ގޮސް އަންޖަލް ވަނީ ސޯސަންމަގުގައި ހުރި ރެހެންދި މައިޒާނަށެވެ. އެ ތަނުގައި ހުރި އުނދޯލީގައި ބިދޭސީއަކު އިނެވެ. އަންޖަލް ގޮސް އުނދޯލި ކައިރީގައި ހުއްޓުމުން އެ މީހާ ތެދުވެގެން ދިޔައެވެ. އެ ވަގުތު އެހެން މީހަކު އެ މައިދާނަކު ނެތެވެ. ދުރުގައި ހުރި ޖޯލީގައި ނިދާފައިވާ މީހާ ފިޔަވައެވެ. އަންޖަލް އިށީނުމުން އަތީލާ ވެސް އިށީނެވެ.
"އެހެންވެގެން މި ބުނަނީ، ފިރިހެނުން މިހާ ގިނަ ތަނެއްގަ ކީއްކުރަންހޭ މީހަކާ ނީނދެ ހުންނަންވީ؟" ހިތް މެދުވެރިކޮށް އަތީލާ އެހިއެވެ. "ތިހެން ހުއްޓާ މޮޔަވެދާނެ."
"އަހަރެން ބޭނުމީ ރާއިފު." އެ ތަނަށް އައި މަގުމަތީގައި އަންޖަލް ދިން ޖަވާބު އަނެއްކާ ވެސް ދިނެވެ.
"ތި ކަން އެނގެޔޭ ދައްތާ!" އަތީލާ އެއްބަސްވިއެވެ. "އެކަމަކު އޭނަ އަންނާނެތަ؟"
"ކުރިން ވެސް އަޔެއްނު!" އަންޖަލް އިސްޖަހާލައިގެން އިނދެ ބުންޏެވެ. "އަހަރެން އިންތިޒާރު ކުރާނަން."
"އައިއްސިއްޔާ ކިތަންމެހާ ވެސް ރަނގަޅު،" އަތީލާ ބުންޏެވެ. "އަހަރެން ބޭނުން ބައްޕަ ވެސް އަންނަން."
އަތީލާ އެހެން ބުނުމުން އަންޖަލް ވަރަށް ހައިރާން ވެފައި އަތީލާއަށް ބަލައިލިއެވެ.
"ބައްޕައަށް ކިހިނެއްވީ؟" އަންޖަލް ސުވާލުކުރިއެވެ.
ވީ ގޮތް ކިޔައިދޭކަށް އަތީލާ ބޭނުމެއް ނޫނެވެ.
"މަރުވީ!" އަތީލާ ބުންޏެވެ.
"ކޮން އިރަކު؟" އަންޖަލް އެހިއެވެ. "ކީއްވެ ނުބުނީ؟"
"ހިޔެއް ނުކުރަން ދައްތައަށް އެހާ މުހިންމުވާނެ ކަމަކަށް،" އަތީލާ އުޅުނީ އެ ހިސާބަށް ބުނެފައި ހުއްޓައިލާށެވެ. އެހެނަސް އެހެނެއް ނުވިއެވެ. "އަހަރުމެންނާ، އަހަރުމެންގެ ރަށަށް ވުރެ ދައްތައަށް މުހިންމީ ދައްތަގެ މީހުން. ބުނީމެއްނު އެހެން. ކިހިނެއް މި ވީ؟"
"ލޯތްބަކީ އެންމެނަށް ލިބޭ ނަަސީބެއް ނޫން!" ކިރިޔާ އިވޭ ވަރަށް އަންޖަލް ބުންޏެވެ.
"ނަސީބު މިހާރު ވެސް ހުރީ ދައްތަގެ އަތުގަ ހިފަން ތައްޔާރަށް،" އަތީލާ ބުނަން އައި ވާހަކަ ބުންޏެވެ. "އަޅެ އަތްދިއްކޮށްލަބަލަ! ދައްތަ ގޮވާލާތޯ ބަލަބަލާ އޭނަ އެ ހުންނަނީ."
އަންޖަލް ވިސްނައިލިއެވެ. އަންޖަލް ދެކެ ބަރުގާން އެހައި ލޯބި ވާންވީ ކީއްވެ ހެއްޔެވެ؟
"އެންމެ ފަހަރަކު ގޮވާލަން ޖެހޭނީ." އަތީލާ ބުންޏެވެ.
އަތީލާއާ އެކުގައި އަންޖަލް އަންނަ މަންޒަރު ބަލަން އިންތިޒާރުގައި ހުރި ބަރުގާންއަށް ލިބުނީ މާޔޫސް ކަމެކެވެ. ހިތާމަ ފިޔަވައި އަތީލާ ދޭނެ އެއްޗެއް ނެތެވެ.
"ފިނޮޅަކަށް އެކަނި ދޫކޮށްލާފަ ދިޔައީމަ ވެސް ކީއްވެތަ އޭނަ ދެކެ ރުޅި ނައީ؟" ހިތްހަމަނުޖެހިފައި ބަރުގާން އެހިއެވެ. "ރަނގަޅު މީހަކު އެހެނެއް ނަހަދާނެ. ބުއްދިއާ، ލޮލާ، މި ހުރިހާ އެއްޗެއް ކީއްވެގެންތަ ބޭނުން ނުކުރަނީ؟"
"ލޯތްބަކީ ކަނު އެއްޗެއް،" ވަރަށް ހަމަޖެހިލާފައި އަތީލާ ބުންޏެވެ. "އަހަރެން ބުނާ އެއްޗެއް ނޫން. އިންސާނުން ބުނާ އެއްޗެއް. ރުހުމަކު ދައްތައެއް ނާންނާނެ. ގަދަކަމުން ގެނައުމުގެ ބޭނުމެއް ނެތް."
ރާއިފުގެ އިތުރު ޚަބަރެއް ނުވެ، ދުވަސްތައް ފާއިތުވަމުން ގޮސް ދިވެހީންގެ ހަނދާނުން ރާއިފުގެ ނަން ފުހެވުނެވެ. އަންޖަލް ފިޔަވައެވެ. އަންޖަލް ކަންތައް ކުރީ ދިމާ އިދިކޮޅަށެވެ. ރާއިފުގެ ނަން ނުފުހެވޭނެ ހުރިހައި ކަމެއް އަންޖަލް ކުރިއެވެ. ފޯނުން ގަޑިބަލައިލާ އިރު ފެންނަން ހުންނަނީ ރާއިފުގެ ފޮޓޯއެކެވެ. ރާއިފުގެ ނަންބަރަށް އަންޖަލް ފޯނު ކުރެއެވެ. އެ ފޯނު ގޭގައި އޮވެގެން ރަނގަބީލު ވިޔަސް ވެހެވެ. އަންޖަލް އުޅެނީ ދެ ފޯނު ހިފައިގެންނެވެ. ރާއިފުގެ މަންމައަށް އަންޖަލް ގުޅައެވެ. ރާއިފު ގެއަށް އައިތޯ ބަލައެވެ. ސިއްރަކުން ނޫނެވެ. މާމަ އާއި ކާފަ ގާތުގައި އިނދެފައި ވެސް ރާއިފުގެ މަންމައަށް ގުޅައިގެން ވާހަކަ ދައްކައެވެ. އެ މަންޒަރު ބަލަން މުހުސިނާއަށް ވަރަށް އުނދަގޫވެ އެވެ. ނިޒާރުއަކަށް ވެސް ފަސޭހައީކީ ނޫނެވެ. އެކަމަކު، އެ މަންޒަރަށް ފުރަގަސްދިނުން އެއީ ހައްލެއް ކަމަކަށް ނިޒާރެއް ނުދެކެވެ.
އެއްފަހަރު ރާއިފުގެ ފޯނު ރަނގަބީލުވީ، ނިޒާރު ކައިރީގައި އެ ފޯނު އޮއްވައެވެ. ފޯނަށް އަންޖަލްގެ ނަން އަރާފައި އޮތެވެ. ނިޒާރު ފޯނު ހިފައިގެން ގޮސް އަންޖަލްގެ ކޮޓަރިއަށް ވަދެފައި ފޯނު ދިއްކޮށްލިއެވެ.
"ބޭރުގަ ދޯ އޮތީ!" އަންޖަލް ޗޮކެއް ކަނޑައިފައި ބުންޏެވެ. "ގެއްލިގެނޭ މި އުޅެނީ."
ރާއިފުގެ ފޯނަށް އަންޖަލް ގުޅަނީ އެ ފޯނު އޮތްތަން ބަލަން ނޫންކަން ނިޒާރަށް ވިސްނެއެވެ. އެއީ ހިތްހަމަޖެހުމަކަށް އަންޖަލް ކުރާ ކަމެކެވެ.
"ދަރިފުޅު މީހަކާ އިންނަންވީނު؟" ނިޒާރު އެދުނެވެ.
"އޭރުންނޯ ކާފާ؟" އަންޖަލް އެހިއެވެ. "އަހަރެން އެހެން މީހަކާ އިންނަ ތަނާ ރާއިފު އަތުވެއްޖެއްޔާޔޯ؟ އޭނަ އަންނާނޭ ކާފާ! ކުރިން ވެސް ގެއްލިފަ ފެނުނެއްނު!"
ނިޒާރު ވަރަށް ހިތްވަރުކުރިއެވެ. އެ ވަރުން ވެސް ކަރުނައެއް ނުހިފޭއްޓުނެވެ. އަންޖަލްގެ ތިން ބެއިން ދޫކޮށްލާފައި އަންޖަލްގެ ބައްޕަ ދިޔަ ފަހުން، ހުރިހައި ކަމެއް ކޮށްދެނީ ކާފަ އާއި މާމައެވެ. ބައްޕަ ނެތުމުގެ ފަޅުކަން އަންޖަލްއަށް އިހުސާސްވިޔަ ވެސް ނުދެއެވެ. ކާފަ އާއި މާމަ އެންމެ ލޯބި ވަނީ ވެސް އަންޖަލް ދެކެއެވެ. ވީމާ، ކާފަ ރޯ މަންޒަރު ބަލާކަށް އަންޖަލްއަކަށް ކުޅަދާނައެއް ނުވިއެވެ.
"ދަރިފުޅު ތިހެން އުޅޭ ތަން ބަލަން ކާފައަށް ވަރަށް އުނދަގޫ!" ނިޒާރު ރޮމުން ބުންޏެވެ. "ހިތަށް ވަރަށް ތަދުވޭ! ނުވެސް ނިދޭ ކާފައަކަށް."
"އެންމެ ރަނގަޅު،" އަންޖަލް ބުނެލިއެވެ. "ކާފަ މީހަކު ހޯދާ! އަހަރެން މެރީ ކުރާނަން." (ނުނިމޭ)