21 ނޮވެމްބަރ 2025 - 16:23
ފައިނަލްގައި އަލީ ޚުޝްރުވާން އަހުމަދު (ކުޑަަ އަައްޔަ) ބަލިކޮށް ގައުމީ ބަނޑުފިލާ ޗެލެންޖްގެ މެންސް އޯޕަން ޗެމްޕއިަންކަން ޏ. ފުވައްމުލަކުގެ އަޝްރަފް ހަސަން ހޯދައިފި އެވެ.
މި އަހަރުގެ ގައުމީ ބޮޑީބޯޑިން ލީގުގެ ފަހު މުބާރާތް ކަމަށްވާ ބަނޑުފިލާ ޗެލެންޖްގެ ފައިނަލްގައި އިއްޔެ އަޝްރަފް ވަނީ ކުޑަ އައްޔައާ ވާދަކޮށް ޖުމްލަ 13 ޕޮއިންޓް ހޯދައި، 2.23 ޕޮއިންޓުގެ ތަފާތަކުން މޮޅުވެފަ އެވެ.
ގައުމީ ބަޑުފިލާ ޗެލެންޖްގެ ސެމީ ފައިނަލްގައި އަޝްރަފް ވަނީ ލީގުގެ ފުރަތަމަ ދެ މުބާރާތް ވެސް ކާމިޔާބުކުރި އާމިން އުމަރު މޫސާއާ ވާދަކޮށް މޮޅުވެފަ އެވެ. އަދި ކުޑަ އައްޔަ ފައިނަލަށް ދިޔައީ ސެމީ ފައިނަލްގައި މުހައްމަދު ކައިފް ބަލިކޮށްފަ އެވެ.
މިދިޔަ އަހަރުގެ ބަނޑުފިލާ ޗެލެންޖްގެ ޗެމްޕިއަންކަން ހޯދި ޒުވާން ބޮޑީބޯޑަރު އިޔަން އަހުމަދު ކެޓީ ކުއާޓާ ފައިނަލްގައި އާމިން އަތުން ބަލިވެގެންނެވެ.
މި އަހަރުގެ ފުރަތަމަ ބޭއްވި ބުރުނު ޝިކާރުގައި އަޝްރަފް ބަލިވީ ކުއާޓާ ފައިނަލްގައި އާމިން އަތުންނެވެ. ނަމަވެސް ލަބެރަ ޗެލެންޖްގައި އޭނާ ވާދަކޮށްފައެއް ނުވެ އެވެ. މިއާ އެކު ވެސް ލީގުގެ ހަތަރު ވަނައިގައި ނިންމައި، އޭނާ ވަނީ އަންނަ އަހަރުގެ ގައުމީ ބޮޑީބޯޑިން ޓީމުން ޖާގައެއް ހޯދައިފަ އެވެ.
މިއީ އަޝްރަފް، ބޮޑީބޯޑިން ލީގުގެ މުބާރާތެއްގެ ފައިނަލްގައި ކުޑަ އައްޔަ ބަލިކުރި ދެވަނަ ފަހަރެވެ. މީގެ ކުރިން އޭނާ ވަނީ 2023 ވަނަ އަހަރުގެ ބުރުނު ޝިކާރުގެ ފައިނަލުން މޮޅުވެ، 10 އަހަރު ތެރޭ ފައިނަލެއްގައި ކުޑަ އައްޔަ ބަލިކުރި ފުރަތަމަ އެތުލީޓްގެ ޝަރަފް ހޯދައިފަ އެވެ.
މި އަހަރުގެ ބަނޑުފިލާ ޗެލެންޖްގެ ފައިނަލަކީ 2023 އަށް ފަހު އަޝްރަފް ވާދަކުރި ފުރަތަމަ ފައިނަލެވެ. އެ އަހަރު އޭނާ ނިންމާލީ ގައުމީ ލީގުގެ ދެވަނައިގަ އެވެ. އަދި މިދިޔަ އަހަރުގެ ލީގު ނިންމާލީ ހަތަރު ވަނައިގަ އެވެ.