22 ނޮވެމްބަރ 2025 - 11:05
އޮސްޓްރޭލިއާގެ ޓީމަށް ކުޅުނު ފޯވާޑް ރަޔަން ވިލިއަމްސް އަށް އިންޑިއާގެ ގައުމީ ޓީމަށް ކުޅުމުގެ ހުއްދާ ފީފާއިން ދީފި އެވެ.
ބެންގަލޫރު އެފްސީގެ ވިންގް ފޯވާޑް ކުރިން ވަނީ އޮސްޓްރޭލިއާގެ ސީނިއާ ޓީމަށް ވެސް އެއް މެޗު ކުޅެފަ އެވެ.
ޖޫން 2019 ގައި ދެކުނު ކޮރެއާ ދެކޮޅަށް އެސްޓްރޭލިއާއިން ކުޅުނު އެކުވެރިކަމުގެ މެޗުގައި ބަދަލު ކުޅުންތެރިޔެއްގެ ގޮތުގައި ކުޅެން ވިލިއަމްސް ކުޅުން ނުކުތެވެ. އެކުވެރިކަމުގެ މެޗުތަކުގައި ކުޅުނަސް ގައުމީ ޓީމު ބަދަލު ކުރުމަކީ ފީފާގެ ގާވާއިދުން ހުއްދަ ކުރާ ކަމެކެވެ. އެކަމަކު ސީނިއާ ގައުމީ ޓީމުގައި ރަސްމީ އެއްވެސް މެޗެއް ކުޅެފިނަމަ ގައުމީ ޓީމު ބަދަލެއް ނުކުރެވޭނެ އެވެ.
އުމުރުން 32 އަހަރުގެ ވިލިއަމްސް އުފަންވީ އޮސްޓްރޭލިއާ އަށެވެ. އޭނާގެ މައިންބަފައިންނަކީ އިންޑިއޯ އަދި އިނގިރޭސި ދަރިކޮޅުގެ ދެމެފިރިންނެވެ.
ކުރިން ބާސްންލޭ އާއި ޕޯޓްސްމައުތު އަދި ފުލަމް އަށް ވެސް ކުޅުނު ވިލިއަމްސް އަށް އިންގްލެންޑާއި ވޭލްސް އާއި އޮސްޓްރޭލިއާ އަދި އިންޑިއާގެ ގައުމީ ޓީމަށް ވެސް ކުޅުމުގެ ހައިސިއްޔަތު ލިބިފައި އޮތެވެ.
އޭނާ ކުޅެން އެންމެ ފުރަތަމަ ހިޔާރު ކުރީ އޮސްޓްރޭލިއާ އަށެވެ. އެ ގައުމުގެ އުމުރުފުރާތަކުގެ ގައުމީ ޓީމުތަކަށް ވެސް ކުޅުނެވެ. ޔުނައިޓެޑް އެރަބް އެމިރޭޓްސްގައި 2012 ގައި ބޭއްވި 19 އަހަރުންދަށުގެ އޭޝިއަން ކަޕް އަދި ތުރުކީގައި 2013 ގައި ބޭއްވި 20 އަހަރުންދަށުގެ ވޯލްޑް ކަޕްގައި ވެސް އޭނާ ވަނީ އޮސްޓްރޭލިއާ ޓީމަށް ކުޅެފަ އެވެ.
އިންޑިއާގެ ރަށްވެހިކަން ހޯދުމުން ވިލިއަމްސް އަށް ވަނީ އޮސްޓްރޭލިއާގެ ރައްޔިތުންކަން ގެއްލިފަ އެވެ. އިންޑިއާގެ ރައްޔިތެއްގެ ގޮތުގައި ހުރެގެން އެހެން ގައުމެއްގެ ރައްވެއްސެއްގެ ގޮތުގައި ހުރުމަކީ ގާނޫނީގޮތުން މަނާ ކަމެކެވެ.
މިދިޔަ އަންގާރަ ދުވަހު ބަންގްލަދޭޝާ ދެކޮޅަށް ކުޅުނު މެޗަށް ތައްޔާރުވާން އިންޑިއާއިން ކުރިއަށްގެންދިޔަ ޓްރޭނިން ކޭމްޕްގައި ވިލިއަމްސް ބައިވެރިވި އެވެ.
ނޭޕާލަށް އުފަން ބޮލީވިއާގެ ކްލަބަކަށް ކުޅެމުން އަންނަ ޑިފެންޑަރު އަބީނީޓް ބަރްތީ އަށް ވެސް އިންޑިއާގެ ގައުމީ ޓީމަށް ކުޅެން ހުއްދަ ހޯދުމުގެ މަރުހަލާތައް މިހާރު ކުރިއަށްދާކަމަށް ރިޕޯޓްތައް ބުނެ އެވެ. އޭނާ ވެސް ވަނީ މިފަހަރުގެ އިންޓަނޭޝަނަލް ބްރޭކްގައި އިންޑިއާގެ ޓްރޭނިން ކޭމްޕްގައި ބައިވެރިވެފަ އެވެ.