11 ނޮވެމްބަރ 2025 - 13:23
އެމެރިކާގެ ރައީސް ޑޮނަލްޑް ޓްރަމްޕާއި ސީރިއާގެ ރައީސް އަހުމަދު އަލް ޝަރާ ވައިޓް ހައުސްގައި ބޭއްވެވި ތާރީހީ މަޝްވަރާތަކަށް ފަހު އައިއެސްއާ ދެކޮޅަށް ބައިނަލްއަގުވާމީ ކޯލިޝަންގައި ސީރިއާ ބައިވެރިވާން ނިންމާފައިވާކަން އިއުލާނުކޮށްފި އެވެ.
ސީރިއާގައި އޮތް، ބައްޝާރުލް އަސަދުގެ ޒަމާންވީ ވެރިކަން ނިމުމަކަށް ގެނައި ހަނގުރާމަވެރިންގެ ލީޑަރު ޝަރާ އަކީ 1946 ވަނަ އަހަރު ސީރިއާއަށް މިނިވަންކަން ލިބުނު ފަހުން ވައިޓް ހައުސް އަށް ވަޑައިގަތް ސީރިއާގެ ފުރަތަމަ ލީޑަރެވެ.
ނަމަވެސް އުމުރުން 43 އަހަރުގެ ޝަރާ އޯވަލް އޮފީހަށް ވަޑައިގަތީ އެމެރިކާގެ ޓެރަރިސްޓުންގެ ލިސްޓުން އުނިކުރިތާ ދެތިން ދުވަސް ފަހުންނެވެ.
ޝަރާގެ ހަޔާތު ތަހްރީރު އަލް ޝާމް (އެޗްޓީއެސް) އަކީ އަލްގައިދާއާ ގުޅުން ހުރި ޖަމާއަތެކެވެ.
"މި ދަތުރުފުޅުގައި ސީރިއާ އިން ވަނީ އައިސިސް ނައްތާލުމަށް މަސައްކަތްކުރާ ގްލޯބަލް ކޯލިޝަންގައި ބައިވެރިވާން ނިންމާފައިވާކަން ހާމަކުރައްވާފައި،" އެމެރިކާ ސަރުކާރުގެ އިސް އޮފިޝަލަކު ވިދާޅުވި އެވެ.
އައިސިސް ބަލިކުރުމަށާއި އެ ޖަމާއަތާ އެކި ގައުމުތަކުން ގުޅޭ ހަނގުރާމަވެރިން ހުއްޓުވުމާ ގުޅޭ ގޮތުން މަސައްކަތްކުރާ ކޯލިޝަންގައި ސީރިއާ ބައިވެރިވުމާ އެކު، މެންބަރުންގެ އަދަދު 90 އަށް އެރީ އެވެ.
އޮފިޝަލް ވިދާޅުވީ އެމެރިކާއާ އެކު ސިޔާސީ ގުޅުންތައް ގާއިމުކޮށް ޓެރަރިޒަމާ ދެކޮޅު މަސައްކަތް ފުޅާކުރުމަށާއި ސަލާމަތީ އަދި އިގްތިސާދީ ކަންކަމުގައި ގުޅިގެން މަސައްކަތްކުރުމުގެ ފުރުސަތު ވެސް ސީރިއާ އަށް ދޭނެ ކަމަށެވެ.
ބައްދަލުވުމުގައި ޓްރަމްޕު ވަނީ ޒަމާންވީ ދާހިލީ ހަނގުރާމައަށް ފަހު ސީރިއާ އަކީ ވަރަށް ކާމިޔާބު ގައުމަކަށް ވާނެ ކަމުގެ ޔަގީންކަން އެބަ އޮތް ކަމަށް ވިދާޅުވެފަ އެވެ.