18 ނޮވެމްބަރ 2025 - 18:06
ވެބްސައިޓްތަކާއި އެޕްލިކޭޝަންތަކުގެ ސެކިއުރިޓީ އާއި ޕާފޯމަންސް ހިފެހެއްޓުމަށް ބޭނުންކުރާ ކްލައުޑްފްލެއާގެ ހިދުމަތަށް ދިމާވި މައްސަލައަކާ ހެދި މުޅި ދުނިޔޭގައި އެތައް ވެބްސައިޓެއް ޑައުންވެއްޖެ އެވެ.
ޑީޑޮސް ފަދަ ހަމަލާތަކުން ސަލާމަތްކުރުމަށް ބޭނުންކުރާ ކްލައުޑްފްލެއާގެ ހިދުމަތް ބޭނުންކުރާ މަޝްހޫރު އެތައް ވެބްސައިޓަކާއި އެޕްތަކެއް ވެސް ވަނީ މި މައްސަލައާ ހެދި ނުވަދެވޭ ގޮތް ވެފަ އެވެ. އޭގެ ތެރޭގައި ސޯޝަލް މީޑިއާ ޕްލެޓްފޯމް އެކްސް ވެސް ހިމެނެ އެވެ.
ރާއްޖޭގެ ވެސް އެތައް ވެބްސައިޓަކަށް ވަނީ މައްސަލަ ދިމާވެފަ އެވެ.
ކްލައުޑްފްލެއާ އަކީ އިންޓަނެޓް އިންފްރާސްޓްރަކްޗާ ކުންފުންޏެކެވެ. ސައިބަ އެޓޭކްތަކުން ވެބްސައިޓްތައް ރައްކާތެރިކޮށް، ޓްރެފިކަށް ބާރު ބޮޑުވާ ވަގުތުތަކުގައި ވެސް ހިދުމަތަށް ހުއްޓުމެއް ނައިސް ވެބްސައިޓްތައް އޮންލައިންކޮށް ހިފެހެއްޓުމުގައި ކްލައުޑްފްލެއާ އެހީތެރިވެ އެވެ.
އެ ކުންފުނިން ބުނީ ކްލައުޑްފްލެއާ ޑޭޝްބޯޑާއި އޭޕީއައި ވެސް ފެއިލްވެ "އެރާ 500" ގެ މެސެޖު އެތައް ކަސްޓަމަރުންނަކަށް ލިބެމުންދާކަން އެނގިފައިވާ ކަމަށެވެ. މި މައްސަލަ ވަރަށް ގިނަ ބަޔަކަށް ދިމާވެފައިވުން އެކަށީގެންވާ ކަމަށާއި މައްސަލަ ދިމާވެގެން އުޅޭ ސަބަބު ދެނެގަތުމުގެ މަސައްކަތް ކުރަމުން އަންނަ ކަމަށް އެ ކުންފުނިން ނެރުނު އަޕްޑޭޓެއްގައި ބުންޏެވެ.
މައްސަލަ ދިމާވެގެން އުޅޭ ސަބަބެއް ވެސް އަދި ނޭނގޭ ކަމަށް ބުންޏެވެ.
މި މައްސަލަ ދިމާވެފައިވާ ވެބްސައިޓްތަކުން "އިންޓާނަލް ސާވާ އެރާ އޮން ކްލައުޑްފްލެއާސް ނެޓްވޯކް" މެސެޖެއް ލިބެ އެވެ. އަދި ކުޑަ އިރުކޮޅަކުން އަލުން ހިދުމަތް ލިބޭތޯ ބެލުމަށް ބުނާ މެސެޖެއް ވެސް ފެނެ އެވެ.