14 ނޮވެމްބަރ 2025 - 23:53
މާލެ އާއި ރާއްޖޭގެ އެހެން ރަށްތަކަކީ އެ މަނިކުފާނުގެ ކުރިފުޅުމަތީގައި ހަމަހަމަ ރަށްތަކެއް ކަމަށާއި ތަަރައްގީ ގެނައުމަށް އަމަލު ކުރަމުން ގެންދަވަނީ އެ އުސޫލުގެ ދަށުން ކަމަށް ރައީސް ޑރ. މުހައްމަދު މިރޭ މުއިއްޒު ވިދާޅުވެއްޖެ އެވެ.
ކަންކަން ކުރަން ޖެހެނީ ހަމައެކަނި މާލެ އާއި އަތޮޅުވެރިކަން ކުރާ ރަށްތަކާއި ސިޓީތަކުގައިތޯ ޕީއެންސީން މާލޭގައި ބޭއްވި ބޮޑު ޖަލްސާގައި ސުވާލު އުފައްދަވައި ރައީސް ވިދާޅުވީ ތަރައްގީ ހާސިލު ކުރުމުގައި މާލެއެކޭ އެއްފަދައިން އެހެން ރަށްތަކަށް ވެސް ހަމަހަމަކަން ގެންނަވާނެ ކަމަށެވެ.
"ހަމައެކަނި މާލޭގައިތޯ ކަންކަން ކުރަން ޖެހެނީ؟ ހަމައެކަނި ސިޓީތަކުގައި އެކަނިތޯ ކަންކަން ކުރަން ޖެހެނީ؟ ހަމައެކަނި އަތޮޅުގެ ވެރިކަން ކުރާ ރަށްރަށުގައި އެކަނިތޯ ތަރައްގީ ގެންނަން ޖެހެނީ،" ނޫން.." މާލެ އާއި އެހެން ރަށްރަށްރަށް ތަފާތު ކުރުމާ ދެކޮޅަށް ވާހަކަފުޅު ދައްކަވަމުން ރައީސް މުއިއްޒު ވިދާޅުވި އެވެ.
ރައީސް ވިދާޅުވީ އެ މަނިކުފާނު ވެރިކަމަށް ވަޑައިގެން ރަށްރަށަށް ކުރެއްވި ދަތުރުފުޅުތަކުގައި މިދިޔަ 45 ވަރަކަށް އަހަރުގެ ތެރޭގައި އެެއްވެސް ރައީސަކު ވަޑައިނުގަންނަވާ ރަށްތަކަށް ޒިޔާރާތް ކުރެއްވުނު ކަމަށެވެ. އެކަމާ މެދު ހައިރާންވެވެޑައިގަންނަވާ ކަމަށާއި އެއީ ސީދާ އިހުމާލު ކަމަށް ރައީސް މުއިއްޒު ވިދާޅުވި އެވެ.
ރައީސް ވިދާޅުވީ އެ ރަށްތަކާއި މާލެއަކީ ވެސް އެ މަނިކުފާނަށް ހަމަހަމަ ތަންތަން ކަމަށާއި އެ ތަނުގައި ވެސް އުޅެމުން އަންނަނީ ދިވެހި ރައްޔިތުން ކަމަށެވެ.
"ރައީސް މައުމޫނަށް ފަހު އެއްވެސް ރައީސަކު ވަޑައިނުގަންނަވާ ރަށްތައް. އަޅުގަނޑު ހައިރާންވި އެކަމާ. އިހުމާލު، ހުރިހާ މާނައެއްގައި އިހުމާލުވެފައިވާ ރަށްރަށަށް. އެ ރަށްރަށާއި މާލެއާ އަޅުގަނޑަށް ހަމަ އެއްހަމަ،" ރައީސް ވިދާޅުވި އެވެ.
އެ މަނިކުފާނު ވިދާޅުވި ގޮތުގައި އެ ރަށްތަކުގައި އޭޓީއެމް ހުޅުވައި ދެން ހުރި ކަންކަން ވެސް މި ސަރުކާރުން މިހާރު އަންނަނީ ކުރަމުންނެވެ. އަދި ފުލުހުންގެ ހިދުމަތް ފުޅާކުރަން ކުރި މަސައްކަތުގެ ތެރެއިން މިވަގުތު އެ ހިދުމަތް ނެތް އެންމެ ރަށެއް ވެސް ރާއްޖޭގައި ނެތް ކަމަށް ރައީސް މުއިއްޒު ވިދާޅުވި އެވެ.
ރައީސް ވިދާޅުވީ ގައުމަށް ބޭނުންވަނީ ހަމަހަމަކަމާއި އިންސާވެރިކަމާއި އަދުލުވެރިކަން ކަމަށެވެ.
މާލެއާ އެއް ފެންވަރަށް ހިދުމަތް ދިނުމަށް ސަރުކާރުން ކުރަމުން ގެންދާ މަސައްކަތަށް އަލިއަޅުއްވާލައްވަމުން ރައީސް ވިދާޅުވީ، ކޮންމެ އަތޮޅެއްގައި އައިޑީކާޑާއި ޕާސްޕޯޓުގެ ހިދުމަތް މިހާރު ލިބޭނެ ކަމަށެވެ. އަދި ވިޔަފާރިތައް ކުރިއެރުވުމަށް އޭޓީއެމްތަކާއި ޑޮލަރު އޭޓީއެމްތައް ވެސް ބަހައްޓަމުން އަންނަ ކަމަށް އެމަނިކުފާނު ވިދާޅުވި އެވެ.
ރައީސް ވިދާޅުވި ގޮތުގައި އަންނަ މާޗު މަހުގެ ނިޔަލަށް އިތުރު 70 ޑޮލަރު އޭޓީއެމް ބަހައްޓާނެ އެވެ. އަދި ރާއްޖޭގެ އެކި ހިސާބުތަކުގައި މިވަގުތު ވެސް 1،875 މަޝްރޫއު ކުރިއަށް އެބަދާ ކަމަށާއި އޭގެ ތެރެއިން 1،356 މަޝްރޫއުއަކީ މި ސަރުކާރުން ސޮއިކޮށް ހަވާލުކޮށްފައިވާ މަޝްރޫއުތައް ކަމަށް ވެސް ރައީސް މުއިއްޒު ވިދާޅުވި އެވެ.
ތަރައްގީގެ ދާއިރާގައި އެންމެ މުހިއްމީ ބޯހިޔާވަހިކަމުގެ މަޝްރޫއުތައްކަން ފާހަގަކުރައްވާ ރައީސް ވިދާޅުވީ އެކި ކުންފުނިތަކާ ހަވާލުކޮށްގެން 13 ރަށެއްގައި 825 ޔުނިޓް އަޅަމުން އަންނަ ކަމަށެވެ. އަދި އިތުރަށް 16 ރަށެއްގައި 1،100 އެއްހާ ޔުނިޓް އެޅުމަށް އަންނަ އަހަރުގެ ބަޖެޓުގައި ހިމަނާފައިވާ ކަމަށާއި 3،000 ހައުސިން ޔުނިޓް އެޅުމަށް ބޭންކް އޮފް މޯލްޑިވްސްއާ ވެސް ހަވާލުކޮށްފައިވާ ކަމަށެވެެ.
ހުޅުމާލެ އާއި ގުޅިފަޅުން ގޯތި ލިބުނު މީހުންނަށް އެ ތަންތަން ހަވާލުކުރުމުގެ މަސައްކަތް ވެސް ކުރަމުން އަންނައިރު ރައީސް ވަނީ ގިރާވަރު ފަޅު ހިއްކުމުގެ މަސައްކަތަށް މި މަހުގެ 23 ގައި ޑްރެޖަރު އަންނާނެ ކަމަށާއި އެއާ އެކު އެ މަޝްރޫއު ވެސް ފަށާނެ ކަމަށް ވިދާޅުވެފަ އެވެ.
އަދި ރަސްމާލެ އާއި އުތުރުތިލަފަޅުން ގޯތި ދިނުމަށް އެ ތަން ހިއްކުމުގެ ސްޕީޑު އަވަސް ކުރުމަށް އިތުރު ޑްރެޖަރުތައް ގެނެސް ކުރިއަށް އޮތް ފަސް މަސް ދުވަހުގެ ތެރޭގައި ރަސްމާލެ އެއްކޮށް ހިއްކާ ނިމެނޭ ކަމަށް އެ މަނިކުފާނު ވިދާޅުވި އެވެ. އެއީ ހުޅުމާލޭގެ ދެ ފިޔަވަހި އެއްކޮށްލުމުން، އޭގެ ދެ ގުނަ ބޮޑު ސަރަހައްދެއް ކަމަށް ރައީސް ވިދާޅުވެ އެވެ.
އެތަނުން ގޯތި ދިނުމުގެ އުސޫލު ކުރިއަށް އޮތް ހަފްތާގެ ތެރޭގައި އާންމުކޮށް، މަސް ދުވަހުގެ ތެރޭގައި އެތަނުން ދޫކުރާ 15،000 ގޯއްޗަށް ކުރިމަތިލުމަށް ހުޅުވާލާނެ ކަމަށް ރައީސް މުއިއްޒު ވިދާޅުވި އެވެ.