23 ނޮވެމްބަރ 2025 - 06:20
އޭނާއަކީ "ސްޓާ ކިޑެއް" ނޫން ކަމަށް ބޮލީވުޑަށް އަލަށް ތައާރަފުވި އެކްޓަރުންގެ ތެރެއިން އެންމެ ކާމިޔާބު އެކްޓަރު އަހާން ޕާންޑޭ ބުނެފި އެވެ.
އަހާން އެގޮތަށް ބުނީ ޖީކިއު އިންޑިއާއަށް މިދިޔަ ބުރާސްފަތި ދުވަހު ދިން އިންޓަވިއުއެއްގަ އެވެ. އެ އިންޓަވިއުގައި އޭނާއާ ކުރި އެއް ސުވާލަކީ "ސްޓާ ކިޑް"އަކަށް ވާތީ އާންމުން އެކަމާ މެދުގައި ދެކޭގޮތާ މެދުގައި އޭނާގެ ހިޔާލަކީ ކޮބައިހެއްޔެވެ؟
އޭގެ ޖަވާބުގައި އަހާން ބުނީ އޭނާގެ ބޮޑުބޭބެ ޗަންކީ ޕާންޑޭއަކީ ސްޓާރެއް ނޫން ކަމަށެވެ. އެކަމަކު، އޭނާގެ ގާތް ރައްޓެހިންގެ ގޮތުގައި ތިބި "ސްޓާ ކިޑްސް"ގެ ފަރާތުން އެއްޗެއް ބުނާ ނަމަ، އެ އެންމެންނަށް ވެސް ކުރިމަތިވެފައި ހުރީ ތަފާތު ތަޖުރިބާތަކެއް ކަމަށް އޭނާ ބުންޏެވެ.
އަހާންއަކީ އިންޑިއާގެ ވިޔަފާރިވެރިޔާ އަލޯކް ޗިއްކީ ޕާންޑޭ އާއި ޑިއޭން ޕާންޑޭގެ ދަރިއެކެވެ. އޭނާގެ މައިންބަފައިންނަކީ ފިލްމީ ދާއިރާގައި މަސައްކަތްކުރި އަދި ކުރާ ބައެއް ވެސް ނޫނެވެ. އެކަމަކު، އަހާންގެ ބައްޕަ އާއި ބޮލީވުޑްގެ ސުޕަސްޓާރު ޝާހްރުކް ޚާންއަކީ ވަރަށް ގާތް ރައްޓެހިންނެވެ. އަދި އޭނާގެ ބޮޑުބޭބެ ޗަންކީއަކީ ފިލްމުތަކުގައި ސަޕޯޓިން ރޯލުތައް ކުޅޭ މީހަކަށް ވާތީ ފިލްމީ ދާއިރާގެ މީހުންނާ އަހާން ގާތް ގުޅުމެއް އޮވެ އެވެ.
"އަހަންނަށް އަބަދުވެސް ހީވަނީ އަހަންނަށް އާދެވިފައި މި ހުރީ ފެންސުގެ ބޭރުންހެން. ފެންސުގައި އަތްޖެހުނަސް، އޭގެ އަނެއް ފަރާތަށް ނުދެވޭ ކަހަލަ އިހުސާސެއް ކުރެވެނީ. ފިލްމު ކުޅޭ މީހުންނާ ވަރަށް ކައިރީގައި އުޅެ ބޮޑުވިޔަސް، އެއީ އަހަރެންގެ ދުނިޔެ ކަމަށް ކުރިން ނުދެކެން،" އަހާން ބުންޏެވެ.
"އެކަމަކު، ދާއިރާގެ އެ ހުރިހާ ކަމެއް ގާތުން ފެނުމަކީ އަހަންނަށް ލިބުނު މޮޅެއް. މި ދާއިރާގައި އެންމެ ކުރިއަރާފައި ތިބި މީހުންގެ ފަރާތުން އަހަންނަށް ވަރަށް ގިނަ ކަންކަން ދަސްވި."
އަހާންގެ ފުރަތަމަ ފިލްމު، މިދިޔަ ޖުލައި މަހު ގެނެސްދިން "ސައްޔާރާ"އަކީ ބޮލީވުޑްގެ އެންމެ ކާމިޔާބު ލޯބީގެ ފިލްމެވެ. އެ ފިލްމަށް ބޮކްސް އޮފީހުގައި 580 ކްރޯޑް ރުޕީސްގެ ބޮޑު އާމްދަނީއެއް ލިބުނެވެ. އެ ފިލްމުގައި އޭނާ ދެއްކި އެކްޓިންނަށް ގިނަ ބައެއްގެ ތައުރީފު އޮއްސާލި އެވެ.
"ސައްޔާރާ"ގެ ކާމިޔާބީއަށް ފަހު އަހާން އަންނަނީ އެ ފިލްމު ގެނެސްދިން ވައިއާރުއެފްގެ އިތުރު ފިލްމެއްގައި މިހާރު މަސައްކަތްކުރަމުންނެވެ. އެއީ "ޓައިގާ ޒިންދާ ހޭ" އާއި "ސުލްތާން" ކަހަލަ ފިލްމުތައް ގެނެސްދިން އަލީ އައްބާސް ޒަފަރު ޑައިރެކްޓުކުރާ އެކްޝަން ފިލްމެކެވެ. އެ ފިލްމުގެ ނަން އަދި ހާމައެއް ނުކުރެ އެވެ.