21 ނޮވެމްބަރ 2025 - 14:27
ޓޫރިޒަމް ތަރައްގީކުރުމަށް ބީލަމުގެ އުސޫލުން ކުއްޔަށް ދޫކުރުމަށް ކަނޑައަޅާފައިވާ ރަށްރަށާއި ފަޅުތަކުގެ ތެރެއިން ހަލާލު ޓޫރިޒަމް މޮޑެލްއަށް ޓޫރިސްޓު ރިސޯޓު ތަރައްގީކޮށް ހިންގާނެ ބަޔަކު ހޯދަން އަލުން ޓޫރިޒަމް މިނިސްޓްރީން އިއުލާނުކޮށްފި އެވެ.
އެކަމަަށް ޝައުގުވެރިކަން ހުރި ފަރާތްތަކަށް ބީލަން ހުށަހެޅުމުގެ ފުރުސަތު ހުޅުވާލައި އާންމުކޮށްފައިވާ އިއުލާނުގައިވާ ގޮތުން ހަލާލު ޓޫރިޒަމް މޮޑެލްއަށް ޓޫރިސްޓު ރިސޯޓު ތަރައްގީކުރަން ހުޅުވާލީ ހއ. ގެ ދެ ރަށެއް ކަމަށްވާ ބީނާފުއްޓާއި ކަނޑާލިފިނޮޅާއި ހދ. މަކުނުދޫ ފަރު 1 އަދި ށ. ފުށިފަރާއި ލ. ފޮނަގާދޫގަ އެވެ.
މިނިސްޓްރީން ބުނީ އެކަމަށް ޝައުގުވެރިވާ ފަރާތުން އަންނަ ޑިސެމްބަރު 9 އަކާއި ޖެނުއަރީ 6 ގައި އޮންލައިންކޮށް ބާއްވާ މައުލޫމާތު ސާފުކުރުމުގެ ސެޝަންގައި ބައިވެރިވާން ޖެހޭ ކަމަށެވެ. އެ މައުލޫމާތު ސެޝަނުގައި ބައިވެރިވުމަށް އެދޭ ފަރާތުގެ މައުލޫމާތުތައް، އެ ސެޝަން ބޭއްވުމުގެ އެއް ދުވަސް ކުރިން މިނިސްޓްރީގެ އީމެއިލް މެދުވެރިކޮށް އަންގަން ޖެހެ އެވެ.
ބީލަން ހުށަހެޅުމުގެ ސުންގަޑިއަކީ އަންނަ ފެބްރުއަރީ މަހުގެ 3 ވަނަ ދުވަހުގެ ހެނދުނު 9:00 ގެ ކުރިންނެވެ.
- ހއ. ބީނާފުށި - 2.21 ހެކްޓަރުގެ އެ ރަށުގައި މަދުވެގެން 100 އެނދު (392،040 ޑޮލަރު)
- ހއ. ކަނޑާލިފިނޮޅު - 5 ހެކްޓަރުގެ އެ ރަށުގައި މަދުވެގެން 100 އެނދު (392،040 ޑޮލަރު)
- ހދ. މަކުނުދޫ ފަރު 1 - 200 ހެކްޓަރުގެ އެ ރަށުގައި މަދުވެގެން 150 އެނދު (1.26 މިލިއަން ޑޮލަރު)
- ށ. ފުށިފަރު - 4.34 ހެކްޓަރުގެ އެ ރަށުގައި މަދުވެގެން 100 އެނދު (234،360 ޑޮލަރު)
- ލ. ފޮނަގާދޫ - 8.18 ހެކްޓަރު އެ ރަށުގައި މަދުވެގެން 100 އެނދު (588،960 ޑޮލަރު)
ހަލާލު ޓޫރިޒަމަށް ހާއްސަކޮށް ފަސް ރަށެއްގައި ރިސޯޓު ތަރައްގީކުރާނެ ބަޔަކު ހޯދަން އިއުލާނުކުރިއިރު މިދިޔަ ޖޫން މަހުގެ ތެރޭގައި ވެސް ވަނީ މީގެ ތެރެއިން ހަތަރު ރަށެއްގައި ހަލާލު ޓޫރިޒަމް ހިންގާނެ ބަޔަކު ހޯދަން އިއުލާނުކޮށްފަ އެވެ. ބެލެވޭ ގޮތުގައި އެކަމަށް އަނެއްކާވެސް އިއުލާނުކޮށްފައި މި ވަނީ އެކަމަށް ތަރުހީބު ނުލިބިގެންނެވެ.
ކުރިން ވަނީ ތ. މާގުޅިގައި ވެސް ހަލާލު ޓޫރިޒަމް ތަރައްގީކުރަން ހުޅުވާލައިފަ އެވެ.
އިއުލާނުގައި ބުނީ ހަލާލު ޓޫރިޒަމްގެ ރަށްތަކުގައި ރަލާއި އޫރު މަހުގެ މުއާމަލާތްތައް ނުހިންގޭނެ ކަމަށާއި އެ ފަދަ ރަށްރަށުގައި ކެއުން ބުއިމުގައި ބޭނުން ކުރަން ޖެހޭނީ ވެސް ހަލާލު ކާބޯތަކެތި ކަމަށެވެ.
އިސްލާމް ދީނާ ގުޅޭ ފަދަ ތަންތަން ރަށު ތެރޭގައި ހުންނަން ޖެހޭ ކަމަށާއި އެގޮތުން މިސްކިތް ފަދަ ތަންތަން ވެސް ހަދަންވާނީ، އެ ރަށުގެ އެންމެ އައިކޮނިކް ބިލްޑިންތަކުގެ ގޮތުގަ އެވެ. އަންހެނުންނާއި ފިރިހެނުންނަށް ވަކިން ނަމާދުކުރެވޭ ގޮތަށް ހުންނަން ޖެހޭއިރު ބައެއް ހިދުމަތްތަކަށް ބޭނުންވާ ހަލާލް ސެޓިފިކޭޝަން ވެސް ހޯދަން ޖެހޭނެ އެވެ.