22 ނޮވެމްބަރ 2025 - 11:31
ލަންޑަން (ނޮވެމްބަރު 22) - ޗެލްސީގެ ތަރި ކޯލް ޕާމާ އަނިޔާގެ ސަބަބުން ގިނަ ދުވަސްތަކެއް ވަންދެން ކުޅުމާ ދުރުގައި ހުރުމަށް ފަހު އަލުން ކުޅުމުގެ ތެރެއަށް އަންނަން ގާތް ވެފައި ވަނިކޮށް އޭނާއަށް އިތުރު އަނިޔާއެއް ކުރިމަތިވެއްޖެ އެވެ.
ޕާމާއަށް އަނިޔާވީ، ގޭތެރޭގައި އުޅެނިކޮށް އޭނާގެ ވާތު ފައިގެ ކުޑަވައި އިނގިލި ތަނެއްގައި ޖެހިގެންނެވެ.
މިދިޔަ އޮގަސްޓް މަހު ގްރޮއިން އިންޖަރީއަކާ ގުޅިގެން އޭނާ އަށް ދެ މެޗު ގެއްލުނު އިރު އެނބުރި އައިސް ވަނީ ލީގުގައި ބްރެންޓްފޯޑާއި ޗެމްޕިއަންސް ލީގުގައި ބެޔާން މިއުނިކާ ދެކޮޅަށް ލަނޑު ޖަހައިފަ އެވެ. ނަމަވެސް ޖެހިގެން އައި މެޗުގައި ލީގުގައި މެންޗެސްޓާ ޔުނައިޓެޑާ ދެކޮޅަށް ކުޅެނިކޮށް އޭނާގެ އަނިޔާ މާ ސީރިއަސް ވެގެން ޖެހުނީ ދަނޑުން ބާލާށެވެ.
މި އަނިޔާއިން ރަނގަޅުވެގެން، އަންނަ އަންގާރަ ދުވަހުގެ ރޭ ބާސެލޯނާއާ ދެކޮޅަށް ކުޅޭ މެޗުގައި އަލުން ކުޅެން ފަށަން ތައްޔާރުވަމުން ދަނިކޮށް އޭނާއަށް އިތުރު އަނިޔާއެއް ވެ، މި މަހު އޭނާއަށް ނުކުޅެވޭނެ ކަމަށް ޗެލްސީގެ ކޯޗު އެންޒޯ މަރެސްކާ ވަނީ ހާމަކޮށްފަ އެވެ.
"އޭނާއަށް ޔަގީނުން ވެސް ބާންލީ މެޗުގައި ނުކުޅެވޭނެ، ބާސެލޯނާ އާއި އާސެނަލާ ދެކޮޅަށް ވެސް ނުކުޅެވޭނެ. ކަން ދިމާކުރި ގޮތުން ގޭތެރޭގައި އުޅެނިކޮށް ދިމާވި ހާދިސާއެއްގައި އޭނާގެ ފައިގެ ކުޑަވައި އިނގިލި ޖެހުނީ. އަހަރެން ވެސް ރޭނަގޑު ހޭލައިގެން ފާހާނާއަށް ދާން އުޅުމުގެތެރޭގައި އަހަރެންގެ ބޮލާއި ފަޔާއި އެތަން މިތަން އެކި ތަންތަނުގައި ޖެހޭ. އެވަރު ކަމެއް ވެދާނެ،" ކޯޗު އެންޒޯ މަރެސްކާ ބުންނެވެ.
"އޭނާއަށް އަލުން އާދެވޭނެ ސީދާ ދުވަހެއް ބުނާކަށް ނޭނގޭ، އެކަމަކު ކުޑަވައި އިގިލި ބިނދިފައި ވަނީ. އެނގޭ ކަމަކީ މި ހަފްތާ އާއި އަންނަ ހަފްތާ އޭނާއަށް ނުކުޅެވޭނެކަން."
ޕާމާ ވަނީ 2023 ވަނަ އަހަރު ޗެލްސީއާ ގުލުމަށް ފަހު މިހާތަނަށް ޕްރިމިއާ ލީގުގައި 38 ގޯލު ޖަހައިފަ އެވެ. މީގެ އިތުރުން އޭނާ ވަނީ މި އަހަރު ޗެލްސީ އަށް ފީފާ ކްލަބް ވޯލްޑް ކަޕް ކާމިޔާބު ކޮށްދިނުމުގައި ވެސް މުހިއްމު ދައުރެއް އަދާ ކޮށްފަ އެވެ.
ލީގުގައި ޗެލްސީ މިވަގުތު އޮތީ ލީގު ތިންވަނައިގައި، އެއްވަނައިގައި އޮތް އާސެނަލާ ހަ ޕޮއިންޓް ފަހަތުގަ އެވެ. މިރޭ ބާންލީއާ ދެކޮޅަށް ނުކުންނައިރު ޗެލްސީގެ ޑިފެންޑަރު ލެވީ ކޮލްވިލް އާއި މިޑްފީލްޑަރު ޑާރިއޯ އެސޫގޯ އަދި ރޯމިއޯ ލަވިއާ އަދިވެސް ތިބީ އަނިޔާގަ އެވެ. ނަމަވެސް އެންޒޯ ފެނާންޑޭޒް އާއި ޕެޑްރޯ ނެޓޯ އަނިޔާއިން ރަނގަޅުވެ، މިރޭގެ މެޗުގެ ސްކޮޑުގައި ވަނީ ހިމަނައިފަ އެވެ.
ޗެލްސީ މި ސީޒަންގައި އެންމެ ފަހުން ކުޅުނު ނުވަ މެޗުގެ ތެރެއިން ހަތް މެޗު ކާމިޔާބު ކޮށްފައި ވީނަމަވެސް، ކޯޗާއި ކުޅުންތެރިން ވެސް އެންމެ ހިތްހަމަޖެހެނީ ޕާމާ ދަނޑުމަތީގައި ހުރުން ކަމަށް މަރެސްކާ ހާމަކުރެ އެވެ.