11 ނޮވެމްބަރ 2025 - 15:10
ފުވައްމުލައް ސިޓީގެ ފެނުގެ މައްސަލަ ކުރިއަށް އޮތް ހައެއްކަ ގަޑިއިރުގެ ތެރޭގައި ހައްލުކޮށް، ކުރިއެކޭ ވެސް އެއްގޮތަށް ފެން ލިބެން ފަށާނެ ކަމަށް ރައީސް އޮފީހުގެ ތަރުޖަމާނު ހީނާ ވަލީދު މީގެ އިރުކޮޅެއް ކުރިން ވިދާޅުވެއްޖެ އެވެ.
ފުވައްމުލަކުގެ ފެން ތަޣައްޔަރުވެފައިވާތީ އެރަށުން އިއްޔެ ފެނުގެ ހިދުމަތް ކަނޑާލުމާއެކު، އެރަށް ވަނީ ފެނަށް ޖެހިފަ އެވެ.
އެކަމާ ގުޅިގެން ހީނާ މިއަދު ސޯޝަލް މީޑިއާގައި ކުރެއްވި ޕޯސްޓްގައި ވަނީ ފެން ތަޣައްޔަރުވެފައިވާތީ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އާއި ހެލްތު ޕްރޮޓެކްޝަން އޭޖެންސީ (އެޗްޕީއޭ) ގެ މިންގަނޑުތަކާ އެއްގޮތަށް ފެން ޑިސްއިންފެކްޓްކޮށް، ތާނގީތައް ސާފުކޮށް، ފްލަޝް ކުރުމުގެ މަސައްކަތް ފެނަކަ ކޯޕަރޭޝަނުން ކުރަމުން އަންނަ ކަމަށެވެ.
އަދި ކުރިއަށް އޮތް ހައެއްކަ ގަޑިއިރުގެ ތެރޭގައި ފެނުގެ ރައްކާތެރިކަން ކަށަވަރު ކުރުމަށްފަހު ކުރިއެކޭ ވެސް އެއްގޮތަށް ފެން ދޫކުރަން ފަށާނެ ކަމަށް އެ ޕޯސްޓްގައިވެ އެވެ.
އެ ޕޯސްޓްގައިވާ ގޮތުން އެ މައްސަލަ ކުރިމަތިވުމާ އެކު، ވަގުތީ ގޮތުން ފުވައްމުލަކަށް ބޭނުންވާ ފެން ފޯރުކޮށް ދިނުމުގެ މަސައްކަތް ވަނީ ކޮށްފަ އެވެ. އެގޮތުން ކަނޑާއި ވައިގެމަގުން 1،200 ކޭސް ފެން ފުވައްމުލަކަށް ފޮނުވާފައި ވާއިރު، އިތުރަށް ވެސް ފެން ކޭސްތައް ފޮނުވުމުގެ މަސައްކަތް ކަމާބެހޭ އިދާރާތަކުން ކުރަމުންދާ ކަމަށް ވެސް އެ ޕޯސްޓްގައިވެ އެވެ.
ފުވައްމުލަކު ސިޓީ ކައުންސިލުން ކުރިން ބުނެފައިވަނީ ފެނުގެ މައްސަލަ ކުރިމަތިވީ ފެނުގެ މައްސަލަ ކުރިމަތިވެފައިވާތާ އެތައް ދުވަހެއް ވެފައިވާ ކަމަށާއި އަދި ފެނަކަ ކޯޕަރޭޝަނުން ކުރިން އެ މައްސަލަ ހައްލުކުރަން މަސައްކަތް ކޮށްފައިނުވާ ކަމަށް ވެސް އެ ކައުންސިލުން ބުނެފައިވެ އެވެ.