މުސާރަ ބޮޑުވި، ޝަކުވާ އަކީ އިމެއް ނެތި ނެގި އޯޓީ ހިފެހެއްޓުމުން!

23 ނޮވެމްބަރ 2025 - 08:28

ދައުލަތުގައި މުހިންމު މަސައްކަތްތަކެއް ކުރާ އެ އިދާރާގެ ބައެއް މުވައްޒަފުން ޝަކުވާކުރީ އެ މީހުންނަށް މި މަހުން ފެށިގެން އެވްރެޖުކޮށް މުސާރައިން 10،000ރ. ދަށްވާތީ އެވެ. ދައުލަތުގެ މުސާރައިގެ އޮނިގަނޑު މުރާޖައާކޮށް، މި މަހުން ފެށިގެން މުސާރައިގެ ބޮޑު ކުރިއެރުމެއް ލިބޭނެ ކަމަށް ސަރުކާރުން އިއުލާން ކޮށްފައިވާ ވަނިކޮށް ހަގީގަތުގައި އެހެން ވެގެން ނުވާނެ އެވެ. އެއީ ސީރިއަސް މައްސަލައެކެވެ. އެހެންވެ، ކަމާ ގުޅޭ އިދާރާތަކުން އެ މައްސަލަ ވަކިން ބަލައި، ހިސާބުތައް ހެދި އެވެ.

އެނގުނީ އެ އިދާރާ އިން އިތުރު ގަޑި ފައިސާ ދިނުމުގައި ދާދި ފަހުން ގެނެސްފައި އޮތް ބަދަލަކާ ހެދި އިމެއް ނެތި ލިބެމުން ދިޔަ އިތުރު ގަޑީގެ ފައިސާ މަދުވަނީ ކަމެވެ. އިތުރު ގަޑި ގުނަން ފަށާ ވަގުތު ގިނަ ކޮށްގެން ޑިއުޓީ އަދާކުރަން ފެށުމުން އޯވަޓައިމް ނުވަތަ އިތުރު ގަޑީގެ ފައިސާގެ އަދަދު ގިނަވާ ގޮތަށް އޮތީ އުސޫލު ބަދަލުކޮށްފަ އެވެ. އެ ގޮތަށް ހެދުމުން އިތުރު ގަޑީގެ ފައިސާގެ ދެ ގުނަ ބައެއް މުވައްޒަފުންނަށް ލިބެމުން އައި ކަމަށް ވެ އެވެ. މާނައަކީ އޯވަޓައިމްގެ ފައިސާ ލިމިޓެއް ނެތުމެވެ. އެންމެ ގިނައިން އޯޓީ ނަގާ ތަނަށް އެ މުއައްސަސާ އޮތީ ބަދަލުވެފަ އެވެ.

ދައުލަތުގެ މުވައްޒަފުންގެ މުސާރަތަކަށް މި މަހުން ފެށިގެން ބޮޑު ކުރިއެރުމެއް ލިބޭއިރު، އިތުރުގަޑީގެ މަސައްކަތު ވަގުތުގެ މައްސަލަ ބޮޑުކަން ޕޭ ކޮމިޝަނަށް ވެސް އޮތީ ފާހަގަކުރެވިފަ އެވެ. ބައެއް އޮފީސްތަކުން އިތުރު ގަޑި ހިމަނައިގެން މުސާރަތައް ހިސާބު ކުރުމުން "ނެގެޓިވް" ނަތީޖާއެއް ނުކުންނާނެ ކަމަށް އެ ކޮމިޝަނުން ވާހަކަ ދެއްކެވި އިސް އޮފިޝަލަކު ވިދާޅުވި އެވެ.

"އޯވަޓައިމްގެ ބޭރުން ވާހަކަ ދައްކާ ކަމަށް ވަންޏާ މުސާރައިގެ ކުރިއެރުން އެންމެންނަށް ވެސް މި ފަހަރު ލިބިފައި ހުންނާނީ. އެހެނެއް ނޫން، އޯވަޓައިމް ކަލްކިއުލޭޓް ކޮށްގެން މުސާރައިގެ ކުރިއެރުން ބަލާ ނަމަ ޕޮޒިޓިވް ކަމެއް ނުފެނިދާނެ. އެކަމަކު، އޯވަޓައިމަކީ އަދި މުޅިން އެހެން ކަމެއް،" ޕޭ ކޮމިޝަނުން ވާހަކަ ދެއްކެވި އޮފިޝަލް ވިދާޅުވި އެވެ.

އިތުރު ގަޑީގެ ފައިސާ އަށް ދައުލަތުގެ މި އަހަރުގެ ބަޖެޓުގައި ވެސް 750 މިލިއަން ރުފިޔާ ޖަހާފައި އެބައޮތެވެ. އެހާ ގިނަ އަދަދެއް ބަޖެޓުން އިތުރު ގަޑިއަށް ހޭދަކުރުމަކީ އެންމެ ރަނގަޅު ގޮތް ނޫން ކަމަށް ތަޖުރިބާކާރުން ވެސް ވިދާޅުވެ އެވެ.

ރަސްމީ ގަޑިއަށް މަސައްކަތް ނުނިންމުމާއި އޯވަޓައިމް އަށް ފުރުސަތު ފަހިވާ ގޮތަށް މަސައްކަތްތައް ބައްޓަން ކުރުމަކީ ސަރުކާރުގެ ބައެއް އިދާރާތަކުގެ މުވައްޒަފުންގެ ސަގާފަތެކެވެ. އިތުރު ގަޑި އެއީ ކޮންމެހެން ޖަހަން ޖެހޭ އެއްޗެއް ކަމަށް ބަލައި، އެ ކަން ކުރާ މީހުން މަދެއް ނޫނެވެ. އޮފީސްތައް ހިންގުމުގެ ހަރަދު މިހާރު ވެސް އިންތިހާ އަށް ބޮޑުވެފައިވާއިރު، އިތުރު ގަޑީގެ ފައިސާ ހޯދުމުގެ ނިޔަތުގައި މަސައްކަތްކުރުން އާންމު ކަމަށް ޕޭ ކޮމިޝަނުން ވާހަކަ ދެއްކެވި އޮފިޝަލް ވިދާޅުވި އެވެ.

ސަރުކާރުގެ ގިނަ އިދާރާތަކުގެ މުވައްޒަފުންގެ މުސާރަ ވަރަށް ކުޑަ އެވެ. ހަގީގަތަކީ އެއީ އެވެ. ހާއްސަކޮށް ސިވިލް ސާވަންޓުންގެ މުސާރަ އެވެ. އެކަމަކު، ސަރުކާރުގެ ރަސްމީގަޑި ކަމަށްވާ ހެނދުނު 8 އިން މެންދުރު 2 އަށް މަސައްކަތްތައް ނުނިންމޭ ވަރަށް ޒިންމާތައް ގިނަ ވެގެން ނުވާނެ ކަމަށް ސިވިލް ސާވިސް ދާއިރާގެ ތަޖުރިބާކާރުން ވިދާޅުވެ އެވެ.

އާދައިގެ ކުޑަކުޑަ ރަށެއްގައި ހިންގާ ސަރުކާރުގެ އޮފީހެއްގެ މުވައްޒަފަކަށް އާދަޔާ ހިލާފަށް ގިނައިން އިތުރު ގަޑީގެ ފައިސާ ޖަމާވަމުން ދާން ފެށުމުން އެ މައްސަލަ ބެލިއިރު އެ އޮފީހުގެ އިސްވެރިންނަށް ފާހަގަވީ އެ މުވައްޒަފު އާންމުކޮށް ނުރަސްމީ ގަޑީގައި އޮފީހަށް ގޮސް އެއްވެސް މަސައްކަތެއް ނެތި އުޅޭ ކަމެވެ.

"އެ މުވައްޒަފަށް ލިބެން ޖެހެނީ މުސާރަ އާއި ހުރިހާ އިނާޔަތެއް އެއްކޮށްލީމާ ކޮންމެ މަހަކު 12،000ރ. އެކަމަކު އޯޓީއާ އެކު 25،000ރ. ޖަމާވަމުން އައީ. މައްސަލަ ބެލިއިރު ކޮންމެ ރެއަކު އޮފީހަށް ނުކުމެފައި ދެން ގޮސް އޮންނަނީ ޖޯލީގައި ކަމެއް ނެތިފައި،" އެ މައްސަލައިގެ މައުލޫމާތު އެނގޭ އެ އޮފީހުގެ އިސްވެރިއަކު ވިދާޅުވި އެވެ

"އެކަމަކު، ބަރާބަރަށް އޯޓީ ޖެހި. އަހަރެއް ވަންދެން މިހެން ނަގާފައި ހުރިކަން ފާހަގަވި."

ޕޭ ކޮމިޝަންގެ އޮފިޝަލް ވިދާޅުވީ، އިތުރުގަޑި ޖެހުމަށް ވަރަށް ހަރުދަނާ ނިޒާމެއް ހަދާފައިވާ ކަމަށާއި އެކަމަކު ބައެއް މުވައްޒަފުން އެކަން "އެބިއުޒް" ކުރާ ކަމަށެވެ. ސުޕަވައިޒަރުގެ ހުއްދަ ހޯދުމާއި ކުރަންޖެހޭނެ މަސައްކަތްތައް ހުރުން ލާޒިމް ކަމެއްގެ ގޮތުގައި އޮތަސް އެގޮތަށް އަމަލެއް ނުކުރެ އެވެ.

"[އޯޓީ] އެޕްރޫވް ވެސް ކުރަނީ ހެޔޮ ނިޔަތުގައި. އެކަމަކު އޯޓީ އެޕްރޫވް ކުރަން ޖެހޭނީ އެ މުވައްޒަފު ކުރީ ކޮން މަސައްކަތެއްތޯ ވެސް ބަލާފައި. މުވައްޒަފުންނަށް ވެސް ވަރަށް ބޮޑެތި ލުއިތަކެއް ބައެއް އިދާރާތަކުން ދީފައި އޮވޭ. އެހެން ލުއި ދީފައި އޮތީމާ އޯޓީ އަށް ވަރަށް ބޮޑު އަދަދަކުން ނަގާ މުވައްޒަފުން ވެސް އެބަތިބޭ،" އޭނާ ވިދާޅުވި އެވެ.

މުސާރަ އާއި ހުރިހާ އިނާޔަތްތައް ހިމަނައިގެން 12،000ރ. ކޮންމެ މަހަކު ލިބެންޖެހޭ ބައެއް މުވައްޒަފުން އިތުރުގަޑީގެ ފައިސާއާ އެކު 30،000ރ. އަށް ވުރެ ގިނައިން ވެސް ނަގާ ކަމަށް "މިހާރު" އިން ކުރި ސުވާލުތަކަކާ ގުޅިގެން ޕޭ ކޮމިޝަނުން ވާހަކަ ދެއްކެވި އޮފިޝަލަކު ވިދާޅުވި އެވެ.

އޭނާ ވިދާޅުވި ގޮތުގައި ގާތްގަނޑަކަށް ހުރިހާ އިދާރާއެއްގައި ވެސް އެ މައްސަލަ ފާހަގަކުރެވެ އެވެ. އިތުރުގަޑީގެ ފައިސާ ނެގުމުގެ ސަގާފަތެއް މުޅި ނިޒާމުގެ ތެރެއަށް ފެތުރިފައި ވަނީ ރަސްމީގަޑީގެ ކަންކަން މެނޭޖު ނުކުރެވުން ފަދަ އެތައް ކަމެއް ކުރިމަތިވުމުންނެވެ.

ނަމަވެސް ދައުލަތުގެ ޕޭ ފްރޭމްވޯކަށް 2022 ވަނަ އަހަރު އަމަލުކުރަން ފެށި ހިސާބުން ބައެއް ދާއިރާތަކުގެ މުވައްޒަފުން ގެންގުޅޭ "އޯޓީ ނެގުމުގެ ސަގާފަތް" ވަނީ ބަދަލުވާން ފަށައިފަ އެވެ. ފުރަތަމަ އެ ފްރޭމްވޯކަށް އަމަލުކުރަން ފެށީ ތައުލީމީ ދާއިރާ އާއި ސިއްހީ ދާއިރާ އަދި ޔުނިވާސިޓީންނެވެ.

ޕޭ ފްރޭމްވޯކުގެ ތެރެއަށް ފެއްތުމުން އިިތުރުގަޑި ޖެހޭނީ 8 ގަޑިއިރު މަސައްކަތް ކުރުމަށް ފަހު އެވެ. އޯޓީ ޖެހޭނީ ވެސް ރަސްމީގަޑީގައި އަމިއްލަ ބޭނުމަށް ބޭރުގައި އުޅެން ޖެހޭ ވަގުތު ވެސް ހަމަކުރުމާ އެކީގަ އެވެ. އެކަމަކު، ވަޒީފާގެ ގާނޫނުގައި ކަނޑައަޅާފައިވާ ހާއްސަ ވަގުތުތައް ލިބޭނެ އެވެ.

އެ ބަދަލުގެ މާނައަކީ ހެނދުނު 8 އިން މެންދުރު 2 އަށް ސިވިލް ސާވަންޓުން މަސައްކަތް ކުރިޔަސް އޯޓީ ޖަހާ ކަމަށް ވަނީ ނަމަށް 8 ގަޑިއިރު ހަމަކުރަން ލާޒިމްވާނެ އެވެ.

"އެ ފްރޭމްވޯކަށް އެންމެ ބޮޑު އާބާދީއެއް މި ފަހަރު މި ބަދަލުވީ. އެހެންވީމާ އޭގެ އިމްޕެކްޓު ބޮޑުވާނެ ގިނަ މުވައްޒަފުން ވީމާ،" ޕޭ ކޮމިޝަންގެ އޮފިޝަލް ވިދާޅުވި އެވެ.

މި ފަހަރު ޝަކުވާ ވެސް އިތުރުވި މައިގަނޑު ސަބަބަކީ އެއީ ކަމަށް ވެސް ލަފާކުރެވެ އެވެ. އިތުރުގަޑި ޖެހުމުގައި ހިފެހެއްޓުންތަކެއް ގެނެސްފައި ހުރުމެވެ.

މި ފަހަރު އަސާސީ މުސާރަ އަށް ބޮޑު ކުރިއެރުމެއް ގެނެސްފައި އޮތުމުން އިތުރުގަޑި އަށް އަނެއްކާ ބޮޑު ހަރަދެއް ކުރަން ޖެހިއްޖެ ނަމަ ބަޖެޓަށް ބުރަވެ، މުސާރައިގެ ކުރިއެރުން ދެމެހެއްޓެނިވި ގޮތަކަށް ކުރިއަށް ނުގެންދެވިދާނެ ކަމުގެ ބިރު އޮތީ އެވެ.

"މުވައްޒަފުންގެ ޑިމާންޑު މި އަންނަނީ އެ ކެޕް ދޫކޮށްލަން. އެކަން ކޮށްފިއްޔާ ދެން އަންނާނީ މުސާރަ ކުޑަކުރަންޖެހޭ ހާލަތެއް. އެއީ މުޅި ގައުމަށް ކުރިމަތިވާނެ ގެއްލުމެއް،" ޕޭ ކޮމިޝަންގެ އޮފިޝަލް ވިދާޅުވި އެވެ.

ނޭޝަލް ޕޭ ފްރޭމްވޯކުގެ ތެރެއަށް 2022 ގައި ފެއްތި ތައުލީމީ ދާއިރާ އާއި ސިއްހީ ދާއިރާގެ ޕާފޯމަންސް މިހާރު ވެސް ރަނގަޅު ވަމުން އަންނަ ކަން ފާހަގަކުރެވޭ ކަމަށް ޕޭ ކޮމިޝަނުން ބުންޏެވެ. އިތުރުގަޑީގެ މަސައްކަތް ވެސް އެ ދާއިރާގައި ހަމަޔަކަށް އެޅެމުން އަންނަ ކަމަށް އެ ކޮމިޝަނުން ބުންޏެވެ.

ފިނޭންސް މިނިސްޓްރީން ބުނެފައިވާ ގޮތުގައި މި މަހުން ފެށިގެން އަސާސީ މުސާރައިގެ ގޮތުގައި 7،400ރ. އަށް ވުރެ ދަށުން ނުލިބޭ މުވައްޒަފެއް ދައުލަތުގައި ނުހުންނާނެ އެވެ. މިހާތަނަށް އަސާސީ މުސާރައިގެ ގޮތުގައި ބައެއް މުވައްޒަފުންނަށް މަހަކު 3،100ރ. ލިބެމުން އައި ނަމަވެސް ދެން އެ އަދަދު އުޅޭނީ 7،000ރ. އިން މަތީގަ އެވެ.

އެއީ ނިސްބަތުން ބޮޑު އަދަދެއް ކަމަށް ވިޔަސް މުސާރައިގެ ކުރިއެރުމުގެ ތަފުސީލް ފިނޭންސް މިނިސްޓްރީން އާންމު ކުރުމުން ވެސް ޝަކުވާ ވަރަށް ގިނަ އެވެ. އެ ޝަކުވާތަކަށް ޕޭ ކޮމިޝަނުން އެޑްރެސް ކުރަމުން އަންނައިރު ވަރަށް ބޮޑެތި އޮޅުންތަކެއް އެބަހުއްޓެވެ.

ޕޭ ކޮމިޝަނުން ބުނީ، ބޮޑަށް އޮޅުން އަރަނީ އޯވަޓައިމްގެ ފައިސާގެ އަދަދުތައް ހިމަނައިގެން ބައެއް މުވައްޒަފުން އަމިއްލަ އަށް ކަލްކިއުލޭޝަންތައް ހަދާތީ ކަމަށެވެ.

"އަޅުގަނޑުމެން މުސާރަ މި ސެޓް ކުރަނީ 8 ގަޑިއިރުގެ މަސައްކަތަށް ފަހު އޯވަޓައިމް ލިބޭ ގޮތަށް. އޯވަޓައިމްގެ މިހާރުގެ ސަގާފަތް ބަދަލުކުރަން ބައެއް ކަންކަން ވެސް ކުރަންޖެހޭ. މުވަައްޒަފުން ހިސާބު މި ހަދަނީ ހުރިހާ އެއްޗެއް ލައިގެން. އެހެން ހަދާއިރު އެބަހުރޭ 'އައުޓް ލޭޔާސް'. އެ ބައިބައި ނުލައި ރަނގަޅަށް ހިސާބު ހަދައިގެން ބަލައިފިއްޔާ މުވައްޒަފުންގެ މުސާރަ ކުޑައެއް ނުވާނެ،" ޕޭ ކޮމިޝަންގެ އޮފިޝަލް ޔަގީންކަމާ އެކު ވިދާޅުވި އެވެ.

އޭނާ ވިދާޅުވި ގޮތުގައި މުސާރަ ކުޑަވާ ހާލަތު ވަރަށް މަދުވާނެ އެވެ. އެފަދަ ހާލަތެއް ދިމާވާ މަދު މުވައްޒަފުންނަށް ވެސް މައިގްރޭޝަން އެލަވަންސެއް ހަމަޖައްސާފައިވާނެ ކަމަށް އޮފިޝަލް ވިދާޅުވި އެވެ. އެކި މުވައްޒަފުންގެ ހާލަތު ތަފާތުވާނީ މައިގްރޭޝަން އެލަވަންސް ހަމަޖައްސަނީ ވަކިވަކި މުވައްޒަފުންގެ މައްސަލަތަކަށް ރިއާޔަތް ކޮށެވެ.

މުސާރައިގެ ކުރިއެރުމުގެ ތެރޭގައި ހާޒިރީ އެލަވަންސް ނުވަތަ ވަޒީފާއަށް ނުކުންނަ ކޮންމެ ދުވަހަކަށް ވެސް އެލަވަންސެއް ހިމެނެ އެވެ. އެހެންވެ ސަލާން ބުނެފި ނަމަ ނުވަތަ ޗުއްޓީ ނަގައިފި ނަމަ އެ އެލަވަންސް އުނިވެ މުސާރަ މަދުވެ އެވެ. މިއީ ވެސް ގެނައި ބަދަލުތަކާ އެކު އޮތް ޝަކުވާއެކެވެ.

ޕޭ ކޮމިޝަނުން ބުނީ މިއީ ވަޒީފާއަށް ނުކުމެ އިދާރާތަކުގެ ޕާފޯމަންސް ރަނގަޅު ކުރުމަށް ހިތްވަރެއްގެ ގޮތުން ކަނޑައަޅާފައިވާ ގޮތެއް ކަމަށާއި ސަލާމާއި ޗުއްޓީގެ ސަބަބުން މަހެއްގެ އާމްދަނީ ދަށް ވިޔަސް މުޅި އަހަރަށް ބަލާއިރު ލިބޭ އެއްޗެއް މަދު ނުވާނެ ކަމަށެވެ.

މުޅި އަހަރުގެ 12 މަހަށް ބަލައިގެން މުސާރަ ހަދާއިރު ރިއާޔަތް ކުރަނީ ބަންދު ދުވަސްތަކާއި ގާނޫނުގެ ދަށުން އެ މުވައްޒަފަކަށް ލިބެންޖެހޭ ޗުއްޓީގެ އަދަދެވެ. އެ ހުރިހާ ބަންދަކާއި ޗުއްޓީއެއް ކަނޑާލުމުން ކޮންމެ އަހަރެއްގެ 356 ދުވަހުގެ ތެރެއިން މުވައްޒަފުން އޮފީހަށް ނުކުންނަން ޖެހެނީ 206 ދުވަހު އެވެ. މި ދުވަސްތަކުގެ ތެރެއިން ވެސް ސަލާމާއި ޗުއްޓީގެ އެވްރެޖް އަދަދެއް އުނިކޮށް، މުވައްޒަފުންނަށް ލިބޭނެ އަހަރީ އާމްދަނީ ބެލުމުން ކުރިން އަހަރެއްގެ މައްޗަށް ލިބުނު އާމްދަނީއަށް ވުރެ ގިނަވާނެ ކަމުގެ ޔަގީންކަން ޕޭ ކޮމިޝަނުން ދިނެވެ.

"އެ ގޮތަށް މުވައްޒަފެއްގެ އަހަރެއްގެ އެވްރެޖު ސެލަރީ ބަލައިފި ކަމަށް ވަންޏާ [މުސާރައިގެ ކުރިއެރުން] ކުޑަވެފައެއް ނޯންނާނެ. އެ ވަރުގެ ޔަގީންކަން އަޅުގަނޑުމެން އަރުވަން. އެކަމަކު އެ މުވައްޒަފު ޗުއްޓީގައި ހުންނަ މަހެއްގައި ޖުމްލަ އާމްދަނީ ކުޑަވެދާނެ. އެކަމަކު އެނުއަލީ ބަލައިފި ކަމަށް ވަންޏާ އެކްރޮސްޑް ބޯޑު މުސާރަ ބޮޑުވެފައި އޮންނާނީ،" ޕޭ ކޮމިޝަންގެ އޮފިޝަލް ވިދާޅުވި އެވެ.

އޭގެ ބޭނުމަކީ އޭނާ ވިދާޅުވި ގޮތުގައި އޮފީހަށް ނުކުންނަ މުވައްޒަފުންގެ އަދަދު އިތުރު ކުރުމެވެ.

މިހާރު ވެސް އާދިއްތަ ދުވަހާއި ބުރާސްފަތި ދުވަހު އޮފީސްތަކަށް ނުނިކުންނަ މުވައްޒަފުން އިތުރުވެފައިވާއިރު އެ ކަމަށް ވެސް ހައްލު ކުރެވޭނެ ނިޒާމެއް އޮތުން މުހިންމު ވެ އެވެ.

ދައުލަތުގެ ވަޒީފާތައް ބެހިފައިވާ ގޮތުން އެންމެ ބޮޑު އާބާދީއެއް އޮތީ ޖީއެސް-3 ނުވަތަ އޯލެވެލް ފެންވަރުގެ މުވައްޒަފުންގެ މެދުގަ އެވެ. އެއީ ކުރިއަށް ދެވޭނެ މަގުތައް ވެސް އެންމެ މަދު ދާއިރާ އެވެ. އެ ކަމަކު، މި ފަހަރު އެ މުވައްޒަފުންގެ މުސާރަ "ވަރަށް ބޮޑު ތަނުން އުފުއްލާލާފައިވާ" ކަމަށް ޕޭ ކޮމިޝަނުން ބުންޏެވެ.

"އޭގެ މާނައަކީ މުސާރައިގެ އޮނިގަނޑު ވަރަށް ބޮޑު ތަނުން އުފުއްލާލަން ޖެހުން،" އެ ކޮމިޝަންގެ އޮފިޝަލް ވިދާޅުވި އެވެ.

މުސާރަ އެއްހަމަކުރުމުގެ މަސައްކަތް ކުރިއަށް ގެންދާއިރު ބައެއް ކަންކަން ނުހުއްޓި ކުރިއަށް ގެންދެވޭނެ ގޮތަށް ވެސް ބެލި ކަމަށް ޕޭ ކޮމިޝަނުން ބުންޏެވެ. މިސާލަކަށް ޖުޑިޝަރީ ދާއިރާ އަށް ބަލާ ނަމަ "ޖުޑިޝަރީ ކޮންޓިނިއުޓީ އެލަވަންސް" ގެ ނަމުގައި ހާއްސަ އެލަވަންސެއް ވަނީ ކަނޑައަޅައިފަ އެވެ.

"އެ ދުވަހަކަށް ތާވަލް ކޮށްފައި ހުންނަ މައްސަލަތައް ނިމެން ޖެހޭނެ. އެ އަށް ފަހު ހުންނަ އިދާރީ ކަންކަން ވެސް ނިންމާފައި ނޫންތޯ ފަނޑިޔާރާއި ދެން ތިބޭ މުވައްޒަފުންނަށް ގެއަށް ދެވޭނީ. އެ ގޮތަށް ތިބެންޖެހޭ ހާއްސަ ފަރާތްތަކަށް އިތުރު އިނާޔަތްތައް ކަނޑައަޅާފައި ހުންނާނެ،" ޕޭ ކޮމިޝަންގެ އޮފިޝަލް ވިދާޅުވި އެވެ.

އޭނާ ވިދާޅުވި ގޮތުގައި، ޝަރުއީ ދާއިރާގެ މުވައްޒަފުންގެ މުސާރައިގެ ކުރިއެރުމަށް އަންނާނެ ބަދަލުތައް ވަރަށް ތަފުސީލްކޮށް ވަނީ ބަލައިފަ އެވެ. އެކަމަކު، ހާއްސަ ހާލަތްތަކާ ގުޅުވައިގެން ދޭ އެލަވަންސްތައް ނުލައި ހިސާބު ހެދުމުން ނުބައި މަންޒަރެއް ފެންނަނީ ކަމަށް އޮފިޝަލް ވިދާޅުވި އެވެ.

ޕޭ ކޮމިޝަނުން ބުނި ގޮތުގައި، މި ފަހަރު މުސާރައިގެ ކުރިއެރުން ގެނައިއިރު ބައެއް ދާއިރާތަކަށް ހާއްސަ އިސްކަމެއް ދިނެވެ. އޭގެ ތެރޭގައި ސޮފްޓްވެއާ ޑިވެލޮޕަރުން ނުވަތަ އައިޓީ ދާއިރާގެ މުވައްޒަފުންނާއި އެކި ފަންތީގެ އިންޖިނިއަރުން ހިމެނެ އެވެ.

އެއީ ގައުމީ ތަރައްގީގައި މި ވަގުތު މުހިންމު ދާއިރާތަކަކަށް ވާތީ "ލީޑް" ކުރި ނަމަވެސް ހާލަތަށް ރިއާޔަތްކޮށް މުސާރައިގެ "މެޓްރިކްސް" އަށް ބަދަލު ގެނައުމުގެ ފުރުސަތު އޮންނާނެ ކަމަށް އެ ކޮމިޝަނުން ބުންޏެވެ.

"ކުރީގައި މި އޮންނަނީ އެއް މުސާރައެއް. މިސާލަކަށް ޑިގްރީއެއް ވެއްޖިއްޔާ އެއް މުސާރައެއް. މުސާރަތައް މި ބަދަލުވީ މެޓްރިކްސްތަކެއް ހަދައިގެން، ފަންނުތަކެއް ހަދައިގެން މުސާރަ ކަނޑައެޅީމާ. އެހެންވީމާ އަޅާކިޔުން ވަރަށް ބޮޑުވެއްޖެ. އެކަމަކު، މުޅިން ދެ މަސައްކަތެއް ކުރާ ބައެއް މި އުޅެނީ،" ތަފުސީލް ދެއްވަމުން ޕޭ ކޮމިޝަންގެ އޮފިޝަލް ވިދާޅުވި އެވެ.

މުސާރައާ ގުޅޭ ގޮތުން މުވައްޒަފުންނަށް ހުރި އޮޅުންތައް ގިނަ ކަމަށް ބެލެވެ އެވެ. އަދި މި ގެނައި ބޮޑު ބަދަލުގެ ތެރޭގައި ވަކިވަކި މުވައްޒަފުންނަށް ހައްލު ހޯދައިދޭންޖެހޭ ކަންކަން ވެސް އެބަހުރި ކަމަށް ޕޭ ކޮމިޝަނުން ގަބޫލުކުރެ އެވެ. އެކަމަކު މި މަހު މުސާރަ ލިބެންވާއިރަށް އަދި އެ ހުރިހާ ކަމެއް ހައްލު ނުކުރެވުނަސް ކޮމިޝަނުން ދެކެނީ ލަސް ނުވެ ހުރިހާ ކަމެއް ވެސް ހައްލުވާނެ ކަމަށެވެ.