09 ނޮވެމްބަރ 2025 - 23:42
ހަނިމާދޫ އިންޓަނޭޝަނަލް އެއާޕޯޓު ތަރައްގީ ކުރުމުގެ މަސައްކަތުގައި މިހާތަނަށް ނިމުނީ 72 ޕަސެންޓް ކަމަށް ވިޔަސް މި ސަރުކާރުން އެ މަޝްރޫއުގެ ސްޕީޑު އަވަސްކުރި ކަމަށް އެމްއޭސީއެލްގެ މެނޭޖިން ޑިރެކްޓަރު އިބްރާހިމް ޝަރީފް މުހައްމަދު މިރޭ ވިދާޅުވެއްޖެ އެވެ.
ހަނިމާދޫ އެއާޕޯޓް ޒަމާނީކޮށް، އަލުން ހުޅުވުމަށް އެ އެއާޕޯޓުގައި ބޭއްވި ބޮޑު ރަސްމިއްޔާތުގައި ޝަރީފް ސިފަކުރެއްވި ގޮތުގައި، އެ އެއާޕޯޓުގެ ހިންގުން މި ސަރުކާރުން އެމްއޭސީއެލްއާ ހަވާލުކުރުމަކީ "އުތުރުގެ ތަރައްގީގެ ތަޅުގަނޑި" ހަވާލުކުރުން ފަދަ ކަމެއް ކަމަށެވެ. "އަޖައިބެއް ފަދަ" އެ އެއާޕޯޓާ އެކު ލިބޭ އިގުތިސާދީ ފައިދާ މުޅި ބޮޑު ތިލަދުންމައްޗަށް ކުރާނެ ކަމަށް އޭނާ ވިދާޅުވި އެވެ.
"މި ޖަވާހިރުން އަޅުގަނޑުމެން ބިނާކުރާނީ މާ އުފާވެރި މުސްތަގުބަލެއް. މާ އުފާވެރި ބޮޑު ތިލަދުންމައްޗެއް،" އޭނާ ވިދާޅުވި އެވެ.
ޝަރީފް ވިދާޅުވީ ނޮވެމްބަރު 17، 2023 ގައި މި ސަރުކާރު އުފެދުނު އިރު، ހަނިމާދޫ އެއާޕޯޓް ތަރައްގީގެ މަޝްރޫއުގެ ނިމިފައި އޮތީ 28-30 ޕަސެންޓް މަސައްކަތް ކަމަށެވެ.
"ތަފާތު މީހުން ތަފާތު ގޮތްގޮތަށް ދެކިދާނެ، އެކަމަކު، މިވަރުގެ ބޮޑު ފެސިލިޓީއެއް ހަދާއިރު، އެ ފެސިލިޓީ ރަން ކުރުމަށް ނުވަތަ ހިންގުމަށް ބޭނުންވާ ހުރިހާ ކަމެއް އެއީ ޕްރޮޖެކްޓުގެ ކަންތައްތައް. އަޅުގަނޑުމެން ހަވާލުވި އިރު، ޕެސެންޖާ ޓާމިނަލެއް ނުނިމޭ. ކާގޯ ޓާމިނަލް ބިލްޑިންއެއް ނުނިމޭ. ޖެޓީއެއް ނުނިމޭ. ފަޔަ ސްޓޭޝަނެއް ނުނިމޭ. އިންޖީނުގެއެއް ނުނިމޭ،" ޝަރީފް ވިދާޅުވި އެވެ.
"މި ހުރިހާ ކަމެއް މިހާ ކުޑަ ދުވަސްކޮޅެއްގެ ތެރޭގައި ކުރުމަށް ބާރު އަޅުއްވައި ދެއްވި، އެހީތެރިވެ ދެއްވީ އަޅުގަނޑުމެންގެ އިއްޒަތްތެރި ރައީސުލްޖުމްހޫރިއްޔާ [ޑރ. މުހައްމަދު މުއިއްޒު]. ހިތުގެ އެންމެ ފުންމިނުން ޝުކުރު ދަންނަވަން."
ޝަރީފް ވިދާޅުވީ ހަނިމާދޫ އެއާޕޯޓު މިރޭ ހުޅުވީ އެ އެއާޕޯޓް ކުރިން ހިންގި އަދި މިހާރު އެމްއޭސީއެލްގެ ދަށަށް ބަދަލުކޮށްފައިވާ ރީޖަނަލް އެއާޕޯޓްސް ކޮމްޕެނީ (އާރުއޭސީއެލް) އާއި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް އާއި މިނިސްޓަރުގެ ޓީމުން ކުރި ވަރަށް ބުރަ މަސައްކަތުގެ ސަބަބުން ކަމަށެވެ.
"އަޅުގަނޑުމެން މިހާރު ކުޑަ ދުވަސްކޮޅެއްގެ ތެރޭގައި ގާތްގަނޑަކަށް 72 ޕަސެންޓްގެ މަސައްކަތް އެ މަނިކުފާނާއި [މިނިސްޓަރު މުއްތަލިބް އާއި] އެމަނިކުފާނުގެ ޓީމުން ދެއްވި އެހީތެރިކަމާ ލައިގެން ނޫނީ ނިންމާ ނުލެވޭނެ ކަމީ ޔަގީންކަމެއް،" ޝަރީފް ވިދާޅުވި އެވެ.
މިރޭގެ ރަސްމިއްޔާތުގައި ރައީސް މުއިއްޒު ވިދާޅުވީ ހަނިމާދޫ އެއާޕޯޓަކީ އުތުރުގެ ޓޫރިޒަމާއި އިގުތިސާދީ ތަރައްގީއަށް "ބޫސްޓެއް" ގެނެސްދޭނެ މަޝްރޫއެއް ކަމަށާއި މި ސަރުކާރުން ވާހަކަ ދައްކަނީ ނަތީޖާ ނެރެދީގެން ކަމަށެވެ.
"ދެންމެ އެމްޑީ ފާހަގަކުރެއްވި ފަދައިން ގާތްގަނޑަކަށް ތިރީހަކަށް ޕަސެންޓް މަސައްކަތް ނިމިފައި އޮތް، މި އެއާޕޯޓު އެތައް މަސައްކަތެއް އަވަސް ކޮށްގެން، އިންޑިއާ ސަރުކާރާއި ކޮންޓްރެކްޓަރާއި ދިވެހި ސަރުކާރާއި ހުރިހާ ފަރާތްތަކާއި އެންމެން ގުޅިގެން ކުރި މަސައްކަތުން 70 ޕަސެންޓް މިހާތަނަށް، މިހާ އަވަހަށް އަވަސްކޮށް، އަޅުގަނޑު ވައުދުވި ގޮތަށް ނިންމި ބޭނުމަކީ މި ދެންނެވި ފަދައިން މި ރަށާއި މި އަތޮޅާއި މި ސަރަހައްދުގެ ހުރިހާ ރައްޔިތުންނަށް އަވަސްމިނެއްގައި އިގުތިސާދީ ފަހި ފުރުސަތުތައް ހޯދައިދިނުން." ރައީސް ވިދާޅުވި އެވެ.
އިންޑިއާގެ އެގްޒިމް ބޭންކުން ދީފައިވާ 800 މިލިއަން ޑޮލަރުގެ ލައިން އޮފް ކްރެޑިޓްގެ ދަށުން 136 މިލިއަން ޑޮލަރު (ދެ ބިލިއަން ރުފިޔާ) ހަނިމާދޫ އިންޓަނޭޝަނަލް އެއާޕޯޓު ތަރައްގީކުރުމަށް ހަރަދުކޮށްފައިވެ އެވެ.
އެ މަޝްރޫއުގެ ދަށުން ހަނިމާދޫ އެއާޕޯޓުގައި 2.7 ކިލޯމީޓާރުގެ އާ ރަންވޭއަކާއި އަހަރަކު 1.3 މިލިއަން ފަސިންޖަރުންނަށް ހިދުމަތް ދެވޭ އާ ޓާމިނަލަކާއި އެއިރޯ ބްރިޖަކާއި ޑިއުޓީ ފްރީ އާއި ލައުންޖާއި އާ އެއާ ޓްރެފިކް ކޮންޓްރޯލް ޓަވަރަކާއި ކާގޯ އިމާރާތަކާއި ފިއުލް ފާމެއްގެ އިތުރުން ސީޕްލޭނަށް ހިދުމަތް ދެވޭނެ ޖެޓީ ވެސް ވަނީ ހަދައިފަ އެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އިންޑިއާގެ ކަލްޕަތަރު ޕްރޮޖެކްޓްސްއާ އެ އެއާޕޯޓްގެ މަސައްކަތް ހަވާލުކުރީ ސެޕްޓެމްބަރު، 2022 ގަ އެވެ.