16 ޖޫން 2016 - 07:56
ހެމާ މާލިނީ އާއި ދަރުމެންދުރަ އަކީ 1970-1980ގެ އަހަރުތަކުގައި ހިންދީ ފިލްމު އިންޑަސްޓްރީގައި އެންމެ ގަދަޔަށް ފިޔަޖެހި ތަރިންގެ ތެރޭގައި ހިމެނޭ ދެ އެކްޓަރުންނެވެ. މި ދެ ތަރިން އެކުގައި ގިނަ ފިލްމުތަކެއް ކުޅެފައިވެ އެވެ.
ޝޯލޭ، ސީތާ އައުރު ގީތާ، ޗަރަސް ފަދަ ފިލްމުތަކަކީ މި ދެ ތަރިން އެކުގައި ކުޅުނު ކާމިޔާބު ގިނަ ފިލްމުތަކުގެ ތެރެއިން ވެސް ވަރަށް ފާހަގަކޮށްލެވޭ ފިލްމު ތަކެކެވެ.
މި ދެ ތަރިންގެ ފިލްމުތަކަށް ވުރެ ވެސް ބޮލީވުޑްގައި މި ދެ އެކްޓަރުންގެ ހަގީގީ ލޯބީގެ ވާހަކައިގެ އަޑު މާ ގަދަވި އެވެ. ހެމާ އަކީ 1970ގެ އަހަރު ތަކުގައި ބޮލީވުޑްގައި ހުރި އެންމެ ރީތި އެންމެން "ޑްރީމް ގާލް"ގެ ގޮތުގައި މުޚާތަބުކުރާ ބަތަލާ އެވެ. އަދި އޭރު ފިލްމު ކުޅުނު ޖީތެންދުރަ އާއި ސަންޖީވް ކުމާރު ފަދަ ވަރަށް ގިނަ އެކްޓަރުން ހެމާ އަށް ހިތް ކިޔާލަ ކިޔާލަ ތިއްބެވެ. ނަމަވެސް ހެމާގެ ހިތް އަތުލީ އޭރުވެސް ކައިވެނިކޮށްގެން ދަރިން ތަކެއް ލިބިފައިވާ ދަރްމެންދުރަ އެވެ.
ހެމާ އާއި ދަރްމެންދުރަގެ ލޯބީގެ ވާހަކަ އަކީ ބޮލީވުޑް ފިލްމަކަށް ވަކި ދޫކުރާ ވަރުގެ ވާހަކައެއް ނޫނެވެ. ދެ މީހުންނަކީ ވެސް ހިންދޫ ދީނުގެ ދެ މީހުން ކަމަށް ވާތީ ކައިވެނި ކުރެވޭނެ ގޮތެއް ނެތް ހާލުގައިވެސް އެކަކު އަނެކާ ވަކިވާކަށް މި ދެ ތަރިން ބޭނުމެއް ނުވި އެވެ. ދަރުމެންދުރަ އަށް އޭނާގެ ފުރަތަމަ އަނބިމީހާ އަދި އޭރު ތިބި ދަރިން ކަމަށްވާ ސަނީ އާއި ބޮބީ އަދި ވިޖެޔާތާގެ މަންމަ ވަރިކުރެވޭކަށް ވެސް ނެތެވެ. ނަމަވެސް ހެމާ ދޫކޮށްލުމަކީ ވެސް އޭނާއަށް ކުރެވޭވަރުގެ ކަމެއް ނޫނެވެ.
ވަރަށް ގިނަ ދުވަސް ވަންދެން ދެ މީހުން ވަރަށް ލޯބިން އުޅުނަސް ދެ މީހުންނަށް ދިރުޅުމެއް ފެށޭނެ ގޮތެއް ނެތި ވަރަށް ގިނަ ދުވަހު އުޅެން ޖެހުނެވެ.
ހެމާ އަކީ މުސްލިމެއް ކަމަށް ވާތީ އޭނާއާ ކައިވެނިކުރެވެން އޮތް ހަމައެކަނި ގޮތަކީ އިސްލާމްވުން ކަން ދަރުމެންދުރަ އަށް އެނގިގެން އޭނާ އެންމެ ފަހުން އިސްލާމް ވީ އެވެ. އަދި އެހެން މީހުން ދައްކާ ވާހަކައަކަށް ބެލުމެއް ނެތި އަވަސް އަވަހަށް ހެމާ އާ ކައިވެނި ކުރީ އެވެ.
އޭގެ ފަހުން މިހާރު 36 އަހަރު ވީ އެވެ. މި ކައިވެންޏަށް ދެ މީހުންނަށް ލިބުނު ދެ ދަރިން ކަމަށްވާ އީޝާ އާއި އާހްނާ ވެސް ބޮޑުވެ ކައިވެނިކޮށް އާހްނާ އަށް ދަރިއަކު ލިބި މިހާރު މި ދެމަފިރިންނަށް ކާފަ މާމަ ވެސް ވަނީ ކިޔާފަ އެވެ.
ދާދިފަހުން އީޝާ ވަނީ އޭނާގެ މަންމަ އާއި ބައްޕަ ވަރަށް ލޯބިން އެކުގައި ޗުއްޓީ ހޭދަކުރަނިކޮށް ނަގާފައިވާ ފޮޓޯއެއް ސޯޝަލް މީޑިއާގައި އާންމު ކޮށްފަ އެވެ.
މި ފޮޓޯއާ އެކު އީޝާ ލިޔެފައިވާ ލިޔުންކޮޅުގައި އޭނާގެ މަންމަ އާއި ބައްޕަގެ ދެގޮތެއް ނުވާ ލޯތްބަށް ތައުރީފުކޮށްފައިވެ އެވެ.