21 ނޮވެމްބަރ 2025 - 16:03

ފަލަސްތީނުގެ ޣައްޒާގައި ހަމަލާތައް ހުއްޓާލުމުގެ އެއްބަސްވުމާ ތަކުރާރުކޮށް ހިލާފުވެ، އިޒްރޭލުން އަދިވެސް ހުއްޓުމެއް ނެތި ހަމަލާދީ، ފަލަސްތީނުގެ މައުސޫމް އެތައް ބަޔަކު ޝަހީދު ކުރަމުންދާ ދިޔުން ރާއްޖޭން މިއަދު ކުށްވެރިކޮށްފި އެވެ.
ޣައްޒާ ކޮންޓްރޯލް ކުރާ ހަމާސް ޖަމާއާތާ ދެމެދު ހަމަލާ ބަދަލުކުރުން ހުއްޓާލަން މިދިޔަ މަހުގެ 10 ވަނަ ދުވަހު ވީ އެއްބަސްވުމާ ހިލާފަށް އިޒްރޭލުން ދަނީ ކޮންމެ ދުވަހަކު ވެސް ޣައްޒާއަށް ހަމަލާދީ އެތައް ބަޔަކު ޝަހީދުކުރަމުންނެވެ.
ރާއްޖޭގެ ފޮރިން މިނިސްޓްރީން ނެރުނު ބަޔާނެއްގައި ބުނީ، ހަމަލާތައް ހުއްޓާލުމުގެ އެއްބަސްވުމާ ކަނޑައެޅިގެން ހިލާފުވެ، އިޒްރޭލުން ޣައްޒާއަށް ދެމުންދާ ހަމަލާތައް ހަރުކަށި އިބާރާތުން ކުށްވެރިކުރާ ކަމަށެވެ.
އެއާ އެކު، ރާއްޖޭން ވަނީ ޣައްޒާއަށް ދެމުންދާ ހަމަލާތައް ހުއްޓުވައި، އެ އެއްބަސްވުމަށް ފުރިހަމައަށް އިހްތިރާމް ކުރަން އިޒްރޭލަށް މަޖުބޫރުކުރުވުމަށް ބައިނަލްއަގުވާމީ މުޖުތަމައުއަށް ގޮވާލައިފަ އެވެ.
އެ އެއްބަސްވުމާ ހިލާފުވާން އިޒްރޭލަށް ފުރުސަތު ދޭ ނަމަ، ފަލަސްތީނުގެ ރައްޔިތުން އިތުރަށް ނިކަމެތިވެ، ހާލުގައި ޖެހުމުގެ ފުރުސަތު އިތުރުވެގެންދާނެކަމަށް ވެސް އެ ބަޔާނުގައި ބުނެފައި ވެ އެވެ.
އިޒްރޭލުން އޮކްޓޫބަރު 7، 2023 ގައި ޣައްޒާއަށް ދޭން ފެށި ހަމަލާތައް މިދިޔަ މަހު ހުއްޓާލިކަން އިއުލާނުކުރި އިރު 67،000 އަށް ވުރެ ގިނަ މީހުން ވަނީ ޝަހީދުވެފަ އެވެ. ހަމަލާ ދިނުން ހުއްޓާލަން އެއްބަސްވި ނަމަވެސް އެކި އުޒުރު ދައްކައި އިޒްރޭލުން ދޭތެރެ ދޭތެރެއިން ހަމަލާދެ އެވެ. މިގޮތުން، އިއްޔެ އިޒްރޭލުން ޣައްޒާއަށް ދިން ހަމަލާއެއްގައި ވެސް ވަނީ 27 މީހަކު ޝަހީދުކޮށްލައިފަ އެވެ.