12 ނޮވެމްބަރ 2025 - 15:15
ދައުލަތުގެ އަންނަ އަހަރުގެ ބަޖެޓުން އެންޓި ކޮރަޕްޝަން ކޮމިޝަން (އޭސީސީ) އަށް ކަނޑައަޅާފައި ވަނީ ގާނޫނީ ޒިންމާ އެންމެ ފުރިހަމަ އަށް އަދާކުރެވޭ ވަރުގެ ބަޖެޓެއް ނޫން ކަމަށް އެ އިދާރާގެ ރައީސް އާދަމް ޝާމިލް މިއަދު ވިދާޅުވެއްޖެ އެވެ.
ރައްޔިތުންގެ މަޖިލިހުގައި ބަޖެޓް ދިރާސާ ކޮމިޓީީގެ ބައްދަލުވުމުގައި ޝާމިލް ވިދާޅުވީ، އަންނަ އަހަރަށް ކަނޑައަޅާފައިވަނީ އެ އިދާރާގެ ބަޖެޓް ސީލިންގަށް ވުރެ ވެސް ދަށް ބަޖެޓެއް ކަމަށެވެ.
އެ އިދާރާގެ ބަޖެޓް ސީލިންގަކީ 49.8 މިލިއަން ރުފިޔާ އެވެ. އެކަމަކު ބަޖެޓު ފޮތުގައިވާ ގޮތުން އޭސީސީ އަށް އަންނަ އަހަރަށް ކަނޑައެޅީ 47.4 މިލިއަން ރުފިޔާ އެވެ.
ޝާމިލް ވިދާޅުވީ "ނިއު ޕޮލިސީ އިނީޝިއޭޓިވް" ގެ ގޮތުގައި ބަޖެޓުގައި ހިމަނާފައި ވަނީ އެ އިދާރާ އިން ހުށަހެޅި ޕްރޮޖެކްޓްތަކުގެ ތެރެއިން އިސްކަންދޭ ތަރުތީބުން ތިންވަނަ އަށް އިސްކަން ދީފައިވާ ކަމެއް ކަމަށާއި އެކަމަށް ހޭދަވަނީ ދެ ލައްކަ ރުފިޔާ ކަމަށެވެ.
އޭނާ ވިދާޅުވި ގޮތުގައި، އަންނަ އަހަރަށް ކަނޑައަޅާފައިވަނީ އޭސީސީގެ ގާނޫނުގެ 21 ވަނަ މާއްދާ އިން މަތިކޮށްފައިވާ ޒިންމާތައް އަދާކުރުމަށް ފުދޭވަރުގެ ބަޖެޓެއް ނޫން ކަމަށެވެ.
އޭސީސީގެ އަންނަ އަހަރުގެ ބަޖެޓުގެ ތެރެއިން 97 ޕަސެންޓް ހޭދަކުރަނީ މުވައްޒަފުންގެ މުސާރަ އާއި އޮފީސް ހިންގުމަށެވެ. އެހެންވެ، މަސްއޫލިއްޔަތު އަދާކުރުމަށް ސީދާ ހިންގާ ޕްރޮގްރާމުތަކަށް އޮތީ 3.4 ޕަސެންޓް ކަމަށް ޝާމިލް ވިދާޅުވި އެވެ. އެއީ 1.6 މިލިއަން ރުފިޔާ އެވެ.
"މުޅި ކޮމިޝަންގެ ބޭސްލައިން ބަޖެޓަށް ބަލާއިރު، އަޅުގަނޑުމެންނަށް 78.3 ޕަސެންޓް، އެއީ 37 މިލިއަން ރުފިޔާ މުވައްޒަފުންގެ މުސާރަ އާއި އިނާއަތްތަކަށް. ދެން އެ އަށް ފަހު ގާނޫނުން މަތިކޮށްފައިވާ މަސްއޫލިއްޔަތުތައް އަދާކުރުމަށް ތަހުގީގުތައް ހިންގުމަށް ރާއްޖެ މި އޮތް ގޮތުން މީގައި ވަރަށް ބޮޑަށް ދަތިތަކެއް ކުރިމަތިވާނެ. ބަޖެޓުގައި މި އޮތް ގޮތުން 0.3 އިންސައްތަ (130،000ރ.) ތަހުގީގުގެ ދަތުރުތަކަށް ލިބިފައި ވަނީ،" އޭނާ ވިދާޅުވި އެވެ.
ޝާމިލް ވިދާޅުވި ގޮތުގައި، ބަޖެޓުގެ 10 ޕަސެންޓް ހޭދަކުރަން ޖެހެނީ ކުއްޔަށެވެ. އެކަމަކު، ކުލި ކުޑަކުރުމަށް ވަރަށް ބޮޑު މަސައްކަތްތަކެއް ކުރެއްވި ކަމަށް ވިދާޅުވި އެވެ.
އޭސީސީން މިހާރު ވެސް ދައުލަތުގެ ބަޖެޓުން ކުއްޔަށް 4.8 މިލިއަން ރުފިޔާ ހޭދަކުރެ އެވެ.
ޝާމިލް ވިދާޅުވީ، އޭސީސީ މިވަގުތު ހުންނަނީ މީހުން ދިރިއުޅޭ ގެއެއްގައި ކަމަށާއި އެއީ އެފަދަ އިދާރާއެއް ހިންގުމަށް އެންމެ އެކަށީގެންވާ ތަނެއް ވެސްނޫން ނަމަށެވެ. އާންމު މީހުން ދިރިއުޅޭ އިމާރާތެއްގައި އޭސީސީ ހިންގާތީ، ތަހުގީގުތަކަށް އަދި މައުލޫމާތު ސާފުކުރުމަށް ހާޒިރުކުރާ މީހުންގެ ރައްކާތެރިކަން އެންމެ ފުރިހަމަ އަށް ކަށަވަރު ކުރަން ދަތިވާ ކަމަށް އޭނާ ވިދާޅުވި އެވެ.
"ކުށްވެރި ވެގެނެއް ނޫން، ނޫން އެކަމަކު މައުލޫމާތު ސާފުކުރުމަށް ދަންނަވާލިއަސް، އާންމުކޮށް މީހުން، ނޫސްތަކުން އެ މީހުން ކުށްވެރިވި ކަމަށް ބަލާ ކަހަލަ ގޮތަކަށް ތަން މި ހުރީ. ދުނިޔޭގެ އެހެން ގައުމުތަކުގައި އެންޓި ކޮރަޕްޝަން ކޮމިޝަންތައް ވަރަށް ބޮޑަށް ހިންގަނީ ފުލުހުންގެ އިދާރާތައް ހިންގާ ގޮތަށް،" އޭނާ ވިދާޅުވި އެވެ.
އޭސީސީގެ ރައީސް ވިދާޅުވީ، އެ އިދާރާގެ މުވައްޒަފުން މިވަގުތު ވެސް މަސައްކަތް ކުރަނީ ވަރަށް ކުޑަ ޖާގައެއްގައި ކަމަށާއި އެކަމަށް އަވަސް ހައްލުތަކެއް ބޭނުންވާ ކަމަށެވެ.
"އަޅުގަނޑު ގަބޫލުކުރާ ގޮތުގައި އެންޓި ކޮރަޕްޝަން ކޮމިޝަން އެއްގޮތަކަށް ވެސް އާންމު މީހެއް އުޅޭ ގެއެއްގައި ހިންގޭ ގޮތަކަށް ނޫން އިންތިޒާމުތައް ހުންނަން ވާނީ. އެ އަށް ވުރެ އަޅުގަނޑުމެންނަށް މަސައްކަތްތައް ކުރެވޭނެ ގޮތަކަށް ހުންނަން ވާނީ. މިސާލަކަށް މިވަގުތު ވެސް، އަޅުގަނޑުމެންނަކަށް ނެތް މީހުން އަރާ ފޭބުމުގައި ވެސް ކޮންޓްރޯލްތަކެއް ގެންގުޅެވޭކަށް،" ކަންބޮޑުވުމާ އެކު އޭސީސީގެ ރައީސް ވިދާޅުވި އެވެ.