ބަލިކަށި މަގަތުފާލަމަކާ ހެދި ވިޔަފާރި ބަނދަރު ބޮޑު ރިސްކެއްގައި!

24 ނޮވެމްބަރ 2025 - 08:43

ކޮންޓެއިނަރު ކެރޭނުގައި އަޅުވަން، ކޮންޓެއިނަރުތަކުގެ މަތީގައި ތިން މީހުން ތިއްބެވެ. އެ މީހުން ތިބީ ކޮންޓެއިނަރުތައް މަތިން ކައްސާލައިގެން ބޭރަށް ވެއްޓެން ދިމާވެއްޖެ ހާލަތެއްގައި ރައްކާތެރިކަމާ އެކު ތިބެވޭ ފަދަ "ސޭފްޓީ"އެއް ވެސް އަޅައިގެންނެއް ނޫނެވެ. އެކަމަކު، މި މަންޒަރު ފެންނަ މީހަކަށް ބޮޑު ވާނީ އެ މީހުން ސޭފްޓީ ނޭޅި މައްސަލަ އެވެ.

ނަމަވެސް ކެރޭނުގެ ބަރު ހުކް ދެކޮޅަށް ދުއްވައިގަތުމާ އެކު، އޭގައި ނުޖެހި ނެއްޓެން އެ ތިން މީހުން އުޅެން ޖެހުނު ގޮތް ފެނުނީމާ ސޭފްޓީ ނާޅަން ޖެހޭ ސަބަބު ވިސްނޭނެ އެވެ.

"ކެރޭނު ހެލިގަތް ގަނޑީގައި އެ މީހުންގެ ގައިގައި ޖެހުނު ނަމަ މަރެއް ނު ވާނީ؟ ކެރޭނުގެ ބުޅިގަނޑުން ޖެހިގެން މިތާ ދެ ސްޓާފުން މިހާތަނަށް މަރުވެއްޖެ،" ކަނޑު ގަދަވެގެން މުދާ ނުބޭލޭނެ ކަމަށް މީހަކަށް ގަބޫލު ނުކުރެވޭހާ ރީތިކޮށް އޮތް ދުވަހެއްގައި ހިނގި އެ ހާދިސާތަކާ ގުޅިގެން އެމްޕީއެލްގެ މެނޭޖިން ޑިރެކްޓަރު މުހައްމަދު ރިޝްވާން ކަންބޮޑުވުމާ އެކު "މިހާރު" ގެ ނޫސްވެރިން ގާތު ވިދާޅުވި އެވެ.

ކަނޑުގެ އަޑީގެ ތަންކޮޅެއް އަޑިން ދެމޭ ބާނިތަކާ އެކު، ބޯޓު ދެކޮޅަށް ދަމާތީ ކެރޭނުގެ ބުޅިގަނޑު އެ ގޮތަށް ހެލެން ފަށައިފި ނަމަ ދެން ޖެހޭނީ ބޯޓު ދެމުން ހުއްޓެންދެން މަޑުކުރާށެވެ. މުދާ ބޭލުން އެ ވަގުތަަށް އެ ހުއްޓުނީ އެވެ.

މިއީ ރާއްޖޭގެ މައި ވިޔަފާރި ބަނދަރުގެ ހާލަތު ކުޑަމިންވަރެކެވެ. ދުނިޔޭގެ މެރިޓައިމް ސިނާއަތަށް ބޮޑެތި ކުރިއެރުންތަކެއް އައިސް ކޮމާޝަލް ހާބަރުތައް ވެސް އެ ކުރިއެރުންތަކާ އެއްވަރަށް ތަރައްގީ ވަމުން އަންނައިރު ރާއްޖޭގެ ހާލަތު އޮތީ އަދިވެސް ފަހަތުގަ އެވެ. ރާއްޖޭގެ ވިޔަފާރި ބަނދަރުގެ ކީވޯލް އަށް ނުވަތަ މަގަތުފާލަމަށް މި އުޅެނީ އާގުބޯޓެއް ކައިރި ނުކުރެވިގެންނެވެ. އެކި ސަރުކާރުތަކާ އެކު، އެމްޕީއެލްގެ މެނޭޖުމަންޓުތައް ބަދަލުވެ، ބޮޑެތި ސްޓްރެޓެޖީތައް ހަދަމުން އައި ނަމަވެސް އެ ވަރުގެ ކަމެއް ހައްލު ކުރެވޭނެ ސިކުނޑިތަކެއް ނުފެނުނެވެ.

ދުރުރާސްތާގެ ޕްލޭނެއްގެ ނަތީޖާ ހާސިލް ވަންދެން ނަމަވެސް މަގަތުފާލަން މި ޒަމާނުގެ ފެންވަރަކަށް ތަރައްގީކޮށް، އެ ތަނުގައި ވަރުގަދަ ކެރޭނެ ހަރުކޮށްލެވޭނެ ވިސްނުމެއް ގެންގުޅުނު ބަޔަކު ނެތެވެ.

މާލޭ ބަނދަރުގައި އޮތް އާގުބޯޓަކުން ކޮޅުވެއްޓިއަކަށް މި މަހުގެ ދެވަނަ ދުވަހު ދެ އެކްސްކަވޭޓަރެއް އަރުވަން އުޅެނިކޮށް ދެ މީހަކު މަރުވި ހާދިސާގެ ވެސް މައިގަނޑު ސަބަބަކީ އެއީ އެވެ. ވިޔަފާރި ބަނދަރުގެ މަގަތުފާލަމަށް ބޮޑެތި ބޯޓުތައް ކައިރިކޮށް، މުދާ ބޭލުމަށްޓަކައި ހާއްސަ ކެރޭނެ އެ ފާލަމުގައި ހަރުކޮށްފައި ނެތުމުން އެކްސްކަވޭޓަރު ބާލަން ޖެހުނީ ބޯޓު ދުރުގައި ބާއްވައިގެން ކޮޅުވެއްޓިއަކަަށެވެ. އެ ވަގުތު އެ ކަން ކުރަން ތިބި މީހުންނަށް ހެދުނު ގޯސްތަކުގެ ތެރޭގައި ކޮޅުވެއްޓި ބަންޑުންްޖަހާލައި ދެ މީހެއްގެ ފުރާނަ ދިޔައީ އެވެ.

އާގުބޯޓުގައި ހުންނަ ކެރޭނުތަކަކަކީ ހަގީގަތުގައި ބޯޓުގައި ގެންނަ ހުރިހާ މުދަލެއް ބާލަން ހުންނަ ކެރޭނުތަކެއް ނޫނެވެ. އެއީ މި ޒަމާނުގައި އެކަން ކުރާ ގޮތެއް ވެސް ނޫނެނެވެ.

ނަމަވެސް ހަގީގަތަކީ މާލޭގެ ވިޔަފާރި ބަނދަރު އެންމެ ފަހުން ތަރައްގީކޮށް 1997 ގައި ހުޅުވިއިރު ވެސް މަގަތުފާލަން ހަދާފައި ވަނީ އެހާ ވަރުގަދަކޮށް ނޫން ކަމެވެ. އެއީ ވިޔަފާރި ބަނދަރަށް މިހާތަނަށް އެންމެ ބޮޑު މަރާމާތެއް ގެނައި ފަހަރު ވެސް މެ އެވެ.

"އޭރުގައި މުދާ ބާލަމުން އައި ގޮތަށް 2025 ގައި ވެސް މުދާ މި ބާލަނީ. ހަމަ އެގޮތަށް، އެއްވެސް ބަދަލެއް ނައިސް،" އެމްޕީއެލްގެ މިހާރުގެ އެމްޑީ ރިޝްވާން ވިދާޅުވި އެވެ.

މަގަތުފާލަން ބާވެ، ބޮޑެތި ބޯޓުތައް އެ ތަނާ ކައިރި ނުކުރެވޭ ހިސާބަށް ދިއުމުގެ ނަތީޖާއަކީ ރާއްޖެ އަށް ބޮޑެތި ބޯޓުތައް ނައިސް ސްރީ ލަންކާގެ ބަނދަރަށް މުދާ ބޭލުމަށް ފަހު، ކުދި ބޯޓުފަހަރުތަކުގައި މުދާ ގެންނަން ފެށުމެވެ. ސަބަބަކީ ރާއްޖޭގެ ވިޔަފާރީގެ ބަނދަރަށް ބޮޑެތި ބޯޓުފަހަރު ކައިރި ކުރެވޭނެ ފެންވަރުގެ ވަރުގަދަ މަގަތުފާލަމެއް ނެތުމާއި އެ ކަމަށް ބޭނުންވާ ކެރޭނެއް އެ ފާލަމުގައި ހަރުކޮށްފައި ނެތުމެވެ.

"އެންމެ ބޮޑު މައްސަލައެއް ކަމަށް އަޅުގަނޑުމެންނަށް ފާހަގަވީ މުދާ ހިފައިގެން ބޮޑެތި ބޯޓުފަހަރުތައް ރާއްޖެ އައުން އެއްކޮށް ކަހަލަ ގޮތަކަށް ހުއްޓިފައިވުން. އެހެން އެ ދިމާވަނީ ރާއްޖޭގެ ވިޔަފާރި ބަނދަރަށް މުދާ ބާލައި ނިންމަން ގިނަ ދުވަސްވުމުން ލިބޭ ގެއްލުމާ ހެދި،" ރައްޔިތުންގެ މަޖިލިހުގެ ނައިބު ރައީސް އަހުމަދު ނާޒިމް މިދިޔަ ހަފުތާގައި އެމްޕީއެލްގެ ހާލަތު ބެއްލެވުމަށް ވިޔަފާރި ބަނދަރަށް ކުރެއްވި ޒިޔާރަތަށް ފަހު "މިހާރު" އަށް ވިދާޅުވި އެވެ.

"ކީވޯލް އަށް ބޮޑެތި ބޯޓުފަހަރު ކައިރި ނުކުރެވޭތީ ބަނދަރުން ބޭރުގައި ބޯޓު ބާއްވައިގެން މުދާ ބާލަން 10 ވަރަކަށް ދުވަސް ނަގާ. އެއީ ވަރަށް ދިގު މުއްދަތެއް. އެ ކަން ކުރާ ބަޔަކަށް ބޮޑު ގެއްލުމެއް."

އެ ހާލަތުގެ ސަބަބުން ތަރައްގީގެ ބައެއް މަޝްރޫއުތަކަށް ބޭނުންވާ މުދާ ގެނައުން އުނދަގޫވާ ހާލަތްތައް ވެސް ވަނީ މެދުވެރިވެފަ އެވެ. ދަރުމަވަންތަ ހޮސްޕިޓަލް އިމާރާތް ކުރަން އުޅުނު ދުވަސްވަރު ޕައިލް ކުރަން ގެނައި މެޝިނެއް ބަރުކަމުން މަގަތުފާލަމަށް ބާލަން އެމްޕީއެލްގެ ޓެކްނިކަލް މީހުން ދެކޮޅު ހެދުން އެއީ މީގެ މިސާލެކެވެ.

ރިޝްވާން ވިދާޅުވި ގޮތުގައި އެހެން ގޮތެއް ނެތިގެން އެ ފަހަރު އެއްބަސްވީ އެ މެޝިން ބަނދަރަަށް ބާލާތާ ކުޑަ ވަގުތުކޮޅެއްގެ ތެރޭގައި އެ ތަނުން ނެގުމަށެވެ.

މެރިޓައިމް ސިނާއަތު ތަރައްގީވަމުން އައިސް މިއީ ބޯޓުފަހަރުގައި ހުންނަ ކެރޭނުން މުދާ ބާލާ ޒަމާނެއް ނޫނެވެ. ބޯޓު ކައިރި ކުރާނީ ބަނދަރަށެވެ. ކީވޯލްގައި ހަރުކޮށްފައި ހުންނަ ކެރޭނުން މުދާބާލާނީ އެވެ.

"ބޯޓުތަކުގައި މިހާރު އާންމުކޮށް ނުވެސް ހުންނާނެ އާންމުކޮށް މުދާ ބާލަން ބޭނުންކުރާ ކެރޭނެއް. އަނެއްކާ ބޯޓު ބަނދަރަށް ކައިރި ނުކޮށް ކަނޑުމަތީގައި މުދާ ބޭލުމަކީ ވަރަށް ނުރައްކާތެރިކަމެއް،" މެރިޓައިމް ދާއިރާގެ ތަޖުރިބާކާރަކު ވިދާޅުވި އެވެ.

ރާއްޖޭގެ ޓޫރިޒަމް އިންޑަސްޓްރީ އަށް 1997 ވަނަ އަހަރުން ފެށިގެން މިއަދާ ހަމައަށް އައިސްފައި ވަނީ ވަރަށް ބޮޑު ކުރިއެރުމެކެވެ. އޭރު ރާއްޖޭގައި ހުރީ އެންމެ 10،000 ޓޫރިސްޓް އެނދެވެ. ޓޫރިސްޓް އެނދުގެ އަދަދު މިހާރު ވަނީ 66،000 އަށް ވުރެ އިތުރު ވެފަ އެވެ.

ޓޫރިޒަމް އެހާވަރަށް ކުރިއަރައިގެން އަންނައިރު ރިސޯޓްތަކާއި ޓޫރިޒަމްގެ އެހެން ފެސިލިޓީތައް ބިނާކުރަން ގިނަ އަދަދެއްގެ ބަލްކު ކާގޯ ގެންނަން ޖެހުނެވެ. އެ ފަދަ މުދާ ހިފައިގެން އަންނަ ބޮޑެތި އާގުބޯޓުތައް 1997 ގައި އެޅި މަގަތު ފާލަމަކާ ކައިރިއެއް ނުކުރެވެ އެވެ.

ފުންމިން ނުލިބުމާއި އެހެން އެތައް ސަބަބަކާ ހެދި އެވެ.

އެމްޕީއެލްގެ ގަވާނަންސް އެންޑް ޑިވެލޮޕްމެންޓް ކޮންސަލްޓެންޓް، އަނިލް އާދަމް ވިދާޅުވި ގޮތޮގައި ބަނދަރުގައި ކެރޭނެއް ޖަހައި، ބޮޑެތި ބޯޓުފަހަރު ގާތްކުރެވޭ ވަރަށް ބަނދަރު ތަރައްގީ ނުކުރުމުގެ ނަތީޖާ މިއަދު ވަރަށް ގޯހެވެ.

ރާއްޖެ އަށް ގެންނަން ޖެހޭ މުދަލުގެ 80 ޕަސެންޓް މިހާރު ފުރަތަމަ ގެންދަނީ ލަންކާގެ ކޮޅުނބުގެ ބަނދަރަށެވެ.

"މިހާރު ލަންކާ އަށް އެބައޮތް ރާއްޖޭގެ އިގުތިސާދު ހުއްޓާލުމުގެ ވަރަށް ބޮޑު ބާރެއް. އެ މީހުން މުދާތައް ލަސްކޮށްލަން ބޭނުންވެއްޖިއްޔާ ލަސްކޮށްލެވޭނެ،" އަނިލް ވިދާޅުވި އެވެ.

އެއީ ރާއްޖޭގެ ސިޔާދަތަށް އޮތް ނުރައްކަލަކަށް ވުމުގެ އިތުރުން މުޅި އިގުތިސާދަށް ވެސް އޮތް ވަރަަށް ބޮޑު ގެއްލުމެކެވެ.

"މީގެ ސަބަބުން މިވާ ގޮތަކީ ބޯޓު ހުސްނުކުރެވި، ބަނދަރުގައި އޮންނަ ކޮންމެ ދުވަހަކަށް 18،000، ޑޮލަރު، 20،000 ޑޮލަރު ޗާޖު ކުރަނީ. އާއްމު ރައްޔިތުންގެ މުދަލަށް އެ ފައިސާ މި ވަންނަނީ. ވަނީމާ އަހަރަކު ދެ ބިލިއަން ރުފިޔާ އެބަދޭ އިގުތިސާދުން އާއްމުންގެ އަތުން އިސްރާފުވެގެން،" އަނިލް ވިދާޅުވި އެވެ.

އޭނާ ވިދާޅުވި ގޮތުގައި ބަނދަރުގެ ހާލަތު ރަނގަޅު ނަމަ އާގުބޯޓު ހުސްކޮށްލަން ހޭދަވާނީ ގިނަވެގެން 24 ގަޑިއިރެވެ. އެ ގޮތަށް ކަންތައް ވާ ނަމަ ދެ ބިލިއަން ރުފިޔާ ސަލާމަތް ކުރެވޭނެ އެވެ.

މިހާރު ހާލަތު ހުރި ގޮތުން ރާއްޖެ އަށް ގެންނަ ކޮންމެ ކޮންޓެއިނަރަކަށް ވިޔަފާރިވެރިން 3،000 ޑޮލަރު ހޭދަކުރެ އެވެެ. އެއީ ޔަގީނުން ވެސް މީހުން ގަންނަ މުދަލުގެ އަގުގެ ތެރެއަށް ވަންނާނެ ފައިސާ އެވެ.

"އެހެން ގައުމުތަކުގައި، އިންޑޮނޭޝިއާ ކަހަލަ ތަންތަނުގައި ކޮންޓެއިނަރަކަށް 100 ޑޮލަރު ޖެހެނީ،" އަނިލް ވިދާޅުވި އެވެ.

ރިޝްވާން ވިދާޅުވި ގޮތުގައި މި ހުރިހާ ގެއްލުމެއް ވަމުން ދަނީ ބަނދަރުގައި ހާމަ ކެރޭނެއް ޖަހާފައި ނެތުމުންނެވެ. ބަނދަރަށް 39 އަހަރު ވެގެން ދިޔައިރު އެފަދަ ކެރޭނެއް ޖެހިފައި ނެތީ ކީއްވެތޯ އެއީ ސަރުކާރުތަކުން ޖަވާބު ދޭން ޖެހޭ ސުވާލެކެވެ.

"ހާބަ ކެރޭނެއް ޖަހައިފިއްޔާ، އެ ކެރޭނުން ކޮންޓެއިނާ ނަގާނީ އޮޓަމެޓިކުން. [އެމްޕީއެލް މުވައްޒަފުން ކޮންޓެއިނަރު މައްޗަށް އަރައި ބުޅިއަޅުވާކަށް ނުޖެހޭނޭ]. އޭތި ނަގާނެ ގަޑިއަކު ވިހި، ފަންސަވީސް ކޮންޓެއިނަރު،" ރިޝްވާން ވިދާޅުވި އެވެ.

އެމްޕީއެލްއަށް އާމްދަނީ ލިބުނު ވަރާ އަޅަައި ބަލާއިރު އެއީ ނުކުރެވޭ ވަރުގެ ކަމެއް ވެސް ނޫނެވެ. ރައްޔިތުންގެ މަޖިލީހުން މިދިޔަ ހަފުތާގައި ހެދި އެސެސްމެންޓަކަށް ފަހު ބުނެފައިވާ ގޮތުގައި 2018 ވަނަ އަހަރު އެމްޕީއެލްގައި 600 މިލިޔަން ރުފިޔާ ހުއްޓެވެ.

"އެ ކެރޭނު އެއީ މާބޮޑު އިންވެސްޓްމެންޓެއް ވެސް ނޫން. ގާތްގަނޑަކަށް 100 މިލިޔަން ރުފިޔާ،" އަނިލް ވިދާޅުވި އެވެ.

މާލޭ ވިޔަފާރި ބަނދަރުގެ މަގަތު ފާލަން 1997 ވަނަ އަހަރު ހެދި އިރު އެއީ އެންމެ 1،500 ކޮންޓެއިނަރުގެ މުދާ ހޭންޑުލް ކުރަން އޮތް ބަނދަރެވެ. ކީވޯލްގެ ސްޓްރެންތާއި ބަނދަރުގެ ޖާގަ ވެސް އޮތީ އެ ވަރަށެެވެ. މާބޮޑު ނޫން ވެއާހައުސް އެއް ހެދުން ފިޔަފައި އެހެން ތަރައްގީއެއް މިދިޔަ 39 އަހަރުގެ ތެރޭގައި އަައިސްފައެއް ނުވެ އެވެ. އެކަމަކު، މިހާރު އެ ބަނދަރުގައި މަދުވެގެން 5،000 ކޮންޓެއިނަރު މެނޭޖު ކުރަން ޖެހެ އެވެ.

ރިޝްވާން ވިދާޅުވީ، 5،000 ކޮންޓެއިނަރު މެނޭޖު ކުރެވެނީ ހުޅުމާލެ އާއި ތިލަފުށްޓަށް ވެސް ބައެއް ކޮންޓެއިނަރު ބާލައިގެން "ވަރަށް މެނުއަލްކޮށް" ހިންގާ އުނދަގޫ އޮޕަރޭޝަނެއްގެ ތެރެއިން ކަމަށެވެ.

"އެއީ އަސްލު ނުކުރެވޭ ވަރު ކަމެއް. އެއީ ކުރަން ނުވާވަރުގެ ކަމެއް،" ރިޝްވާން ވިދާޅުވި އެވެ.

ރިޝްވާނާއި އަނިލް ވެސް ވިދާޅުވި ގޮތުގައި "ޕޯޓް ޓު ޕޯޓް ކަނެކްޓިވިޓީ އިންޑެކްސް" ގައި ރާއްޖެ ވަރަށް ފަހަތުގައި އޮންނަން ޖެހެނީ ބަނދަރު ކުޑަވެފައި ތަރައްގީއެއް ނެތީމަ އެވެ.

އަލީ އާދަމް ވިދާޅުވީ، ބަނދަރުގެ ހާލަތު ރަނގަޅު ކޮށްފި ނަމަ ރާއްޖެ އަށް ވަރަށް ބޮޑު ނަފާއެއް ލިބޭނެ ކަމަށެވެ. އެއީ އޭރުން ރާއްޖޭގައި ޓްރާންޝިޕްމަންޓް ވިޔަފާރި "އޯގަނިކަލީ" ފެށޭނެތީ އެވެ.

"މި ސަރަހައްދުގައި މިލިއަނުން ކޮންޓެއިނަރު އެނބުރޭ، އޭގެ އެއްޗެހިތައް ވެސް އަޅާލާނެ މިތަނަށް، ބަހައްޓާ ކޮންމެ ކޮންޓެއިނަރަކަށް ލާރި ލިބެމުން ދާނެ،" އޭނާ ވިދާޅުވި އެވެ.

ރިޝްވާން ވިދާޅުވި ގޮތުގައި ރާއްޖެއަށް ރިސޯޓްތައް އިތުރު ކުރުމާއި އިތުރު އެތައް ޕްރޮޖެކްޓެއް ހިންގާނެ ކަމަަށް ބެލެވޭ އިރު، މާލޭ ވިޔަފާރި ބަނދަރު މިހާރު އޮތް ހާލަތުގައި ބާއްވައިގެން، އެ ޕްރޮޖެކްޓްތަކަށް މުދާ އެތެރެކޮށް ބޭލުމުގެ ހިދުމަތް ދޭން ދަތިވާނެ އެވެ.

"މިހާރު މިދާ ރޭޓުން، ކުރިއަށް އޮތް ދެ އަހަރު ތެރޭގައި އެއަކަށް ހިދުމަތެއް ނުދެވޭނެ. އެއީ ހަމަ ނުވާނެ ކަމެއް،" ކަންބޮޑުވުމާ އެކު ރިޝްވާން ވިދާޅުވި އެވެ.

އެކަމަށް ކޮންމެވެސް ވަރެއްގެ ލުޔެއް ހޯދަން ރައީސް ޑރ. މުހައްމަދު މުއިއްޒުގެ ސަރުކާރުން މިހާރު ވެސް އަންނަނީ މަސައްކަތްތަކެއް ކުރަމުންނެވެ. މިހާރުން މިހާރަށް ކުރެވެން އޮތް އެއް ކަމަކީ ހުސް ކޮންޓެއިނަރުތައް ގެންގޮސް ތިލަފުށީގައި ބެހެއްޓޭނެ އިންތިޒާމެއް ހަމަޖެއްސުމެވެ.

ރިޝްވާން ވިދާޅުވީ، ހުސް ކޮންޓެއިނަރުތައް ބަހައްޓާނެ ޖާގަ މިހާރު ވެސް ވަނީ ތިލަފުށީގައި ހަދާފައިވާ ކަމަށެވެ.

މާލޭ ވިޔަފާރި ބަނދަރަކީ އެންމެ ފަސް ހެކްޓަރުގެ ބިމެއްގައި ހިންގާ ބަނދަރަކަށް ވާއިރު، މި ސަރުކާރުން މިހާރު ވަނީ 60 ހެކްޓަރުގެ ބިމެއް ވެސް ތިލަފުށިން ދީފަ އެވެ.

"ދެން އެތަނުގައި މި ހަދަނީ އިތުރު 100 މިޓަރުގެ މައިނަސް 15 ގެ ކީވޯލް އެއް. އޭރުން އެ ތަނަށް ބޮޑެތި ބޯޓުފަހަރު ގާތްކޮށް 24 ގަޑި އިރު ތެރޭގައި ބޯޓް ހުސްކުރަން ފެށޭނެ،" ވިޔަފާރި ބަނދަރު ތިލަފުށްޓަށް ބަނދަރު ބަދަލުކުރުމުގެ ތަސައްވުރު ކޮންމެވެސް ވަރަކަށް ތަފްސީލު ކޮށްދެއްވަމުން ރިޝްވާން ވިދާޅުވި އެވެ.

ރާއްޖޭގެ މައި ވިޔަފާރި ބަނދަރު ތަރައްގީ ނުކޮށް، ހާއްސަކޮށް އެންމެ އަސާސީ ކަންކަން ދޫކޮށްލައިގެން ތިބޭތާ އެތައް އަހަރެކެވެ. ސަތޭކަ މިލިއަން ރުފިޔާގެ ކެރޭނެއް ގެނެސް އެ ހަރުކުރެވޭނެ ފެންވަރަށް ހަމައެކަނި މަގަތުފާލަން ހަދާލާނެ ގޮތެއް ނުހޯދައި އެތައް އަހަރެއް ވެއަތުވެ ދިއުމަކީ ބޮޑު މައްސަލައެކެވެ. އެކަމަކު، ދެން އޮތީ ތިލަފުއްޓަށް ވިޔަފާރި ބަނދަރު ބަދަލުކުރުމުގެ މަރުހަލާ އެވެ. އަމާޒަކީ އަންނަ އަހަރުގެ ޖުލައި ހިސާބެވެ.

ނަމަވެސް މާޒީ އަށް ބަލާއިރު މި ފެންނަނީ ކަންކަން ބޮއްސުންލައިގެން ދާއިރު ވެރިން ބަލަހައްޓައިގެން ތިބުމުގެ ރަނގަޅު މިސާލެކެވެ.