22 ނޮވެމްބަރ 2025 - 11:59
ބޮޑީބޯޑިން ލީގުގެ ފަހު މުބާރާތް ކަމަށްވާ ގައުމީ ބަނޑުފިލާ ޗެލެންޖްގެ މެންސް ޖޫނިއާ ޗެމްޕިއަންކަން ހޯދައި އިޔަން އަހުމަދު، ލީގު ޗެމްޕިއަންކަން ހޯދައިފި އެވެ.
އިޔަން ވަނީ ބުރާސްފަތި ދުވަހު ކުރިއަށް ދިޔަ ފައިނަލް ހީޓުގައި ށ. ކަނޑިތީމުގެ އަބްދުލް އަހަދާ ވާދަކޮށް 12.10 ޕޮއިންޓް ހޯދައިފަ އެވެ. އަހަދަށް ލިބުނީ 8.93 ޕޮއިންޓެވެ.
އަހަދު ފައިނަލަށް ދަތުރުކުރީ ސެމީ ފައިނަލް ހީޓުގައި، މިދިޔަ އަހަރުގެ ހުރިހާ މުބާރާތެއް ކާމިޔާބު ކޮށްގެން ލީގު ޗެމްޕިއަންކަން ހޯދި މުހައްމަދު އަޒާން އަހުމަދުގެ މައްޗަށް ކުރި ހޯދައިގެންނެވެ. އަދި އިޔަން ވަނީ ސެމީގައި ނޫހް މުހައްމަދު ދުނެއިމް އިރުޝާދާ ވާދަކޮށް މޮޅުވެފަ އެވެ.
މިއީ އިޔަން، ޖޫނިއާ ލީގު ޗެމްޕިއަންކަން ހޯދި ފުރަތަމަ ފަހަރެވެ. އޭނާ ވަނީ މި އަހަރުގެ ލީގުގައި ފުރަތަމަ ބޭއްވި ބުރުނު ޝިކާރުގެ ޗެމްޕިއަންކަން ހޯދައި، އެއަށް ފަހު ބޭއްވި ލަބެރަ ޗެލެންޖްގެ ފައިނަލްގައި ވާދަ ކޮށްފަ އެވެ.
ބަނޑުފިލާ ޗެލެންޖް ފެށި އިރު، ޖޫނިއާ ލީގު ރޭންކިންގެ އެންމެ ކުރީގައި އޮތީ އިޔަން އާއި އަޒާން އެވެ. ބުރުނު ޝިކާރު ގެ ޗެމްޕިއަންކަން އިޔަން ހޯދީ ފައިނަލްގައި އަޒާން ބަލިކޮށްގެންނެވެ. އަދި އަޒާން ވަނީ ލަބެރަ ޗެލެންޖްގެ ފައިނަލްގައި އިޔަން ބަލިކޮށްފަ އެވެ.
ގައުމީ ބަނޑުފިލާ ޗެލެންޖަކީ ބޮޑީބޯޑިން ލީގުގެ އެންމެ ޝަރަފްވެރި މުބާރާތެވެ. މި މުބާރާތުގެ ޗެމްޕިއަންކަން ހޯދާ އެތުލީޓަށް 2000 ޕޮއިންޓް ލިބޭ އިރު، ދެން ކޮންމެ މުބާރާތަކުން ވެސް ޗެމްޕިއަނަށް ކަނޑައެޅިފައި ވަނީ 1000 ޕޮއިންޓެވެ. އިޔަން ލީގުގެ ޗެމްޕިއަންކަން ހޯދީ ޖުމްލަ 3860 ޕޮއިންޓާ އެކު އެވެ. އަޒާން އަށް ލިބުނީ 3320 ޕޮއިންޓެވެ.
އިޔަން ވަނީ ލީގު ޗެމްޕިއަންކަން ހޯދުމުގެ ކުރިން މިދިޔަ އަހަރު، ބަނޑުފިލާ ޗެލެންޖްގެ މެންސް އޯޕަން ބައިގެ ޗެމްޕިއަންކަން ހޯދައިފަ އެވެ. މިއަހަރުގެ މެންސް އޯޕަން ބައިގައި ވާދަކޮށް އިޔަން ކެޓީ ކުއާޓާ ފައިނަލްގައި އާމިން އުމަރު މޫސާއާ ވާދަކޮށެވެ.