21 ނޮވެމްބަރ 2025 - 18:31

ދުބާއީގައި މިހާރު ކުރިއަށްދާ އެއާޝޯގައި އިންޑިއާގެ ފައިޓަ ޖެޓެއްގެ ގާބިލްކަން ދައްކާލުމުގެ ތެރޭގައި ޖެޓް ވެއްޓި އޭގެ ޕައިލެޓް މަރުވެއްޖެ އެވެ.
ހިންދުސްތާން އެއަރޮނޯޓިކްސް ލިމިޓެޑް (އެޗްއޭއެލް) އިން އުފައްދާފައިވާ ޖެޓް ވެއްޓުނީ ވަރަށް ތިރިން ދުއްވަމުން ޖެޓް ރޯލްކޮށްލުމާ އެކުގައި ކަމަށް މަންޒަރު ދުށް މީހަކު އޭއެޕްޕީ އަށް ބުނެފައިވެ އެވެ. ޖެޓް ވެއްޓުނީ ޝޯ ކުރިއަށްދިޔަ ހިސާބާ މޭލެއް (1.6 ކިލޯމީޓަރު) ގެ ދުރުމިނަށް ކަމަށާއި ޖެޓް ވެއްޓުމާ އެކު ހުޅުގަނޑު ފަޅައިގެން ދިޔަ ކަމަށް އޭނާ ބުންޏެވެ.
"އިންޑިއާއިން ދުބާއީ އެއާޝޯގައި ބައިވެރިކުރި ތޭޖާސް ފައިޓާ އެއާކްރާފްޓެއް މިއަދު ވެއްޓި އެ ހާދިސާގައި ޕައިލެޓް ވަނީ މަރުވެފައި،" ދުބާއީ ސަރުކާރުގެ މީޑިއާ އޮފީހުން އެކްސްގައި ކުރި ޕޯސްޓެއްގައި ބުންޏެވެ.
މިއީ 1986 އިން ފެށިގެން ބާއްވަމުން އަންނަ މި ޝޯގައި ހިނގި މިފަދަ ފުރަތަމަ ހާދިސާ ކަމަށް ބެލެވެ އެވެ.
ދައުރުވަމުންދާ ވީޑިއޯތަކުން ފެންނަ ގޮތުގައި ޖެޓް ވަރަށް ބާރަށް ތިރިއަށް ގޮސް ބިމުގައި ޖެހި ވަގުތުން ބޮޑު އަލިފާންގަނޑެއް އުފެދެ އެވެ.
މެދުއިރުމަތީގެ އެންމެ ބޮޑު އެއާޝޯ ކަމަށްވާ ދުބާއީ އެއާޝޯގައި މި ހާދިސާ ހިނގާފައި މި ވަނީ ޝޯގެ ފަހު ދުވަހު އެވެ. މި ޝޯގައި ކޮންމެ ދުވަހަކު މެންދުރު ފަހު އޮންނަނީ އެއާކްރާފްޓްތައް ދުއްވުމުގެ ގާބިލްކަން ދައްކާލުމެވެ.
ހާދިސާ ހިނގި އިރު އެތައް ސަތޭކަ ބަޔަކު ޝޯ ބަލަން ގޮސް ތިއްބެވެ. އަދި ދައްކާލަން ވެސް ގިނަ އަދަދެއްގެ އެއާކްރާފްޓުތައް ބަހައްޓާފައި ހުއްޓެވެ.
އިންޑިއަން އެއާފޯސް އިން ވަނީ ހާދިސާގެ ތަހުގީގެއް ކުރާނެ ކަމަށް ބުނެފަ އެވެ.